Read obolo Itọn̄ 10 Bible Online

Itọn̄ 10 - obolo bible

Itọn̄ 10

¹Jei Okumugwem, keke orọ ojọn̄ọbe ere me lek kiji? Ìre owu môlet lek kwun̄ mgbọ eji ekupbe me uyọrọlek ni?

²Ogwu òkpaka ibot inyi Awaji môsa me ugumulek ililaba ebi ugbọọn̄; Awaji môsasa ijo otitọt kan̄ ikana ikwuun̄ ọmọ me ibot.

³Ogwu òkpaka ibot ìkigugo lek ijo inu òkilọk ọmọ irọrọ; ìkitọn̄ ogwu ngan, mè ikitumu ijo ikọ ibak Okumugwem.

⁴Bak me lek ugumulek, ogwu ijo irọrọ ìkakaan̄ nkeek ofolek Okumugwem; ìmọnọ ibe ke Awaji ìkakup ọmọ me uyọt.

⁵Mije inu kan̄ geelek okije ijaan̄, ìmọnọ ibe oyerebet Awaji ìkpore ọmọ lek; ire me lek ebi ochicha kan̄, ìkinwenwe nkwọọk inyi otutuuk kiban̄.

⁶Ìkitumu me ejit kan̄ ibe, “Kpunu inu òbosisik emi; uyọrọlek ìkabomun̄ emi mege inyọn̄ òta.”

⁷Ogbo mè ofiaan̄ mè iririki ene ugwem ìjojot otu kan̄; ijo inu mè iwot okup ọmọ me otu alọm.

⁸Ìkilileek me emen ama ikpan̄ ebi kperọ ilọ; mè ìkije enun̄unun̄ ikikpọ ebi ugbọọn̄.

⁹Ìkituun̄ kubọk egbe àtat me emen udọn̄ kan̄; mè olet òkokpọ ikpekpebe ebi ijo irek; isitet ema me emen ufe kan̄, îra itaba ema ije.

¹⁰Ìkikọkọọk ebi îtetbe ikam, mè òben ema òtọbọ me ijọn̄, mè osa otutuuk unye kan̄ orọn̄ okeme ema.

¹¹Ọmọ ìmọnọ me ejit kan̄ ibe ke Awaji ìkakpọ chieen̄ me lek inu ọmọ orọbe, ke ìyayaka isi isan̄a, ke ìkakaan̄ mgbọ imumun̄ ọmọ mgbọ geege.

¹²Jei Okumugwem, nan̄a keke; bene ubọk sulu ebi ikpak osusut; kawuuk ebi irek kiban̄ osikibe!

¹³Ìre me lek keke ni ke ogwu ikpak okpọ Awaji isiki chieen̄, mè imọnọ me ejit kan̄ ibe ke Awaji ìkaborọ ọmọ inu geege?

¹⁴Owu Awaji omun̄ inu òrọrọ, mije owu òkakisan̄a chieen̄ me lek ebi ekirọ ikeme me ikpak mè ijo unaan̄-ejit; îre owu me lek kwun̄ okitap ada me chieen̄ ebi ochicha kiban̄; ogwu ijo irek ìkitap lek kan̄ me ubọk kwun̄; îre owu okinyan̄a ebi kpà-nte.

¹⁵Faan̄ ukwuuk me lek ebi ìkirọ ikpak mè ebi ijo ife; nyi ema osusut me lek ijo inu ema erọbe, geege ikasik.

¹⁶Okumugwem ore ubọọn̄ ire mgbọ geelek, mgbọ geelek; ebi ido geelek mêkwaan̄ isan̄a me inyọn̄ ijọn̄ kan̄.

¹⁷Jei Okumugwem, owu onọ mbeek ebi una; owu mônọ ito ema ekito, mè irọ ejit kiban̄ inye.

¹⁸Owu môsibi oyerebet inwọn ebi kpà-nte mè ebi ekitutuku; ebi linyọn̄ ikike kpebeyaka ikitap ema ukpook me lek ofifi.