Read obolo Jobu 36 Bible Online

Jobu 36 - obolo bible

Jobu 36

¹Eliyu okekitumu ikọ kan̄ si ibe:

²“Ìkat ejit ìnyi emi sọntiik mgbọ, ke mâjeen̄ enyi ibe ke owuwa ikọ òwa itutumu me ibot Awaji.

³Mârọ mè ebi ene me ere òjọjọn̄ọ ere eriọọn̄ ifuk-ibot n̄a; mâjeen̄ ibe ke Òrom n̄a ìre ogwu òkirọ unen.

⁴Me atikọ, ikọ n̄a ìkare ataak; ogwu òkaan̄ ifuk-ibot òjot òjot okup yi melek kwun̄.

⁵“Kpọ, Awaji ìre ogwu unye, ire, ìkakikpọ ene ìsiki chieen̄; ọmọ îmin me unye-lek melek ngobo-ntet.

⁶Ìkakisun̄ ebi ikpak me ugwem, ire, ìkinyinyi ebi ekitutuku unen kiban̄.

⁷Ìkakisan̄a chieen̄ me lek ebi ata irọrọ; ìkitoto ema me inyọn̄ ogboon̄ melek ebi ubọọn̄, mè òbene ema, inyi ekebọkọ umin, ire mgbọ geelek.

⁸Ire, ire isa mkpọn ibọp ene ikam, mè isa ufialek ibọp ema ikam kubọk olik,

⁹Awaji ìkikpa inu ema erọbe ilọ inyi ema, ibe ke ema erọ ijo inu cha me ugumulek.

¹⁰Ìkichili ema utọn̄, inyi ema ebọkọ ikan̄-inu, mè ikinyi ema ida ibe egwu ekom me ijo inu.

¹¹Ire ema igban̄, mè ikitọbọ ebum inyi Awaji, usen ugwem kiban̄ ìbore nnwọn-isi nnwọn-isi ire òta, acha ugwem kiban̄ ìbore utop utop isi ire òta.

¹²Ire, ire ema kpegban̄, ugwem kiban̄ môraka, ema mêkwakwaan̄ mkpa me una ifuk-ibot.

¹³“Ebi kperiọọn̄ Awaji ekitet unaan̄-ejit ikaan̄, Awaji isibọp ema ito, kpekitaan̄ ukpo iweek ntap-ubọk.

¹⁴Ema ekikwaan̄ mkpa me nsek, me etete ebi òje oyet isi yọk.

¹⁵Awaji ìkisa ukwook ebi ukwook ekimun̄ isan̄a ema isibi me emen ukwook kiban̄, mè ikisa ufialek itumu ikọ itap ema me utọn̄.

¹⁶“Me atikọ, Awaji ìbọkọ owu isibi me ubọk uyọrọlek, mè isun̄ owu me utelelek, inyi okakaan̄ saasaak, mè irọ ibe ata inorie ijot inyọn̄ ikasi inorie kwun̄.

¹⁷Ire, mgbọ keyi, oyerebet ebi ikpak ekikaan̄ ke owu okaan̄ òjot òjot, oyerebet îtip owu, unen oyerebet ke efieek inyi owu.

¹⁸Gwọk chieen̄, inyi ene geege ikasa inu ubọọn̄ ìleke owu; kachieek ibe owuwa ikpoko udun̄ ida owu isan̄a.

¹⁹Ìre inu ubọọn̄ kwun̄,[7] mè ìyaka ire unye efuuk kwun̄, môrọ ibe ukwook ikatet owu ni?

²⁰Kaweek ibe eririeen̄ inu, mgbọ ebi ife geelek ekijibi inan̄a itele irek kiban̄.

²¹Gwọk chieen̄, da isi san̄a me lek ijo inu, ukwook okibọkọ ìje me lek keya.”

²²“Kpọ, unye Awaji îmin enenen. Ekene ogwu ijejeen̄ obet lek kan̄?

²³Ekene môkọt ijeen̄ Awaji inu îborọ? Sà ìre ekene môbe ọmọ, ‘Owu orọ inu ilọ?’

²⁴Kawuuk itọtọn̄ Awaji me lek inu îrọbe, echi ebilene ekikọt me lek okwa.

²⁵Otutuuk ebilene mîmun̄ lek, ene geelek ìkikup me ujọn̄ọ ere ikpọ.

²⁶Kpọ, Awaji îmin enenen, eji kperiọọn̄ ikeke îminbe ire; kpebekọkọt si iweek otu ifuk acha kan̄ iriọọn̄.

²⁷“Ọmọ okitaba nseen̄ nseen̄ mun̄ ifo inyọn̄, mè irọ oruk nseen̄ nseen̄ mun̄ ya ikana ibot.

²⁸Ọmọ okirọ ibot inan̄a me emen oduku inyọn̄ irep owuwa owuwa igwook me lek ebilene.

²⁹Me atikọ, ìre ekene obokọt iriọọn̄ ubọk oduku inyọn̄ okiyiyala ikana isinyọn̄, mè ubọk isinyọn̄ okisook me akpabin inyọn̄ ere Awaji olukbe?

³⁰Kpọ, ìkirọ omumen inyọn̄ imumen ikana ọmọ, mè itoon̄ ire ijọn̄ me ugwuuk okwaan̄.

³¹Echichi ke îkisa ibọọk ebi ene, mè ikisa inyi ema inorie owuwa owuwa.

³²Ìkitatap omumen inyọn̄ ijot ubọk kan̄, mè ikitọ ibe isi isook inu geelek îsabe ito okukọọk inyi.

³³Isinyọn̄ isisook, eya ìkijeen̄ ibe ke egwijo òkinu, ebi kè eriembuuk si mîkirọ inyi eriọọn̄ ibe ke egwijo îre ijọn̄.