Read obolo Jobu 38 Bible Online

Jobu 38 - obolo bible

Jobu 38

¹Okumugwem onenikup me emen egwijo ifọọk Jobu otu ibe:

²“Ìre ekene ire ogwu, ogwu òkisa ikọ ikakaan̄ge ifuk-ibot ikitap udun ichit otitọt n̄a?

³Tobo ekpuk ekwut kwun̄ nye me ebon kubọk enerieen̄; inyi ǹdo owu ikọ, mè owu òfọọk emi.

⁴“Ìre owu òkup me ere owa mgbọ ntọbọbe ọdọ linyọn̄? Tumu nyi emi nu, ire ogobo itet.

⁵Ìre ekene otap okike linyọn̄? Me atikọ, owu oriọọn̄ ma! Ìre ekene otaba olik me mgbọ ekitọ okike linyọn̄?

⁶Ìre etọbọ ọdọ linyọn̄ itoon̄ me inyọn̄ keke? Sà ìre ekene orieen̄ ewuuk ibot usọk linyọn̄

⁷me mgbọ ebi kè ntoronyan̄ otu ewelegwe ekigbaan̄ ikọt okwa, mè mgbọ ebi osat ekitaan̄ ukpo unwọọn̄?

⁸“Ekene ogwuk afọn̄ ikwek okwaan̄ ibe ikameen̄ ijọn̄, mgbọ îbumbe isibi kubọk gwun̄ obum isibi me akpa gwun̄?

⁹Emi nsa oduku inyọn̄ itap ọmọ kubọk ofọnti, mè isa ekpuk udun ikat ọmọ kubọk ekwut.

¹⁰Emi ntap okike inyi, mè igọbọ afọn̄ ikwek,

¹¹mè itumu inyi ibe, ‘Je yaka me ere keyi, karaka; ere keyi ke ekoon̄ kwun̄ cha òkigumu lek obokifaan̄ igwook.’

¹²“Akarake osibibe inyọn̄, ìre orak itọ ikọ inyi egwe òkiwewele, sà ìre orak ijeen̄ obum egwe irek ikwaan̄ kan̄,

¹³inyi ikibene me ntutun̄ linyọn̄ ikiwele inu, mè isa utoon̄ inililaba ebi ijo ife isibi me ere ema ekilileek?

¹⁴Egwe ìkirọ linyọn̄ isibi ikeke kubọk iman̄ òriọọn̄ egonbe me lek arika; ngwugwat linyọn̄ îra ikisibi ikeke kubọk ngwugwat lek ekwut.

¹⁵Egwe ìkirieen̄ udun̄, òrere utoon̄ ebi ikpak, isan̄a; lek ebi ikpak îra iwọ ibebene ubọk irọ ikpak.

¹⁶“Ìre orak ije ire ere ibot mun̄ emen awaji okigbuk isibi, sà ìre orak ikijijen̄e ije me emen udọk udọk ugwuuk okwaan̄?

¹⁷Ìre mîrak ichili otunchit ekiraka inin̄ ama mkpa ijeen̄ owu? Sà ìre orak imun̄ otunchit ekitibi isi ndudun ere mkpa?

¹⁸Ìre oriọọn̄ ubọk linyọn̄ osabe iwele iyaka? Ire oriọọn̄ otutuuk inu chi, kpa nyi emi-nu.

¹⁹“Mọmọ oniin̄ òkisi ere utoon̄ olukbe? Ìre ere owa ke udun okikup?

²⁰Ìre owu môkọt isa ema isi ere kiban̄? Sà ìre owu môkọt iriọọn̄ oniin̄ uwu kiban̄?

²¹Owu oriọọn̄ ma, mije, me ike mgbọ ya, mîra imaman owu iraka! Acha ugwem kwun̄ îwa enenen!

²²“Ìre orak inin̄ uwu ere ekisun̄ ibot awo, sà ìre orak inin̄ uwu ekisun̄ ibot mgbọlọ,

²³echi nsun̄be iban mgbọ uyọrọlek, iban usen etim mè usen akọn̄?

²⁴Ìre oniin̄ eyi owa okisi ere omumen inyọn̄ okinan̄a ikpọk ichit ere, mè ere efet agan̄ mbum-ura okinan̄a iyiyala iso linyọn̄?

²⁵Ekene obum okolo inyi agbugbuk mun̄ ibot, mè ichili oniin̄ inyi egwijo òje melek omumen inyọn̄ mè nsook-isinyọn̄,

²⁶ibe ikireke ijọn̄ ere ene kpeluk, emen èwê ere ene geege ikakupge?

²⁷Ekene otap mun̄ igak nchat emen èwê ere inu geege ìkakitibi, inyi mbubet igwook ichit?

²⁸Ìre ibot îkaan̄ ute ni? Sà ìre ekene ore nte ke mbat òkirọrọn̄ọ?

²⁹Owot ke ekene ke mun̄ ewuuk okinan̄a isibi? Sà ìre ekene oman senesene mun̄ ewuuk òkinan̄a me akpabin inyọn̄,

³⁰mgbọ mun̄ okinye kubọk ewuuk, mgbọ isi mun̄ okwaan̄ okibot?

³¹“Ìre owu môkọt ikwọọk Nga Ntoronyan̄ igbaan̄ ibọp? Sà ìre owu môkọt ikpọk olik isan̄a me lek Ntoronyan̄ Ubọọn̄?

³²Ìre owu môkọt isan̄a ugbọ ebi kè ntoronyan̄ isibi me mgbọ kiban̄, sà ìre owu môkọt isa Ntoronyan̄ Egbe eyi uga mè echi asasa kan̄ ikije ni?

³³Ìre owu oriọọn̄ ikan òkikpulu inu me akpabin inyọn̄? Ìre owu môkọt irọ ikan cha ikaan̄ unye me ijọn̄?

³⁴“Ìre owu môkọt itaan̄ ukpo itọ ikọ inyi oduku inyọn̄, inyi ibot irep ibọn̄ owu kubọk mun̄ ile?

³⁵Ìre owu môkọt iria ebi kè omumen inyọn̄ isibi, mè eje, mè enebe owu, ‘Kpọ eji ire ebi’?

³⁶Ekene otap iriọọn̄-inu me emen emen ejit ene?[8] Sà ìre ekene otap ngobo-ntet me emen ibot ene?[9]

³⁷Ekene okaan̄ iriọọn̄-inu isasa ifuk otu ifuk oduku inyọn̄? Sà ìre ekene obokọt ida ema me akpabin inyọn̄ igbuku kubọk ugọn̄ mun̄,

³⁸inyi irep, mè irọ mè mfuun̄ inye ikana ibat, mè achiaan̄ òkup okpukpuk okpukpuk igba igọm?

³⁹“Ìre owu okichim anam inyi uman egbe àtat, mè ikinyi ebi bọn inorie erie ejot owot,

⁴⁰mgbọ ema ekituun̄ me emen okpot kiban̄, mè ìre ilileek me m̀bubaka oron ikikpọ anam?

⁴¹Ekene okinyi ùgọọk inorie, mgbọ bọn kan̄ ekitaan̄ ukpo inyi Awaji, mè ikinyinya ikana mije una inorie?”