Read obolo Jobu 33 Bible Online

Jobu 33 - obolo bible

Jobu 33

¹“Mgbọ keyi, Jobu, nye lek gban̄ ikọ n̄a, mè gban̄ utọn̄ me lek otutuuk usem n̄a.

²Îkem, mânichili otu n̄a isan̄a amọn, ikọ n̄a ìkup emi me otu alọm.

³Ikọ n̄a ìnan̄a me ata ejit, otu n̄a ìkitumu inu nriọọn̄be me atikọ.

⁴Ekwukwu Awaji orom emi; efuuk Ogwu Òkaan̄ Unye Geelek okinyi emi ugwem.

⁵Ire ke owu môkọt ifọọk emi otu, fọọk; tutuun̄ lek kwun̄, mè sibi kweek emi.

⁶Emi melek kwun̄ ìre inu yaage me isi Awaji; arika si ke esa irom emi.

⁷Eya orọ, ukpook lek n̄a ikafieek owu owot, m̀kpasa ulobo n̄a ikeme owu.

⁸“Jobu gban̄, owu otumu ikọ me utọn̄ n̄a, nnọnọ ikọ otumube ibe,

⁹‘Ǹtatana ikup, ǹkarọ ijo inu geege; ǹtatat ikup, ǹkarọ inu geege ìlọ.

¹⁰Ire, Awaji ìkiweek emi ikọ; ìmọnọ ibe ke emi ìre ogwu ochicha kan̄.

¹¹Îsa mkpọn ibọp emi ukot igọm; ìkasan̄a chieen̄ me agan̄ geelek njebe inin̄.’

¹²“Ire, ǹkitumu inyi owu ibe, me lek ikọ keyi, owu orọ ilọ, mije, Awaji îmin enenen igak ebilene.

¹³Keke orọ okisa ifan̄a isi lek Awaji, ibe ke ìkakifọọk otu ikọ ebilene ekido ọmọ?

¹⁴Awaji ìkitumu ikọ mgbọ ge, mè òkpọk otumu owuwa mgbọ, ire, ebilene kpekitet ibot me lek.

¹⁵Awaji ìkisa mun̄umun̄ ilaak mè ilaak ọkpọchieen̄ me eririeen̄ itumu ikọ inyi ene, mgbọ ilaak onwọnọbe ene idọk, mgbọ ene olaakbe idek me inyọn̄ mkpilaak kan̄.

¹⁶Mgbọ ya ke îkitumu ikọ itap ene me utọn̄, mè ikisulu ema osusut isa ikitap iman̄ òriọọn̄ me lek nteme înyibe ema.

¹⁷Awaji ìkirọ ikeya isa ikikput ene irọrọ ijo inu, mè isa ikigban ene igugumu lek.

¹⁸Ìkisa irọ ene ikakwu ìnin̄ udọn̄ mkpa, mè ugwem kan̄ ikaraka ìfo ama ekwukwu.

¹⁹Ìkekisa orukan̄ òkito ene me ijọn̄ inyi ene osusut, mè osa si ufiak ukwuuk òkiyok ene ìkakiwọ,

²⁰eyi òkirọ inorie irook ene irerie, mè atalek inorie ene okima ijọ ene ejit.

²¹Anam akpalek kan̄ îra itak ita, ukwuuk kan̄, mgbọ òlelet cha, îra ikisibi ikeke.

²²Ọmọ îra ikikpat igbet udọn̄ mkpa, ugwem kan̄ îra ikijuuk igbet lek ebi ìkikpan̄ ene.

²³“Ire, ire ogwu osat ge me lek obop obop ebi osat Awaji, ikup me agba lek kan̄ kubọk ogwu nteek, mè initumu inyi ọmọ inu ònenen ibe irọ,

²⁴mè inito ọmọ njijin, mè initumu inyi Awaji ibe, ‘San̄a ọmọ san̄a, inyi ikasi ìnin̄ udọn̄ mkpa, mweek inu mêsabe inwene ọmọ ibot imun̄.’

²⁵Mije keya, anam akpalek kan̄ mônenikana ikup kubọk eyi sọntiik gwun̄, mè ikisek kubọk mgbọ ọmọ orebe nsabọn irieen̄.

²⁶Ọmọ isiriaak uriaak, Awaji îra ibọkọ itap; ọmọ îra ikinu initọbọ ebum inyi Awaji me ubelejit, mije, Awaji îyaka ata irọrọ kan̄ ikpọk inyi ọmọ.

²⁷Ọmọ môkekikpa inyi ebilene ibe, ‘Nrọ ijo inu, mè ikana inu ònenen itap me inu òlọlọ, ire, Awaji ìkarọ emi me lek unye unye ike îgbebe.

²⁸Kpan̄asi ikeya, inyanyan̄a emi isibi me udọn̄ mkpa, inyi mâkup me ugwem ikimun̄ utoon̄.’

²⁹“Me atikọ, Awaji ìkirọ otutuuk inu chi kpa mgbọ kpa mgbọ inyi ebilene,

³⁰isa ikigwu ene ikom, inyi ikasi ìnin̄ udọn̄ mkpa, inyi ikinọ utop ugwem me emen utoon̄.

³¹“Jobu, riọọn̄ ubọk nọ, gban̄ ikọ n̄a; riaan̄ ere, inyi ǹtumu ikọ ǹnyi owu.

³²Ire okaan̄ inu obotumu, fọọk emi otu; tumu eyi kwun̄, mije, ǹkiweek irọrọ inye ibe ke owu òkirọ inu ònenen.

³³Ire òkakaan̄, gban̄ eyi n̄a; riaan̄ ere mè ǹjeen̄ owu iriọọn̄-inu.”