Read obolo Jobu 9 Bible Online

Jobu 9 - obolo bible

Jobu 9

¹Jobu onenibọkọ otu ibe:

²“Atikọ, nriọọn̄ ibe ìre ikeya. Ire, mọmọ ubọk ogwu ebilene môsabe ire ogwu ata irọrọ me isi Awaji?

³Ogwu iweek iwuwut ifan̄a melek kan̄, ìkpokọt ifọọk geege me lek obop idodo.

⁴Iriọọn̄-inu kan̄ midọk, unye kan̄ mimin. Ìre ekene otọ lek me lek kan̄, mè itele ibeben unan?

⁵Ọmọ okijujuk ebi kè ogoon̄, me ogoon̄ geege ikariọọn̄ge, mè ikitọp ema ikana mgbọ ejit isinaan̄ ọmọ.

⁶Ọmọ okisisik linyọn̄ ijuuk inan̄a me akpat kan̄, mè ikirọ atà cha òbebeme linyọn̄ ikiran.

⁷Ọmọ okitọ ikọ inyi ura, îra ijit ibubum; ọmọ okikwek utoon̄ ebi kè ntoronyan̄, inyi ekatoon̄.

⁸Îre ọmọ gaalek odut akpabin inyọn̄ inyana, mè ikije me inyọn̄ ekoon̄ me okwaan̄.

⁹Îre ọmọ orom Otâ Ntoronyan̄ mè Ntoronyan̄ Ubọọn̄, mè Nga Ntoronyan̄ mè ọgbọn̄ ntoronyan̄ agan̄ osiki.

¹⁰Ọmọ okirọ ikpele uyeke uyeke inu echi kpêkọtbe iriọọn̄ irak, mè owuwa inu ukechieen̄ echi kpebekọt ifuk otu ifuk.

¹¹Ire iniraka emi me agba lek, ǹkabamun̄, ire inije iraka inyi isi, ǹkabariọọn̄.

¹²Ire ikaan̄ inu ìbojọk ibọkọ, ìre ekene obokọt ikwek? Sà ìre ekene obokọt ibe ọmọ, ‘Òkirọ keke?’

¹³Awaji isinaan̄ ejit, înaan̄ isan̄a; ikerere ebi ìtatap ubọk inyi Rayabu, mgbugbo anam ejit okwaan̄ ya, ìjajak imem me irak ukot kan̄.

¹⁴“M̀bajeje ifọọk ọmọ otu? Sà ìre m̀bajeje ikọt igọọk ọmọ iwut ifan̄a ikọ?

¹⁵Ubọk geelek ǹkarọ inu geege ìlọ, m̀kpakọt ifọọk ọmọ otu; inu òkup inyi emi ìre irariaak ọmọ, Ogwu Oyerebet n̄a, ibe irọ emi nsan.

¹⁶Ìrere ǹgwegwen ọmọ, ichechieek emi, ǹkachieek ibe ke môgban̄ utọn̄ me ida n̄a.

¹⁷Môsa egwijo ininyiaan̄ emi akpa, mè irọ unan n̄a iwa isọkọ lek, me nkarọge inu geege ìlọ.

¹⁸Ìkpochechieek emi m̀fuuk efuuk, ire, ìbotatap ufialek igak emi lek.

¹⁹Ire me lek unye, ọmọ ore ogwu unye; ire ibe ìre oyerebet, ekene obogwen emi melek kan̄ isibi oyerebet me ibot?

²⁰Ubọk geelek nrebe ogwu ata irọrọ, otu n̄a obotip emi oyerebet; ubọk geelek ikakaan̄ge inu nlọbe, Awaji môjeen̄ ibe ke emi nrọ ilọ.

²¹Ǹkarọ inu geege ìlọ, ǹkayaka ìsa ugwem n̄a ìgwen inu geege; ugwem îjọ emi ejit iluluk.

²²Otutuuk ìre inu yaage; eya orọ ntumube ibe, ‘Awaji ìkikpakpan̄ ogwu ǹkalọ, mè òkpan̄ si ogwu ikpak.’

²³Osusut isisa mkpa ugeen̄ mgbọ inu, Awaji ìkichachak ufialek òtet ebi kpelọ ikan.

²⁴Isisa linyọn̄ itap me ubọk ebi ikpak, Awaji îra ichit ebi oyerebet chieen̄. Ire ìkare ọmọ okirọ, ìre ekene okirọ ni?

²⁵“Usen ugwem n̄a îlibi igwat ukot igak ogwu ekot, ìkiwuwulu iraka, kpunu unwọọn̄ me emen kiban̄.

²⁶Ema ekiraka yêen̄ kubọk uji osùkut, kubọk igo owulu isiki fiàm iniben anam.

²⁷Ire mbe ke mâwuuk nana-lek n̄a, mè irọ inyi isi n̄a itọn̄ọ, mè ibele ejit,

²⁸ǹkifefieek si owot me lek ufialek n̄a; mije, nriọọn̄ ibe ke owu òkpomọnọ emi kubọk ogwu ǹkalọ.

²⁹Ire ire oyerebet îtip emi, keke orọ mâkitutuku lek n̄a ichep?

³⁰Ikerere ǹsasa mun̄ òtotoon̄ isi igwọk lek n̄a itana, mè isa ìsabi igwọk ubọk n̄a itoon̄,

³¹owu òbotọtọp emi itap me ifin, ire lek, ofọnti n̄a môgọọkbe ilibi emi lek.

³²“Mije, ọmọ ìkare ebilene kubọk emi nrebe, eyi mâkọtbe ikifọọk ọmọ ikọ, eyi eji mêkọtbe igbaan̄ ikeke me oyerebet.

³³Mebe îkaan̄ ogwu nteek òkup me etete kiji, ogwu mokaan̄ unye me lek kiji,

³⁴ogwu monida m̀gbele Awaji isan̄a emi me lek, inyi uga ukpook kan̄ ikayaka ìfieek emi owot,

³⁵kè ntumu ikọ me nkafieekge owot me lek kan̄. Ire, emi nriọọn̄ me lek n̄a ibe ke ìkare ikeya ke îkup.