Read obolo Jobu 34 Bible Online

Jobu 34 - obolo bible

Jobu 34

¹Eliyu okekitumu ikọ kan̄ ibe,

²“Enyi ebi ìriọọn̄ inu, ìnọ ikọ n̄a; enyi ebi ìkween̄ inu, ìgban̄ emi utọn̄ me lek.

³Mije, ike alọm okigban̄ utop eyi inorie, ikeya si ke utọn̄ okigobo ikọ.

⁴Eya orọ, eji enin̄ emen ikọ kan̄ eweek ere ònenen enyi lek kiji; mè eji egbaan̄ eriọọn̄ inu ònwọnwọn me chieen̄ kiji.

⁵“Mije, Jobu ìbe, ‘Ubọk n̄a ìtatana, ire, Awaji îjit emi unen oyerebet.

⁶Ìre mâkan̄ ataak me emen unen n̄a ni? Unan ònin̄ emi lek îmin ire lek kpebekọt igwa, ire, ǹkarọ ijo inu geege.’

⁷Ìre ekene enerieen̄ obet lek kè Jobu, ogwu òkibọkọ ochak kubọk ìkinwọ mudim?

⁸Ọmọ ìkigọọk ebi ìkirọ ijo inu ije, mè ikigọọk ebi ikpak igbaan̄ inu irọ.

⁹Mije, ọmọ ìkibe, ‘Ene irere unene melek Awaji, ìkakaan̄ oruru me lek.’

¹⁰“Eya orọ, enyi ebi ìkigobo inu itet, ìgban̄ emi utọn̄ me lek. Awaji ìkabokọkọt irọ inu ikpak, Ogwu Òkaan̄ Unye Geelek ìkpokọkọt irọ ijo inu.

¹¹Awaji ìkikpe ene mkpukpe igọọk me ubọk ikwaan̄ ene, mè ikinyi ene geelek inu ògbegbe eru ene okaan̄be.

¹²Me atikọ, Awaji ìkakirọrọ inu geege òlọlọ, Ogwu Òkaan̄ Unye Geelek ìkakinwunwunu unen oyerebet.

¹³Ekene osa Awaji irọ ogwu òkikpulu linyọn̄? Sà ìre ekene oto ọmọ ibe ikikpọ chieen̄ me lek otutuuk linyọn̄?

¹⁴Ire Awaji iben me ejit, itataba ekwukwu kan̄ mè efuuk kan̄ isan̄a,

¹⁵otutuuk ebilene mêgbaan̄ ikwaan̄ isan̄a mgbọ yaage, ogwu ebilene mônenikana mfuun̄.

¹⁶“Jobu, ire okaan̄ ngobo-ntet, nọ ikọ keyi; gban̄ ikọ nkitumu.

¹⁷Ìre ogwu ìkakima inu ònenen, môkọt ikpulu mkpulu ni? Sà ìre owu môtip Awaji, ogwu ata irọrọ ogwu òkaan̄ unye, oyerebet ni?

¹⁸Ọmọ okibe ebi ubọọn̄, ‘Enyi kpekup me lek inu geege,’ mè òbe ebi ilile, ‘Enyi ìre ebi ikpak.’

¹⁹Ọmọ ìkakilibi chieen̄ ebi ibot mkpulu, ìkakima ebi ubọọn̄ ìgak ebi ugbọọn̄, mije, ema otutuuk ìre ubọk ikwaan̄ kan̄.

²⁰Ebi ene ekikwaan̄ me ekakpọge chieen̄, me ejit eririeen̄; Awaji isisisik ema, ugwem kiban̄ îra iraka; ikerere ebi ilile, ìkisasan̄a isan̄a, ire, ìkare me ubọk ebilene.

²¹“Mije, chieen̄ kan̄ ìkikpọkpọ oniin̄ ugwem ene; ọmọ ìkimumun̄ otutuuk akpat ukot ije kan̄ geelek.

²²Kpunu ekpuk udun geege, kpunu si ufieejit mkpa, ere ebi ìkirọ inu ikpak ebekọt ilet lek.

²³Mije, Awaji ìkposọkọ ofifi inu me lek ogwu ebilene, igak ene isisi ikeke me isi Awaji, inyi isibi oyerebet inyi ọmọ.

²⁴Ìkikpukpuku ebi ilile igwook, me ikadoge ikọ geege, mè òbene ebi ofifi ife otoon̄ me irek kiban̄.

²⁵Me atikọ, îriọọn̄ inu ema ekirọ; eya orọ, me eririeen̄, îra isan̄a ema me irek kiban̄ itọọn̄ igwook.

²⁶Ìkisulu ema osusut mije inu ikpak kiban̄, me ere otutuuk ene ekimun̄ ema.

²⁷Mije, ema mînan̄a itele ọmọ, kpeyaka ikisa otutuuk oniin̄ kan̄ igwen inu geege.

²⁸Ema mîtutuku ebi ugbọọn̄ ire lek ukpo ebiba etaan̄be orebe isi kan̄, ọmọ onọnọ ukpo ebi una ubọk.

²⁹Ire, ire ìkasasan̄a amọn, ìre ekene obofieek ọmọ ikọ? Ire ilet isi kan̄, ekene obokọt imun̄ ọmọ? Ire, ọmọ okikpọ chieen̄ me lek ebilene melek ido,

³⁰inyi ogwu ikariọọn̄ge Awaji ikakpulu, inyi ikatap ufe ìtet ebi ene.

³¹“Ìre îkaan̄ ogwu òtutumu inyi Awaji ibe, ‘Nra ibọkọ osusut, m̀kpayaka ikpọk irọ ijo inu ofifi.

³²Jeen̄ emi ijo inu echi nrọbe, ire, ǹkakọt imun̄; ire nrọ inu òlọlọ, m̀kpayaka irọ ikeya ofifi.’

³³Ìre òbe Awaji inikpe owu mkpukpe ubọk ejit kwun̄ otọbe ni, me mgbọ owu ojitbe igwugwu ikom me ijo inu? Owu obotumu ifieek, ìkare emi; eya orọ, tumu eyi oriọọn̄be.

³⁴“Enyi ebi ìkigobo inu itet, ìkpa-nu ìnyi emi, enyi ebirieen̄ ìriọọn̄ inu, ebi ìnọnọ ikọ n̄a, ìtumu ìnyi emi-nu ibe,

³⁵‘Jobu ìkitumu inu ikariọọn̄ge; ikọ kan̄ ìkakaan̄ ngobo-ntet.’

³⁶Kè m̀ma ibe enin̄ emen oyerebet kè Jobu ewọlọ ere okputut, mije, ìkifọọk otu kubọk ebi ikpak!

³⁷Îrọ ijo inu, mè ikinye ibot igbaalek, mè ikup me etete kiji ikibele ejit me lek ijo inu kan̄, mè ikitumu ogbogbo ikọ itoon̄ Awaji.”