Read obolo Jobu 5 Bible Online

Jobu 5 - obolo bible

Jobu 5

¹“Taan̄ ukpo kpọ-nu, ekene obobọkọ owu otu? Ekene me lek ebi mbuban ke owu obotet lek iriaak me lek?

²Unaan̄-ejit okikpan̄ ogwu tuntun, chieen̄-ile okirọ ogwu mbubut ikwu.

³Emi me lek n̄a mmun̄ ogwu mbubut okitibi ugwun̄-ijọn̄, ire, me ekakpọge chieen̄, mfefieek otu inyi ere îkiluk.

⁴Unyan̄a môjọn̄ọ ere me lek bọn kan̄, ikọ ìkponwọn ema me oyerebet.

⁵Ebi uraafiọọn̄ mêrie inu uko kan̄ isan̄a; ìrere emen ukpak ke inu cha okup, ebeteteen̄; ebi urak ebek mênwe chieen̄ inin̄ lek inu ubọọn̄ kan̄.

⁶Mije, ukwook ìkakifuku ìsibi me emen achiaan̄, ufialek ìkakitibi ìsibi me ijọn̄.

⁷Ire, ike ntat ukan̄ ìkakilọlọ ikpakpam ifo inyọn̄, ikeya si, eman ogwu ebilene inyi ufialek.

⁸Ire more emi, kè mweek-nu Awaji; Awaji ke mato ikọ n̄a me isi.

⁹Ọmọ okirọ ikpele uyeke uyeke inu echi kpêkọtbe iriọọn̄ irak, mè owuwa inu ukechieen̄ echi kpebekọt ifuk otu ifuk.

¹⁰Ọmọ okiria ibot igwook me ijọn̄, mè ikigwook mun̄ me uko.

¹¹Ọmọ okibene ebi ijo irek ifo inyọn̄, mè òbene ebi ìkup me ufieejit òto me ere mêkaan̄be unyan̄a.

¹²Ìkijijaka ekiket ebi ifiọk, inyi ubọk kiban̄ ikakọt ìrọ inu geege.

¹³Ìkitet ebi ìriọọn̄ inu me ifiọk kiban̄, mè ikirọ inyi otitọt ebi ngan ikakaan̄ ibot.

¹⁴Ema mêchichini udun me egwe ikarek, mè ikitutun iweek agan̄ me ejit ikarek kubọk ìre eririeen̄.

¹⁵Awaji ìkinyan̄a ebi una ubọk isibi me otu oge akọn̄ òkup ema me otu, mè ubọk ebi unye.

¹⁶Eya orọ, ebi ugbọọn̄ mîkaan̄ ikpọchieen̄, nlilọ oyerebet ìkayaka ìkaan̄ otu.

¹⁷“Uga ubelejit okup inyi ogwu Awaji okan̄be inu inyi; eya orọ, kakpọ ikan̄-inu Ogwu Òkaan̄ Unye Geelek ìsiki chieen̄.

¹⁸Mije, ọmọ okinyiaan̄ ene lek, ọmọ si okibọp, ọmọ okitap ene unan me lek, ubọk kan̄ si okigwa.

¹⁹Mônyan̄a owu isibi me emen uyọrọlek gweregwen, me emen uyọrọlek jaaba, unan ìkpore owu lek.

²⁰Me emen akan̄, ìkpochieek ibe mkpa ikpan̄ owu, me emen akọn̄, ìkpochieek ibe oge akọn̄ inin̄ owu ebek.

²¹Mênyan̄a owu me otu alọm ebi ìkitoon̄ ene ikọ, owu òkpotet ukpook mgbọ mfufiat isinu.

²²Owu môchak mfufiat mè akọn̄ me imọm, owu òkpotet ukpook me lek ijo anam oron linyọn̄ keyi.

²³Mije, owu melek ewuuk òkup me oron mêkaan̄ inyan̄a-ibot, ebi kè anam oron melek kwun̄ mêkup me esuuk.

²⁴Owu môriọọn̄ ibe ke uwu kwun̄ ìkup me utelelek; onu uwu kwun̄, otutuuk inu ìbososo ifuk, geege ìkpochep.

²⁵Owu môriọọn̄ ibe ke bọn kwun̄ mîwa, ke owot iman kwun̄ ìjojot ere kubọk mbubet òtibi me ijọn̄.

²⁶Owu môkan sabum ònin̄ udọn̄-ufuun̄, kubọk akpa ekifaan̄ mgbọ mgbọ kan̄ osobe.

²⁷“Kpọ, eji mîwọlọ otutuuk inu chi ikpọ, îre atikọ. Eya orọ, gban̄, mè bọkọ tap nyi lek kwun̄.”