Read obolo Jobu 37 Bible Online

Jobu 37 - obolo bible

Jobu 37

¹“Nsikikeek inu chi, ejit îra ikifieek emi, ejit n̄a îra ikiwulu inan̄a me akpat.

²Ìgban̄! Ìgban̄-nu ubọk ida Awaji okigbugbut kubọk isinyọn̄, ìgban̄ ubọk îkinunuun̄ me otu kan̄ isibi.

³Awaji ìkiria omumen inyọn̄ ibe ikikebe iso otutuuk akpa isinyọn̄, mè ikimumen itoon̄ ire ntutun̄ ere geelek me linyọn̄.

⁴Ida kan̄ îra ikigbugbut igọọk; ọmọ îra ikisook ida unye unye. Otutuuk mgbọ ida kan̄ okinunuun̄ ije, inyọn̄ ìkimumumen igọọk.

⁵Ida Awaji ìkiseme me uyeke uyeke oniin̄; Awaji okirọ ikpele inu echi eji kpekikọt igobo itet.

⁶Ọmọ okibe ibot awo, ‘Rọn̄ọ gwook me ijọn̄,’ mè òbe nseen̄ nseen̄ ibot, ‘Rep kana uga ibot.’

⁷Ìkirọ ikeyi isa ikirọ inyi ebilene etet ubọk ekaan̄, mè ekayaka ìsi ikwaan̄, inyi otutuuk ene eriọọn̄ ubọk ikwaan̄ kan̄.

⁸Ebi kè anam oron mîra ililiin̄ inin̄ okpot, mè ibia me udọn̄ kiban̄.

⁹Egwijo ìkinan̄a me ere îkikup me agan̄ osiki isibi inu, sà utọọk okinan̄a me emen unye efet agan̄ inyọn̄ inu.

¹⁰Awaji isifuuk efuuk, mun̄ îra ibot ikana mun̄ ewuuk, èdọ mun̄ ile îra inye ikup akakam akakam.

¹¹Ọmọ okitap ibot ilobo me emen oduku inyọn̄, mè ikiyat omumen inyọn̄ ikana emen oduku inyọn̄ cha.

¹²Sa me ida kan̄, ema mîra ikigba iyak ikana otutuuk ere geelek me linyọn̄, ikirọ inu geelek îtọbe ibe ema erọ.

¹³Awaji ìkisa ema isulu ene osusut, mè osa ònoreke ijọn̄, mè osa òjeen̄ ene nnwọn kan̄.

¹⁴“Jobu, gban̄ eyi nu; tet kaan̄-nu, mè keek-nu uyeke inu Awaji orọbe.

¹⁵Ìre oriọọn̄ ubọk Awaji okitọ ikọ inyi oduku inyọn̄, mè ikirọ omumen inyọn̄ kan̄ ikikebe ni?

¹⁶Ìre oriọọn̄ ubọk oduku inyọn̄ osabe ikite me isinyọn̄, òrere uyeke inu Ogwu Òrọriọọn̄ Inu Isan̄a orọbe?

¹⁷Owu ogwu uyok ofọnti obokilet efuuk, mgbọ efet agan̄ osiki okiwut ere ikup kpùk me linyọn̄,

¹⁸ìre owu môkọt igọọk ọmọ iyat akpabin inyọn̄ iwele, mè irọ ibe inye kubọk umọọn̄ esabe alata itọkọ?

¹⁹“Jeen̄ eji inu eji mêtumube inyi Awaji ma, mije, eji kpebekọt ineen̄ ikọ kiji, bak me lek ibot kiji ìre ukpọk ukpọk.

²⁰Ìre mêtumu inyi Awaji ibe ke mweek itutumu ikọ melek kan̄ ni? Ire ene itumu ikọ, me atikọ, Awaji ìbokpakpan̄ ene ya.

²¹Kpunu ogwu òbokọt ikpọ ura mgbọ efet isiwut oduku inyọn̄ isan̄a me lek, inyi iriọọn̄ ubọk ikitoon̄.

²²Awaji òkinan̄a me agan̄ inyọn̄ ikinu òrirọ òrirọ kubọk alata araran̄; umin ubọọn̄ kan̄ îgwook ene mbiribọ me lek.

²³Ogwu Òkaan̄ Unye Geelek, eji kpebekọt ire lek kan̄, unye kan̄ îmin ibene isaba iraka; me unen oyerebet kan̄ melek ikpele ata irọrọ kan̄, ọmọ ìkakitutuku ene.

²⁴Eya orọ, ebilene ekitetet ukpook me lek kan̄; ebi ìkimọnọ ibe ema mîriọọn̄ inu, ìkakinyi ema isi.”