Read obolo Jobu 8 Bible Online

Jobu 8 - obolo bible

Jobu 8

¹13 Bilidadi ogwu Suwa onenitap otu ibe:

²“Mgbọ owa ke obotumu ikọ kechi ire? Ikọ otu kwun̄ ìbet lek unye efet egwijo.

³Ìre Awaji îkinwunwunu unen oyerebet? Sà ìre Ogwu Òkaan̄ Unye Geelek îkinwunwunu inu ònenen ni?

⁴Ire bọn kwun̄ irọ ọmọ ilọ, ikeya ke îyaka si ema itap me ubọk ijo inu kiban̄.

⁵Ire, ire owu osa otutuuk ejit kwun̄ iweek Awaji, mè ibeek Ogwu Òkaan̄ Unye Geelek mbeek me ubọk,

⁶ire owu otana, mè inen, ọmọ ìkpolọlọ itọtọbọ ijibi mgbọ yaage bak me lek kwun̄, mè irọ ibe inu ikpọk ije ijaan̄ me uwu kwun̄ me mkpukpe ata irọrọ kwun̄.

⁷Me ibebene, irek kwun̄ ìre sọntiik, ire, me mgburudun̄, ìbomimin enenen.

⁸Do ukot ebi ìraraka cha nu, mè week riọọn̄-nu inu ebi nte nte kiban̄ eweekbe isibi;

⁹mije, eji ebi emanbe iyakwut gaalek, kperiọọn̄ inu geege, ògak ge, usen ugwem kiji me linyọn̄ ìbet lek ogugo.

¹⁰Me atikọ, ema mêjeen̄ owu inu, mè ikpa inu inyi owu; ema mêchili ejit itumu ikọ inyi owu.

¹¹Ìre osùkut môkọt itibi ijọn̄ọ me ere kpunube nria? Sà ìre anyiaan̄ môjaan̄ lek me ere kpunube mun̄ ni?

¹²Mgbọ îkupbe nsek nsek, kpefefieek-nu, ọmọ okidasi ichiaak sabum mbubet geelek.

¹³Ikeya ke îbokup inyi ebi ìwuwuuk Awaji, ikpọchieen̄ ebi burubut ekaan̄be ìbochechep.

¹⁴Inu ema esabe ikat ejit ìkup ǹnyieen̄ ǹnyieen̄, inu esabe itoon̄ ejit ìkup kubọk njin olọnjin.

¹⁵Ema iyaka lek ibieen̄ me lek, ojene; itet ubọk inye me lek, ogbeme.

¹⁶Ìbet lek njijọọn̄ uti ura okigwook me lek, eyi òtitibi agọọk isan ichit emen uko;

¹⁷eyi òtatap ugwun̄-ijọn̄ kan̄ ililọkọ ikana èdọ ewuuk, mè ikaan̄ ebon kan̄ me emen ewuuk.

¹⁸Isijibi ọmọ isan̄a me ere îkupbe, ere ya îra ijit ọmọ, mè ibe, ‘Ǹkararak ìmun̄ owu!’

¹⁹Otutuuk unwọọn̄ eyi uti keya ire eya, ebi kè ofifi uti mêneninan̄a me akpat ijọn̄ ya itibi isibi.

²⁰Kpọ, Awaji ìkakijit ogwu ǹkalọ, ìkakitatap si ubọk ìnyi ebi ikpak.

²¹Môtap imọm ijot owu otu, mè itap ukpo unwọọn̄ ijot owu emen ebek.

²²Esip môchit ebi ochicha kwun̄ lek kubọk ofọnti, mêjijaka uwu ebi ikpak inọọn̄ ijọn̄.”