Read obolo Jobu 35 Bible Online

Jobu 35 - obolo bible

Jobu 35

¹Eliyu okekifọọk si otu ibe,

²“Eyi owu okibe, ‘Ubọk n̄a ìtatana me isi Awaji’, ìre òkikeek ibe ke eya înen ni?

³Owu odo Awaji ibe, ‘Kpasi nnwọn ke ijo inu n̄a oborọ inyi owu? Kpasi oruru ke emi nkaan̄ me nkarọge ijo inu?’

⁴“Mâfọọk owu otu, mè ifọọk si ebi une kwun̄ ìkup melek kwun̄.

⁵Bene-nu chieen̄ me akpa isinyọn̄, inyi òmun̄; riọọn̄ ubọk kpọ-nu oduku inyọn̄ cha òbebene ichep me inyọn̄ ibot kwun̄.

⁶Ire orọ ijo inu, eyi owa ogbaan̄ Awaji me lek? Ire ijo kwun̄ iwa, ìre eya ìborọ ọmọ keke me lek?

⁷Ire owu ore ogwu ata irọrọ, keke ke onyi ọmọ? Sà ìre keke ke îbọkọ owu me ubọk?

⁸Inu ikpak kwun̄ ìkikeme ebilene kubọk kwun̄; ata irọrọ kwun̄ ìkinwọn inyi bọn ebilene.

⁹“Tukutuku isilobo igak ene, mîra itaan̄ ukpo; etaan̄ ukpo iweek ntap-ubọk, inyi enwọnọ me emen ubọk ebi unye.

¹⁰Ire, kpunu ogwu òkido ibe, ‘Mọmọ Awaji Ogwu Òrom emi, ogwu òkirọ inyi ekekọt okwa me eririeen̄,

¹¹ogwu òkijeen̄ eji inu iwa igak ubọk îkijeen̄ ebi kè anam oron, mè ikirọ eji eriọọn̄ inu egak ebi kè unọn òwulu me inyọn̄?’

¹²Ema isikitaan̄ ukpo, Awaji ìkakibọkọ otu, mije ubenelek kiban̄ melek inu ikpak kiban̄.

¹³Me atikọ, Awaji ìkpogban̄ ukpo ikike kiban̄; Ogwu Òkaan̄ Unye Geelek ìkakisa ukpo kiban̄ ìgwen inu geege.

¹⁴Ire ire ikeya, ìre ọmọ môsa owu igwen inu ni, mgbọ owu obe ke òkamun̄ ọmọ, ke ikọ kwun̄ ìkup me isi kan̄, ke owu môkup ikikpọ ọmọ?

¹⁵Ògak ge, mgbọ keyi, owu òbe ke unaan̄-ejit Awaji ìkayaka ìkirọ ene inu geege, ke ìkakikpọkpọ si chieen̄ me lek inu ikpak mgbọ geege.

¹⁶Eya orọ, Jobu ìkichili otu ibook itumu ikọ ikike; mè ikitumu ogbogbo ikọ ikakaan̄ge iriọọn̄-inu.”