Read obolo Jobu 32 Bible Online

Jobu 32 - obolo bible

Jobu 32

¹Ebi ene ita cha erariaan̄ ere, kpeyaka ibọkọ Jobu otu, bak me lek Jobu okpọkpọ itet otu inye ikitumu ibe ke ọmọ ìre ogwu ata irọrọ.

²Ire, Eliyu gwun̄ kè Baraken ogwu Buju, ònan̄a me owot iman kè Ram, ònanaan̄ ejit inyi Jobu. Unaan̄-ejit kan̄ ìre ke Jobu ìbe ke ìnen me ubọk kan̄ mè ilọ me ubọk Awaji.

³Eliyu înaan̄ ejit si inyi ene ita ebi unene kè Jobu cha, mije, ema kpekọt ifaan̄ ikọ kè Jobu, ire, ekpọkpọ ifieek Jobu ikọ.

⁴Eliyu ìtetet ikọ ìbotumu melek kè Jobu ikaan̄-nu, mije, Jobu mè ebi melek kan̄ mîkan igak ọmọ.

⁵Ire, mgbọ îmun̄be ibe ke ebi ene ita cha kpeyaka ikaan̄ ofifi ikọ ebefọọk, inanaan̄ ejit.

⁶Eya orọ, Eliyu gwun̄ kè Baraken ogwu Buju onenitumu ibe: “Emi ìre sọntiik gwun̄, enyi ìre ebi ugane; eya orọ, mfieekbe owot, mè itet ukpook itutumu inu nriọọn̄be inyi enyi.

⁷Ǹkeek me lek n̄a ibe ke îre ebi ìkakan ebetumu ikọ, ke îre ebi ugane ebejeen̄ iriọọn̄-inu.

⁸Ire, îre Ekwukwu Awaji òkup ene me emen, òrere efuuk Ogwu Òkaan̄ Unye Geelek, okinyi ene ngobo-ntet.

⁹Ìkare ebi ìkakan gaalek ekiriọọn̄ inu, ìkare si ebi ugane gaalek ekigobo inu ònenen itet.

¹⁰“Eya orọ m̀be enyi, ìgban̄-nunu, ke emi si mâtumu eyi nriọọn̄be.

¹¹Ǹkukup ikikpọ enyi etumu ikọ kinyi, mè ikigban̄ ubọk ifan̄a kinyi okije; mgbọ enyi ekiwọlọ ikọ enyi ebetumu,

¹²ǹrọriọọn̄ ubọk isiki utọn̄ ikigban̄ enyi. Ire, ene geege me lek kinyi ìkakọt ìjeen̄ ibe ke Jobu îrọ ilọ; kpunu ogwu òkọkọt ida ikọ kan̄ ito.

¹³Ìgbala chieen̄, inyi enyi ekatumu ibe, ‘Eji mîweek iriọọn̄-inu imun̄. Awaji obofọọk Jobu otu, ìkare ebilene.’

¹⁴Jobu ìkatumu ikọ kan̄ ìkpọ emi isi, emi si, m̀kpasa ikọ kinyi ifọọk ọmọ otu.

¹⁵“Jobu, otu ebi une kwun̄ îbuk, kpeyaka ikaan̄ inu ebetumu; ikọ îta ema me otu isan̄a kpai.

¹⁶Ǹkukup ikikpọ ema mege ema eriaan̄be ere, mè ikeke ikeya, kpeyaka ibọkọ owu otu.

¹⁷Emi si mâbọkọ otu, mâtap otu eyi n̄a, mâtumu eyi emi nriọọn̄be.

¹⁸Mije, ikọ ìjojot emi otu, ekwukwu n̄a si ìkibebieen̄ emi ibe emi ǹtumu ikọ.

¹⁹Ikọ òkup emi me emen ìbet lek miin̄ echitbe otu igọm, ìbet lek aya miin̄ òborama ogbokot ibum, ire kpechili otu.

²⁰Mâtumu ikọ, inyi lek isiki emi, mâchili otu ifọọk ikọ.

²¹M̀kpalibi chieen̄ ene geege, m̀kpatutumu si ene geege imin.

²²Mije, emi ǹkariọọn̄ ubọk ekitumu ene imin, mebe nriọọn̄, kè Ogwu Òrom n̄a îra imọnọ emi isan̄a me ikafiatge mgbọ.