Read obolo Jobu 30 Bible Online

Jobu 30 - obolo bible

Jobu 30

¹“Ire, mgbọ keyiyi, ebi ìrere nsabọn me lek n̄a, eyaka ikichachak emi ochak; ebi ebi nte kiban̄ kpesosoon̄ ebi mariabe ibe esi egọọk ebi kè ibo ìkibem arọọn̄ n̄a ekesi ikwaan̄.

²M̀basa unye kiban̄ irọ keke? Unye kiban̄ cha îta isan̄a kpai.

³Ife una ubọk mè uraafiọọn̄ otetbe iwọlọ, ebi ìkisi ikwat lek nchiaak ugwun̄-ijọn̄ uti itaka me emen èwê me eririeen̄.

⁴Ife ìkijim uti emen èwê isa irọ inorie, mè ikijim ire lek ugwun̄-ijọn̄ uti burum;

⁵ebi erieen̄be isibi me etete ebi ene, mè ikidimi ukpo me ibot kubọk ebi inọ;

⁶ebi ìsisi ikiluk me irak ngigo okolo mun̄ ochiaakbe ita me emen, mè ikiluk me udọn̄ me emen ijọn̄ mè nkororok emen ewuuk.

⁷Ema ekikup me irak oron ikitaan̄ ukpo kubọk inyinya akpan, mè ikikat lek kiban̄ igbaan̄ ilaak me irak abọm egbe mije utọọk.

⁸Mbubut ife ebi kpekinọ erieen̄ kiban̄, ife elapbe isibi me ido!”

⁹“Mgbọ keyi, ema[6] ekikọt emi me okwa, mè ikirọ emi ochak; nkana ogwu ema ekisa irọk urọk.

¹⁰Ema ekijọjọ emi ejit me lek, mè ikije ǹsọn ǹsọn me lek n̄a; kpekikọt itele ichocho ataak igwook emi me isi.

¹¹Mije, Awaji îfaan̄ emi ukwuuk isan̄a me lek, mè itap emi unan iso lek; eya orọ, ema ekirọ emi inu òneme ema, kpeyaka ikikọt itet lek ikaan̄.

¹²Ebi afa mînin̄ emi gìrìrìm me agan̄ ubọk ulom n̄a, mè ikpulu emi ukot isan̄a me ijọn̄; ema mîtap ufe ema ekisa ikpan̄ ene iban emi.

¹³Mîfieek ikwek emi me oniin̄, inyi nkalibi ìnwọnọ, mè irọ inyi emi ǹnan̄a ǹrọn̄, me ene geege ikatapge ubọk ìnyi ema.

¹⁴Ema ekifan̄a inu kubọk etibi iraka me chieen̄ mgban òbobook, mè inigbugbọ me emen ewuuk cha ikinu emi lek.

¹⁵Ukpook ekakpọge chieen̄ okakana ichit emi; ulibi n̄a otata kubọk inu efet obenbe iwut ije, unyan̄a nkikpọ chieen̄ onininiin̄ ichep kubọk oduku inyọn̄.

¹⁶“Mgbọ keyi, ugwem n̄a òkiyiyeek ita, ǹkup me emen ubọk ujaralek usen geelek.

¹⁷Me eririeen̄, ukwuuk n̄a ìkiyok emi kubọk ekichichim, orukan̄ ìkitaka emi, ìkasiki efuuk.

¹⁸Orukan̄ n̄a îsa ikpele unye kan̄ irọ ofọnti n̄a inwene; orukan̄ n̄a ìkinwan emi kubọk ebek ofọnti n̄a.

¹⁹Awaji îtọbọ emi ito me emen ogbọ, nkakana achiaan̄ mè ntọn̄.

²⁰“Jei Awaji, ntaan̄ ukpo igwen owu, ire, òkabọkọ emi otu; nnan̄a ikeke iriaak uriaak, ire, owu okpọkpọ emi chieen̄ chieen̄.

²¹Owu òyaka inikirọ emi me lek ikpak ikpak; owu osa unye ubọk kwun̄ itap emi ufialek igak lek.

²²Owu oben emi itọp inyi efet, ikekiwut emi ije, owu otọp emi ikana ere me emen egwijo.

²³Nriọọn̄ ibe owu môsa emi ijet mkpa, owu môsa emi isi uwu ebi ìluk ugwem ekinititiin̄.

²⁴“Me atikọ, kpunu ogwu òbochak ubọk me lek ene ogwu òkpukpukpuku igwook, mgbọ îkupbe me emen ujaralek ikitaan̄ ukpo iweek ntap-ubọk.

²⁵Ìre ǹkato ito ìnyi ebi ìkup me emen ufialek? Ìre ǹkafieek ejit me ibot ebi una ubọk?

²⁶Ire, mgbọ nkupbe ikikpọ ata inu, îre ijo inu onu, mgbọ nkikpọ chieen̄ ibe utoon̄ mônu, îre udun onu.

²⁷Owot òkiyọọk emi, ìkasiki; egwe geelek, ìkire ufialek ufialek okinu inyi emi.

²⁸Ǹkijijen̄e ikana me emen udun eyi ugwuuk, ura ìkatoon̄ ìbele emi ejit; ǹkup me ere ama etitiin̄be ikitaan̄ ukpo iweek ntap-ubọk.

²⁹Ukpo n̄a îrọ ǹkana ngwan̄ melek ibo oron afa, mè ǹkana unene melek ebi kè ikwurikwu.

³⁰Akpa n̄a îkana ofifit, mè ikinyiaan̄, ukan̄ òbak emi me lek îyok ukwuuk n̄a.

³¹Ida uneen̄ n̄a îkana ida okwa ufieejit; ida òja n̄a îkana ida okwa ito.