Read obolo Jobu 41 Bible Online

Jobu 41 - obolo bible

Jobu 41

¹“Ìre owu môkọt isa ukọọk itaba mgbugbo anam ejit okwaan̄,[11] sà ìre môkọt isa olik ibọp alọm kan̄ ikam?

²Ìre owu môkọt itap olik itibi ọmọ inwọm, sà ìre môkọt isa ukọọk ichim uga kan̄ itibi?

³Ìre ọmọ môkpọkpọ ikiriaak owu ibe owu òtele ọmọ ifo? Sà ìre môtumu ikọ ususuk ususuk isa irireek owu ejit ni?

⁴Ìre mônyan̄a ibot melek kwun̄, ibe ọmọ mônin̄ usun̄ inyi owu ire mgbọ geelek ni?

⁵Ìre owu môkọt isa ọmọ ikifit ifit kubọk ofut, sà ìre môkọt itobo ọmọ ito, inyi nsabọn ibaan̄ uwu kwun̄ esa ekechak imọm?

⁶Ìre ogbo ebi mbọm irin̄ mêchieek ewe kan̄ ni? Sà ìre ebi ewe mêbak ọmọ inyam?

⁷Ìre owu môkọt itọọn̄ òtọbọ inwunwan̄ ijot akpa kan̄, sà ìre môkọt isa otunwa itọọn̄ ibot kan̄ itibi?

⁸Si chak ubọk me lek kan̄ kpọ, owu òkpowuuk akọn̄ òbosibi; òkpoyaka ikpọk irọ si ofifi mgbọ!

⁹Ene geelek òkekeek ibe ke ọmọ môkọt itet mgbugbo anam ejit okwaan̄ ya ìkifiaan̄ lek kan̄; ogwu itoon̄ chieen̄ me lek, ibot ejit kan̄ îra iwulu, îra inan̄a irọn̄ me ijọn̄.

¹⁰Kpunu ogwu afa geege òbokat ejit ije inin̄ lek isi isisik. Ire ikeya, ìre ekene obokọt ikeke ida emi?

¹¹Ekene obe ke emi nkaan̄ ọmọ urieek, inu, ke mâkpe. Otutuuk inu geelek òkup me irak isinyọn̄ ìre eyi n̄a.

¹²M̀kpalọlọ itutumu ikọ ofolek ukot mgbugbo anam ejit okwaan̄ ya, mè unye kan̄ mè ubọk lek kan̄ ojaan̄be.

¹³Ekene obokọt inyiaan̄ akpa inyọn̄ kan̄ isan̄a kubọk ekiwọọk ofọnti? Sà ìre ekene obokọt ichim ofọnti akọn̄ akpọk iba kan̄ itibi?

¹⁴Ekene obonye ejit isi ikama uga kan̄, eyi ejeek kan̄ cha òkup nriki nriki ogbanbe ikana.

¹⁵Ikpọk kan̄ cha òbet lek agbọ echi egbaan̄be igọm ikam me onineen̄ me onineen̄, ọmọ ore inu îkisa igugo lek.

¹⁶Ge îriaak me lek ge enenen, efet ìkakitibi agbagba kiban̄.

¹⁷Ema egugugọbọ inye, ge mè ge; mè igba lek kiban̄ ikam, kpebekọt ikama.

¹⁸Mgbugbo anam ejit okwaan̄ isisen esen, utoon̄ îra ikisook isibi; chieen̄ kan̄ îra ikinin̄ kubọk utun otu ewelegwe.

¹⁹Alọm ukan̄ îra ikisibi ọmọ me otu; ntat ukan̄ îra ikiraan̄ isibi.

²⁰Oduku îra ikibumu isibi me inwọm kan̄ kubọk oduku òkisibi me otin̄ òkiriak me lek ukan̄ anyiaan̄.

²¹Efuuk kan̄ îra ikirọ ukan̄ ilomo, alọm ukan̄ îra ikisibi ọmọ me otu.

²²Unye kan̄ ìkup me ebek kan̄, ebi ene ekililibi inan̄a me isi kan̄ mije ukpook.

²³Ufuk kan̄ ìbet lek etọtọkọ igba igọm, ìnyenye, kpunu ijijibi.

²⁴Ejit kan̄ ìnye kubọk ewuuk, ìbet lek ewuuk ikọk-akpa eyi irak.

²⁵Ọmọ isijibi lek ibene, ebi unye ekifefieek owot, isikibọn̄ mun̄, ema mîra ikililim igwu ikom.

²⁶Oge akọn̄ ire lek kan̄, ìkititip; ubọk yaage si ke îkup me lek otunwa mè oraan̄ mè òtọbọ.

²⁷Me lek kan̄, okwukwut ìre nsisip, ekwe ìre njijọ uti.

²⁸Sa oraan̄ sook, ìkabolibi; sa olik-mgbọlọ sook, mgbọlọ cha ìkibet lek mfurufu me lek kan̄.

²⁹Me lek kan̄, m̀gbele ìre okpot akpa; esa otunwa itọbọ, ìkichachak.

³⁰Irak owot kan̄ ìkup nkikek nkikek kubọk bọn okpọkọ ugọn̄, mè ikigwak ibat isibi akpat kubọk okwukwut ibọn̄ akpa.

³¹Irọn̄ me okwaan̄, ugwuuk okwaan̄ îra iriak ifuuk kubọk otin̄ oriak me ukan̄, okwaan̄ îra ikitim kubọk otin̄ aran̄.

³²Akpat mun̄ ere îrọn̄be ìkitatana igọọk ọmọ me udun̄, îra ikikup kubọk okwaan̄ ìtitibi isọọn̄.

³³Kpunu inu geege me linyọn̄ òbet lek kan̄, ọmọ ìre inu erombe eyi ìkakitet ukpook.

³⁴Anam geelek òkibene lek, ìkikpọkpọ chieen̄ isiki; ọmọ ore ogwu ubọọn̄ inyi anam geelek òkibene lek.”