Read obolo Jobu 31 Bible Online

Jobu 31 - obolo bible

Jobu 31

¹“Nnyan̄a ibot melek chieen̄ n̄a, ibe ke ǹkabakpọ obaak enenwaan̄ ikaan̄ ulọk me lek.

²Mije, ìre keke ke ene obokaan̄ me ubọk Awaji òkup me inyọn̄? Sà ìre kpasi ìrot ke ene obokaan̄ me ubọk Ogwu Òkaan̄ Unye Geelek ogwu òkup me ere òbebene?

³Ìre ìkare mfufiat okup inyi ebi ikpak? Sà, ìkare ùrioon̄ okup inyi ebi ìkirọ ijo inu?

⁴Ìre Awaji ìkakimun̄ oniin̄ nkije, mè ìriọọn̄ ifuk otutuuk akpat ukot ije n̄a geelek?

⁵“Ire ke nluluk ugwem ataak ataak, mè ifet ukot ikirọ inu ofiaan̄ ofiaan̄,

⁶kè Awaji isa okwukwut itọ-inu ònenen itọ emi ikpọ, mè iriọọn̄ ibe ke emi ǹkarọ inu geege ìlọ.

⁷Ire, ire njeje ikwala lek oniin̄ kan̄, mè ire chieen̄ n̄a isasa ejit n̄a ije ilọ, mè ìre ǹtatap ubọk me ijo inu,

⁸kè ofifi ene irie inu mwopbe, mè ejim mfut uko n̄a esan̄a nsek nsek.

⁹“Ire ejit n̄a isisi lek nwa ogwu melek n̄a, mè ìre ǹkililileek ikana isotu uwu kan̄,

¹⁰tele kè nwa n̄a inin̄ usun̄ ikọk akpa inyi ofifi ene, kè ofifi ebirieen̄ egọọk ọmọ elaak.

¹¹Igagan nwa ene ìre inu ikpak òfefieek lek, îre ijo inu ekisisibi oyerebet me lek.

¹²Îre ukan̄ òkitaka ene ire ama ekwukwu, kè òtaka inu geelek mwopbe me uko òriọk.

¹³“Ire njijit isisibi unen oyerebet inyi ogwu usun̄ n̄a enerieen̄ mè ìre enenwaan̄, mgbọ ema melek n̄a egugọlọbe,

¹⁴keke ke mbarọ mgbọ Awaji isinan̄a ikeke inu oyerebet? Sà ìre keke ke mbafọọk mgbọ isido emi ibot inu nrọbe?

¹⁵Ìre ìkare Awaji ogwu òrom emi me emen owot orom ema? Sà ìre ìkare Awaji yaage obot eji me emen akpa gwun̄ ebi nga kiji ni?

¹⁶“Ire njijit ebi ugbọọn̄ inu ema eweekbe, mè ìre ǹtetele itatap ubọk inyi ogwu nwakpa òkikpọ chieen̄ ibe emi mâtap ubọk inyi ọmọ;

¹⁷ire nlelet inorie n̄a ikup irie emi gaalek, ǹkakpọkọ ìnyi gwun̄ kpà-nte,

¹⁸mije, akarake nsek kan̄, emi mkpukpo ọmọ kubọk nte kan̄, mè ikpọ ogwu nwakpa chieen̄ me lek otutuuk ugwem n̄a.

¹⁹Ire mmumun̄ ogwu òkikwukwu bak me lek una ekwut, mè ìre ogwu ugbọọn̄ ikakaan̄ge ofọnti ìsa ìkwek lek,

²⁰mè ire ọmọ ìkabele ejit, mè ìtọn̄ emi, mije ekwut esabe inwọọn̄ arọọn̄ n̄a irom oyokbe ọmọ lek,

²¹ire ntọtọ ubọk me isi gwun̄ kpà-nte ibe ke mômun̄, mije ke nkaan̄ isi me ere oyerebet,

²²kè ubọk n̄a ijene me lek ukwuuk oguga irọn̄, mè ifan̄a isan̄a me lek usọk akpatubọk.

²³Mije, ukpook ùrioon̄ ònan̄a me ubọk Awaji ìkitetet emi; mije umin ubọọn̄ kan̄, emi m̀kpakọt irọ ojelek inu kecha.

²⁴“Ire nsasa alata araran̄ itoon̄ ejit, mè ìre ǹtutumu inyi atalek alata araran̄ ibe, ‘Owu ke nsa ibem lek,’

²⁵ire mbebele ejit mije ubọọn̄ mbọọn̄be enenen, mè ìre mije owuwa ikpoko nsabe ubọk n̄a ibọm,

²⁶ire mkpọkpọ ura me mgbọ îkitoon̄, mè ìre m̀kpọkpọ onyan̄ me mgbọ îkije ije kan̄ òrirọ òrirọ,

²⁷ire lek îbonileke ejit n̄a ifo lek itọtọbọ ebum inyi me nlelet, mè iyaka ubọk n̄a ichak me otu isa itọbọ ebum inyi ema,

²⁸kè echichi si ore ijo inu echi ekisisibi oyerebet me lek, mije, eya kè more emi ijijit Awaji òkup me inyọn̄.

²⁹“Ire emi mbele ejit mije ufialek òtetet ogwu ochicha n̄a, mè ire nnwọọn̄ unwọọn̄ mgbọ ùrioon̄ otoon̄be ọmọ;

³⁰emi ǹkafieek otu ìnyi ogwu ochicha n̄a ibe ikwu, mè ìsa me ikeya ìsa otu n̄a ìrọ ijo inu.

³¹Me atikọ, ebi uwu n̄a kpekilọlọ itutumu ibe, ‘Ekene ikatakage anam kè Jobu ìjot owot?’

³²Kpunu ogwu ichen òlalaak me lek oniin̄, mije, isotu n̄a ìkibobook inyi ogwu ije.

³³Ire nlelet ijo n̄a kubọk ebi ene ekirọ, mè ìre m̀beben nrọ-nlọ n̄a ilet me ejit,

³⁴mije ufieek-owot ibe ke urum ebi ene mêlo emi, mè ukpook ibe ke ebi uwu mêchak emi ochak, mè igọọk me ikeya mè iriaan̄ ere, ǹkasibi oyet.

³⁵Jei, ìre ekene obogban̄ usem n̄a mọnọ! Ngon iman̄ òriọọn̄ n̄a me lek ikọ ibot n̄a! Kè Ogwu Òkaan̄ Unye Geelek ifọọk emi otu; kè ogwu melek n̄a ekaan̄be ikọ ige ikọ îtoon̄be emi isibi me emen ikpa.

³⁶Me atikọ, kè m̀ben njeen̄ me oguga, inyi ene ekemun̄, mè ntoon̄ me ibot kubọk okpibot ubọọn̄.

³⁷Kè ntumu inu geelek nrọbe nnyi Awaji; kè nje ukama ukama kubọk ogwu ibot mkpulu ǹnin̄ ọmọ lek.

³⁸“Ire ijọn̄ n̄a itoto ito ikeme emi, mè otutuuk okpurukpu kan̄ ireke inyi ito,

³⁹ire nrerie mfut ònan̄a me lek ijọn̄ ya, ǹkakpe ewe, mè irọ ebi ìluk me lek ijọn̄ ya ekwaan̄ eta,

⁴⁰kpan̄asi akpa wit otibibe me uko n̄a, abọm egbe itibi, kpan̄asi akpa balì otibibe, ijo mbubet itibi,” Ikọ kè Jobu îta.