Read obolo Jobu 29 Bible Online

Jobu 29 - obolo bible

Jobu 29

¹Jobu okekitumu ikọ kan̄ ifo isi ibe:

²Jei, kè m̀ma ikukup ubọk nkupbe me onyan̄ òraraka cha, me usen cha mgbọ Awaji okibem emi,

³mgbọ utoon̄ okitoon̄ isaba emi ibot kubọk mkpukan̄, nkekisa utoon̄ kan̄ imọọn̄ inu ije itibi emen udun!

⁴Jei, usen kecha mgbọ nrebe nsabọn irieen̄, mgbọ Awaji orebe unene ibot ejit n̄a, mè ikikpọ chieen̄ me lek uwu n̄a,

⁵mgbọ Ogwu Òkaan̄ Unye Geelek okupbe si melek n̄a, bọn n̄a si egbagban ikana emi okokop.

⁶Mgbọ ya, ubọọn̄ ìdudun̄u emi olu me lek, aran̄ olifu okekigbuk igwook inyi emi me lek ewuuk ere ichimi aran̄.

⁷“Nsisibi isi otunchit ere ama ekititiin̄, mè isiki ikweek irek me oyet ama,

⁸nsabọn irieen̄ isimun̄ emi, mîra inan̄a me oniin̄, ebi ugane isimun̄ emi, mîra inan̄a keke inyi emi umin;

⁹ebi ibot mkpulu isimun̄ emi, mîra itet usem kiban̄ ikaan̄, mè esa ubọk èchit otu kiban̄;

¹⁰ebi isi ene mîra iriaan̄ ere, mè ègba otu egọm.

¹¹Ebi geelek ìnọnọ ikọ n̄a mîra ikitumu ata ikọ ibak emi; ebi geelek ìmumun̄ emi mîra ikitọn̄ emi.

¹²Mije, ǹkekinyan̄a ebi ugbọọn̄ ìtataan̄ ukpo iweek ntap-ubọk, mè ikinyan̄a ebi kpà-nte ebi kpekaan̄ ebi ntap-ubọk.

¹³Ogwu ufieejit obokpan̄, nnyan̄abe, ìkitọtọn̄ emi, ntap-ubọk n̄a orọ ejit nwakpa ibele, mè ikọt okwa.

¹⁴Ntap ata irọrọ kubọk ofọnti, ichichit emi lek kubọk ekwut; unen oyerebet ore ofọnti inyọn̄ n̄a mè akisi ibot n̄a.

¹⁵Emi nkana chieen̄ inyi ebi ǹnàan̄, mè ikana ukot inyi ebi akọọk.

¹⁶Emi nre ute inyi ebi una, mè ikiwọlọ emen oyerebet ebi ichen, inyi mfeen̄ ikakup.

¹⁷Emi mfaan̄ ejeek me otu ebi ikpak, mè isik ebi ema eloon̄be ibọkọ isan̄a me otu ejeek kiban̄.

¹⁸“Nkekikeek ibe, ‘Acha ugwem n̄a môwa kubọk nkwukwuuk achiaan̄, m̀bakwu ilaak me uwu n̄a me utelelek.

¹⁹Emi ǹkup kubọk uti ugwun̄-ijọn̄ kan̄ otibibe ire lek mun̄, mbat okekireke agọọk n̄a otutuuk eririeen̄.

²⁰Umin ìbokpọkpọ ikinu inyi emi, aya unye ìbokpọkpọ ikinin̄ emi emen.’

²¹“Ebi ene ekekigban̄ ikọ n̄a, mè èkup èkekpọ emi, mè èkeriaan̄ ere egban̄ nteme n̄a.

²²Nsitumu isan̄a, ema kpekitap otu; ikọ n̄a îra ikisiki ema lek kubọk òfiik mun̄.

²³Ema ekikukup ikpọ emi kubọk ekikup ikpọ ibot, mè ikibọkọ ikọ n̄a itap kubọk ijọn̄ okimeen̄ aya otu ibot.

²⁴Nsikichak imọm melek kiban̄, ema kpekichieek ibe ke ene òbet lek n̄a mâkọt ichak imọm melek kiban̄; ubelejit òkup me isi n̄a, ema kpekichieek ibe inan̄a irọn̄ me ijọn̄.

²⁵Emi nkijeen̄ ema oniin̄, mè ire ogwu ibot inyi ema, mè ikup me etete kiban̄ kubọk ogwu ubọọn̄ okup me etete ebi urum akọn̄ kan̄; ǹkup kubọk ogwu òkisiki ejit ebi ufieejit.”