Read obolo Jobu 39 Bible Online

Jobu 39 - obolo bible

Jobu 39

¹“Ìre owu oriọọn̄ mgbọ ebot oron inyọn̄ ogoon̄ okimaan̄ bọn? Sà ìre okikpọ uman ogaan̄ me mgbọ îkiman gwun̄?

²Ìre owu okifuk onyan̄ ema ekiben bọn me owot? Ìre oriọọn̄ ibot mgbọ ema ekimaan̄ bọn?

³Ema ekisisiki isọọk, mè imaan̄ bọn kiban̄ igwook, ufiak uman kiban̄ îra ita.

⁴Bọn kiban̄ ekikup me oron imiin̄, mè inye lek; ema isitele nga kiban̄, kpekiyaka igwu ikom ika igọọk.

⁵“Ekene okinyi inyinya akpan oron utelelek? Sà ìre ekene okitọn̄ọ ọmọ ito?

⁶Emi nnyi ọmọ emen èwê ibe ire uwu kan̄, mè inyi ọmọ ijọn̄ òkup uchi uchi ibe ire ere nluk kan̄.

⁷Ọmọ ìkichachak okput ekikput me emen ama; ìkakinọ ukpo ogwu òkọp inyinya okitaan̄ mgbọ îkisa ọmọ irọ ikwaan̄.

⁸Ìkijijen̄e ikana inyọn̄ ogoon̄ kubọk ijọn̄ urie kan̄, mè ikiweek njijoon̄ inwan̄ geelek ibotaka.

⁹“Ìre orie eriembuuk oron môchieek irọrọ ikwaan̄ inyi owu? Sà ìre môlaak me uwu anam kwun̄ me eririeen̄ ni?

¹⁰Ìre owu môkọt itobo ọmọ olik me lek isa ibak ijọn̄ uko? Sà ìre môkọt irọ inyi ọmọ itaba okwukwut ikpukpuku achiaan̄ me uko kwun̄ ni?

¹¹Ìre owu môkọt itoon̄ ọmọ ejit me lek mije ikpele unye îkaan̄be? Ìre owu môtele unye ikwaan̄ okaan̄be inyi ọmọ irọ?

¹²Ìre owu môtoon̄ ejit me lek kan̄ ibe ke môbeme akpa kwun̄ inu me uwu, mè inikpulu ititiin̄ me ere igen̄ akpa kwun̄?

¹³“Uwop wukuwuku ìkiwuwum alọm alọm, ire, kpebesa itọ me lek akukọ melek uwop aba mbese me iwuwulu.

¹⁴Wukuwuku ìkito nkwa kan̄ me ijọn̄, mè itele ibe achiaan̄ ijọn̄ ikitet iyok.

¹⁵Ìkakikeek ibe ke ukot inu geelek môkọt ikeme ikpukpuku, ke anam oron môkọt ijak ibak.

¹⁶Ìkirọ inu me lek ebi bọn unye unye, kubọk kperere echi kan̄; ìkakitet ukpook ibe ke ubọk ikwaan̄ kan̄ môchep.

¹⁷Mije, Awaji ìkanyi ọmọ iriọọn̄-inu, ìkacheche si ngobo-ntet ìnyi ọmọ.

¹⁸Ire, isijibi lek ibene ililibi ekot, ìkisasa inyinya mè ogwu òkikọp irọ inu ochak.

¹⁹“Ìre owu onyi inyinya unye îkaan̄be; sà ìre owu otap ọmọ mfu òkakana igwook ọmọ me inyọn̄ ebek?

²⁰Ìre owu orọ inyi ọmọ ikirama iwulu kubọk akaka ituuk, mè ikikwut inwọm me oniin̄ òkigwook ene ukpook me lek?

²¹Unye kan̄ okibele ọmọ ejit, îra isa ukot ikigwak ijọn̄ emen iteke, mè ikiwulu inan̄a isibi isi akọn̄ isi ichichini melek nroon̄ akọn̄.

²²Ìkichachak ukpook me imọm; ìkakifieek owot me lek inu geege; ìkakilibi ìnan̄a me otu oge akọn̄.

²³Akpa oraan̄ ìkitaan̄ wọkọ wọkọ wọkọ me inyọn̄ udun̄ kan̄, otunwa mè òtọbọ okekimumen.

²⁴Mgbọ otita akọn̄ isikitaan̄, ìkakikọt ìkeke; îra isa uran-lek mè unaan̄-ejit igwak ijọn̄ ilibi efuuk efuuk ikinin̄.

²⁵Otita akọn̄ isitataan̄, îra ikibele ejit ikwut inwọm; ìkikup me ujọn̄ọ ere inọ olu akọn̄, mè ida ukpo ebi ibot akọn̄, mè ida okput akọn̄.

²⁶“Ìre sa me iriọọn̄-inu kwun̄ ke mkpukpo okiwulu, mè ikiwele uwop iwulu ifo agan̄ osiki?

²⁷Ìre owu okitọ ikọ inyi igo ibe iwulu ichep me akpabin inyọn̄, mè inama uwu kan̄ me inyọn̄ ogoon̄ òbebene?

²⁸Ìkiluk me inyọn̄ ogoon̄ òbebene, mè òkolaak me ere ya me eririeen̄, inyọn̄ ibot ngigo ogoon̄ òkup kpunukpunukpunu ore ere ikwek-lek kan̄.

²⁹Ìkikup me ere ya imun̄ inu ìbotet isa irọ inorie, chieen̄ kan̄ ìkimọmọọn̄ inorie kan̄ me ujọn̄ọ ere.

³⁰Ere nkwukwu ene okupbe, ere keya ke îkikup; bọn kan̄ ekinwọ eje.”