Read obolo Jobu 3 Bible Online

Jobu 3 - obolo bible

Jobu 3

¹Mgbọ usen cha orakabe, Jobu onenichili otu itumu ikọ, mè ifieek otu inyi usen emanbe ọmọ.

³“Kè usen emanbe emi ijijaka ichep, mè eririeen̄ ya etumube ibe ke nga n̄a înin̄ owot gwun̄ enerieen̄!

⁴Kè usen ya ikana udun; kè Awaji ikakup me inyọn̄ ìkeek inu ofolek kan̄, kè utoon̄ egwe ikatoon̄ me usen ya.

⁵Kè udun mè ufieejit mkpa ibọkọ usen ya ikaan̄; kè oduku inyọn̄ ikana ichit ọmọ bùk; kè ndudun ere itap ukpook igak emen usen ya.

⁶Kè ekpuk udun itet eririeen̄ ya ibọkọ me unye; kè usen ya ikakup me otu ifuk usen acha ya, kè ọmọ ikanin̄ me otu ifuk usen me onyan̄.

⁷Kè ene ekanin̄ owot me eririeen̄ ya; kè ekanọ ukpo unwọọn̄ geege me emen kan̄.

⁸Kè ebi ìrọriọọn̄ ubọk ekifieek otu inyi usen, ebi ìkigwen mgbugbo anam ejit okwaan̄ ijibi ibene, efieek otu enyi usen ya!

⁹Kè ebi kè ntoronyan̄ agan̄ egwe eririeen̄ usen ya edun; kè eririeen̄ ya ikup ikikpọ utoon̄ egwe, ire, ikamun̄; kè usen ya ikamun̄ adasi utoon̄ egwe,

¹⁰mije, ìkachit otu akpa gwun̄ ìkwek emi, inyi chieen̄ n̄a ikamun̄ ufieejit.

¹¹“Ìre keke orọ ǹkakwu me emen owot nga n̄a, inyi eman emi nkwukwu mọnọ?

¹²Keke orọ akpatukot ibọkọ emi itoon̄ me inyọn̄ kan̄, mè ebe ikup eyi esabe ikpukpo emi?

¹³Mije, ike mgbọ keyi, kè ǹkwu nraka, mè ǹkup me utelelek, kè ǹlaak, mè ǹkup me isiki-efuuk,

¹⁴melek ebi ubọọn̄ mè ebi nteme linyọn̄, ebi ìnanama ilile inu inyi lek kiban̄, echi òkakana ǹrioon̄ mgbọ keyi,

¹⁵melek ebi ibot mkpulu ebi ìkakaan̄ alata araran̄, ebi ìtataak alata okuket ijot uwu kiban̄ gbak.

¹⁶Sà ìre keke orọ ǹkakup kubọk owot òsibi ene me nlelet eyi kpemun̄, kubọk nsek nsabọn ekamun̄ge utoon̄ egwe?

¹⁷Me ere ya, ebi ikpak kpekinyi ufialek, ere ya ke ebi efuuk otabe me owot ekisiki efuuk.

¹⁸Ere ya ke ebi mkpọn ekikaan̄ utelelek; kpeyaka ikinọ ida ukpo ebi ìkitutuku ema.

¹⁹Me ere ya, ogwu ijija mè ogwu ilile ìre ìkike, ogwu usun̄ înwọnọ me ubọk nte uwu kan̄.

²⁰“Keke orọ esabe utoon̄ inyi ebi ukwook, mè isa ugwem inyi ebi ìkup me ujaralek,

²¹ebi ìkikpọ chieen̄ ibe mkpa iniben ema, ire, ìkanu, ebi ìkiweek mkpa kubọk eweek inu ubọọn̄ òlelet,

²²ebi ìkinwọọn̄ unwọọn̄, mè ikibele ejit mgbọ ema isinin̄ udọn̄-ufuun̄?

²³Keke orọ esabe utoon̄ inyi ogwu ikariọọn̄ge agan̄ îkije inin̄, ogwu Awaji owakbe ogọ ikwek?

²⁴Mije, itoto mfi, ọmọ ore inorie nkirie; ike mun̄ okigbuk, ikeya ke nkigwuku mfi.

²⁵Inu ntetbe ukpook me lek, îre emi lek, inu mfieekbe owot me lek, îrọ emi.

²⁶Ǹkakup me esuuk, ǹkamun̄ utelelek, ǹkakaan̄ isiki-efuuk, ire, ufialek ìkpọkpọ ikinu.”