Read obolo Jobu 6 Bible Online

Jobu 6 - obolo bible

Jobu 6

¹Jobu onenibọkọ otu ibe:

²“Jei, mebe mîtọ ujaralek n̄a imun̄ ulobo, mè igwook ufialek n̄a geelek me inyọn̄ otitọ ikpọ ike îlobobe ire,

³kpomolọlọ ilolobo igak achiaan̄ òkup me agba awaji. Eya orọ ikọ n̄a okupbe ǹraan̄ ǹraan̄.

⁴Oraan̄ Ogwu Òkaan̄ Unye Geelek înin̄ emi lek, iwot otu oraan̄ cha înin̄ igak emen ekwukwu n̄a; uga ukpook Awaji îgban ikana emi, ikikpọ mgbọ ìbojibi inin̄ emi lek.

⁵Ìre inyinya akpan oron îkisan̄a amọn mgbọ îmun̄be mbubet? Ìre eriembuuk îkitaan̄ ukpo mgbọ egwọbe mbubet inyi?

⁶Ìre mêkọt irie inorie ìbe, ire kpetap uchi me lek? Ìre agan̄ okuket emen nkwa unọn ìkekitop ni?

⁷Inorie kecha ìkakire emi otu, ìkidedek emi ejit.

⁸“Jei, mebe mbọkọ inu nkido, mebe Awaji înyi emi inu nkikpọ chieen̄,

⁹mebe môneme Awaji ikpukpukpuku emi, mè iwuwọk ubọk me lek n̄a, mè icho emi ifiin̄,

¹⁰kè ejit n̄a si osiki, kè emi mbele ejit, ubọk geelek ufiak n̄a ìkakitata, ibe ke ǹkajijit ikọ Ogwu Mbuban.

¹¹“Mọmọ unye nkaan̄be isasa ikup ikikpọ, mọmọ inu mbabak me lek ikikat ejit ikup?

¹²Ìre unye nkaan̄be ìre eyi ewuuk? Ìre anam akpalek n̄a ìre ekwe?

¹³Kpasi unye ke nyaka ikaan̄ isasa inyan̄a lek na? Unyan̄a geelek îjọn̄ọ emi ere me lek.

¹⁴“Îgbe ibe ebi unene ekaan̄ ata ejit me lek ogwu unene kiban̄ òkup me ukwook, ikerere ibe ke ene ya ìkayaka ìkaan̄ ukpook Ogwu Òkaan̄ Unye Geelek me emen kan̄.

¹⁵Ire, ebi ngwan̄ n̄a emin ofiaan̄ me lek kubọk mun̄ emen nria, kubọk òkpuku mun̄ òbabaak ijot,

¹⁶eyi mun̄ ewuuk òkitọtọk onwenebe isi ikup afuk afuk, eyi ibot awo òkitọtọk orọbe inyi ibaak ibene.

¹⁷Ire, isire mgbọ ura, ìkayaka ìkigbuk, mgbọ uyok isinu, îra ichat ita kpai.

¹⁸Ebi ije emen èwê isigwaka itele oniin̄ mije ebek mudim, mîra ichieen̄ ita me emen èwê, mè èkwaan̄ èta.

¹⁹Ebi Teyima ìkije ije me emen èwê mîweek mun̄, ebi Sieba ìkije ije me emen èwê mîkpọ chieen̄ imumun̄ mun̄.

²⁰Ema mîre ere ya, kpemun̄ mun̄, ema efefieek ejit, mije, mîkpọ chieen̄ ibe ke mun̄ òwa.

²¹Ikeya ke enyi ekup me lek n̄a, enyi imumun̄ inu òkup ukpook ukpook, owot ofefieek enyi.

²²Ìre îkaan̄ mgbọ mbe enyi eche inu ge enyi emi? Sà ìre îkaan̄ mgbọ mbe enyi esa inu ubọọn̄ kinyi erie udun̄ me ibot n̄a?

²³Ìre ntumu ibe enyi enyan̄a emi esibi me ubọk ogwu oriara? Sà ìre mbe enyi efaka emi esibi me ubọk ebi ìkitutuku emi?

²⁴“Ìjeen̄ emi ere nrọbe ifieek; ìtumu, ke mâriaan̄ ere ikigban̄.

²⁵Ata ikọ ìkijajat! Ire, ifan̄a kinyi ìsibi keke?

²⁶Ìre enyi ekiweek inenen̄e ikọ ntumube itat, mè imọnọ inu ogwu ikakaan̄ge ikpọchieen̄ otumube kubọk ìre efet ikike?

²⁷Chieen̄ mmun̄be enyi, enyi mêkọt iroon̄ nriroon̄ me ibot gwun̄ kpà-nte, mè itumu ewe inyam unene kinyi.

²⁸“Ire, mgbọ keyi, ìnye lek ìkpọ emi isi nu, ìre mâkan̄ ataak me isi kinyi ni?

²⁹Igele ubọk nu, ikafieek nlilọ oyerebet, ìkpọk ìkeek, mije, ata irọrọ n̄a ìkekeke inye.

³⁰Ìre îkaan̄ ijo ikọ ntumube? Ìre emi m̀kpakọt iriọọn̄ lek ata inu mè ijo inu ni?