Read obolo Jobu 4 Bible Online

Jobu 4 - obolo bible

Jobu 4

¹Elifaji ogwu Teman onenibọkọ otu ibe:

²“Ìkpọkpọ iyọt ikọkọt itumu ikọ melek kwun̄, eyi owu okakaan̄ge efuuk geege me emen, mè iyaka iyọt si ikpọkpọ iriaan̄ ere.

³Kpọ, owu ojeen̄ owuwa ene inu, owu orọ owuwa ubọk òwọwọ inye.

⁴Ikọ kwun̄ îbene ebi ìberọrọn̄ igwuun̄; owu orọ owuwa akpatukot òmemem inye.

⁵Ire, mgbọ keyi îrebe owu lek, owu òkayaka ìkat ejit; îtoon̄ owu gbài, lek kwun̄ osisisik.

⁶Ìre ìkare ukpook Awaji okitet ya ore utoon̄-ejit kwun̄? Ìre ìkare ugwem ǹkalọ kwun̄ ya ore ikpọchieen̄ kwun̄?

⁷“Riọọn̄ ubọk keek-nu, ìre ekene ogwu ikariọọn̄ge ijo inu ochep? Ìre îkaan̄ ere ejijakabe ogwu ata ene?

⁸Ubọk emi mmun̄be, ebi ìkibak ijọn̄ itap ijo inu, ekirọkọ ijo inu, ubọk yaage si, ebi ìkiwop ufialek, ekirọkọ si ufialek.

⁹Awaji isifuuk efuuk igwook ema me lek, ema mîra ijijaka, efet ònan̄a me inwọm kan̄ okichep ema isan̄a dìp dìp.

¹⁰Ebi kè egbe àtat mêkọt ikigbin mè ikigọt, ire, ejeek bọn egbe àtat cha îfaan̄ isan̄a.

¹¹Ire egbe àtat ìkamun̄ anam ìchim, ìbokwukwu, bọn uman egbe àtat mîra iyiyala isan̄a.

¹²“Îkaan̄ etip ònunu inyi emi me nlelet, utọn̄ n̄a onwenween̄ lek ikpebe.

¹³Mun̄umun̄ ilaak mmun̄be fukufukufuku me eririeen̄, mgbọ uga ilaak okikeme ene,

¹⁴îtet emi ukpook, mè iran emi lek, mè isisik otutuuk ukwuuk n̄a iso.

¹⁵Ekwukwu ge oraka emi me isi fîọọn̄, inwọọn̄ lek n̄a onanan̄a ikeke.

¹⁶Ọmọ oyayaka ikeke, ire, ǹkarọriọọn̄ ubọk îkupbe. Ogugo inu ge okekeke me isi n̄a; ere okukup yarak, Nneninọ ida ge okitumu ibe:

¹⁷‘Ìre ogwu ebilene môre ogwu ata irọrọ igak Awaji ni? Sà ìre ene môtana igak Ogwu Òrom ọmọ ni?

¹⁸Ire Awaji ìkatoon̄ ebi ikwaan̄ kan̄ ejit me lek, mè ire ifieek ebi osat kan̄ ikọ ibe mîrọ ijo inu,

¹⁹ìre ìbonikukup me lek ebi ìkiluk me uwu ntitaak, ebi ọdọ ugwem kiban̄ okupbe me achiaan̄, ebi ìkup mfufet ikọkọt ikpukpuku iriọk igak mwuwu?

²⁰Ekikpukpukpuku ema iriọk, ibene me ewelegwe ire ikakwun̄; ema mîra ichieen̄ ita ire mgbọ geelek, ene geege ìkakpọ chieen̄.

²¹Isitaba olik uwu ọfọ kiban̄ ikpọk, ema mîra ikwaan̄, kpekaan̄ iriọọn̄-inu.’