Read obolo Jobu 40 Bible Online

Jobu 40 - obolo bible

Jobu 40

¹Okumugwem onenibe Jobu:

²“Ìre ogwu òkigana ere môkọt igbini ikọ melek Ogwu Òkaan̄ Unye Geelek ni? Ogwu òkiwut ifan̄a melek Awaji, ifọọk ma!”

³Jobu onenifọọk Okumugwem ibe:

⁴“Emi misip ma, keke ke mbafọọk owu? Nsa ubọk ichit otu n̄a.

⁵Ntumu, mè ikpọk itumu, ire, m̀kpafọọk otu, m̀kpayaka ije inyi isi.”

⁶Okumugwem onenikup me emen egwijo ikpọk itumu ikọ inyi Jobu ibe:

⁷“Tobo ekwut nye me ebon kubọk enerieen̄; inyi ǹdo owu ikọ, mè owu òfọọk emi.

⁸“Ìre owu môgwak unen oyerebet n̄a? Ìre owu môtip emi oyerebet, inyi òsa me ikeya ònwọn lek kwun̄ ikọ?

⁹Ìre oguga kwun̄ înye kubọk eyi Awaji ni? Sà ìre ida kwun̄ môkọt ikisook kire eyi kan̄?

¹⁰Ire ikeya, sa-nu umin ubọọn̄ mè ulibi bala lek kwun̄, mè sa ujamgbugbo mè òrirọ tap chit lek kwun̄ nu!

¹¹Gbuku-nu uyok uyok unaan̄-ejit kwun̄ gwook; kpọ-nu ebi ubenelek geelek, mè gele ema siki-nu;

¹²kpọ ebi ubenelek geelek, mè da-nu to me ijọn̄, mè jak-nu ebi ikpak kpukpuku me ere kiban̄.

¹³Gbaan̄-nu otutuuk kiban̄ fuun̄ tap me achiaan̄; tap ema mkpọn me ama ekwukwu nu.

¹⁴Osikọt irọ otutuuk inu chi, emi me lek n̄a si mânenitọn̄ owu, mè ichieek ibe ke ubọk ulom kwun̄ môkọt inyan̄a owu.

¹⁵“Kpọ, ke omun̄ mgbugbo anam beyemot,[10] emi nrom ọmọ, mè irom owu; ìkitaka mbubet kubọk eriembuuk.

¹⁶Kpọ-nunu, unye îkaan̄be me igbo edim kan̄, mè unye îkaan̄be me lek ufuk owot kan̄!

¹⁷Edim kan̄ ìnye kubọk uti olik, nlik ukwuuk ebon kan̄, elọlọk ifit.

¹⁸Ukwuuk kan̄ ìnye kubọk ekwe ofok emen, sà ukot kan̄ obet lek okwukwut ukut lek.

¹⁹Ọmọ ore anam òmimin ichit eyi Awaji orombe, ogwu òrorom ọmọ gaalek okikọt iben oge akọn̄ inin̄ ọmọ lek.

²⁰Mbubet îkitaka ìkitibi me inyọn̄ orioon̄, ere ya si ke ebi kè anam oron ekifit ifit.

²¹Ìkilaak me irak uti lotọs, mè ikilet me etete anyiaan̄ me emen nria.

²²Uti lotọs cha okekisa ogugo kiban̄ ilet ọmọ, uti wilo òkup me agba okolo okekikana ọmọ ichit.

²³Mun̄ okwaan̄ ikelilibi inye ukot, ìkakifieek owot; mun̄ okwaan̄ Jodan ikegbugbuku inin̄ otu, ìkakisisik ọmọ lek.

²⁴Ekene obokọt itet ọmọ ichim chieen̄ ibum, mè ìre isa ufe itet igon inwọm itibi?