Read obolo Itọn̄ 102 Bible Online

Itọn̄ 102 - obolo bible

Itọn̄ 102

¹Uriaak ogwu ufialek okitet òkinina lek inyi Okumugwem mgbọ ogugo kan̄ owulube. Jei Okumugwem, gban̄ uriaak n̄a, mè nọ ukpo nkitaan̄ ibeek ntap-ubọk.

²Kagba udun̄ ìfit emi mgbọ nkupbe me ufialek; soso, nọ mbeek n̄a, mè nye lek gwat lek fọọk emi otu mgbọ ngwenbe owu.

³Usen ugwem n̄a òkije kubọk oduku ònininiin̄ ichep; otu ukwuuk n̄a òkiyok emi ukan̄ kubọk ototun̄.

⁴Ejit n̄a îmun̄ ufialek, mè ichiaak ita kubọk mbubet ebọn̄be imem; inorie otu ìkayaka ìlọk emi.

⁵Nto mfi mege, mè iwọlọ ikup uti uti.

⁶Ǹnikititeek ikana kubọk edene òkup me emen èwê, kpunu ere ntetbe lek iriaak; ǹkinyinya kubọk ikwurikwu òluk ama òyayat, kpunu ere nletbe lek.

⁷Ilaak ìtata emi me chieen̄ isan̄a kpai, ǹnikup kubọk unọn ibot ge òsọsọọk me inyọn̄ otoon̄-uwu, kpunu ogwu òkat emi ejit.

⁸Ebi ochicha n̄a ekichachak emi ochak eririeen̄ mè ikarek; ebi ìkisa emi ito mbele, ekigbo ene ibe ekup ubọk nkupbe.

⁹Ǹkitaka achiaan̄ kubọk inorie, mè ikimeen̄ mun̄ ito n̄a kubọk mudim,

¹⁰bak me lek onaan̄be ejit, mè ikaan̄ uyok-ejit me lek n̄a, mè ikpana emi itọp ifiin̄.

¹¹Usen ugwem n̄a mônita, kubọk ogugo obochep me otu ikakwun̄, ǹchachiaak ita kubọk mbubet.

¹²Ire, owu Okumugwem, ìre ubọọn̄ ire mgbọ geelek; etip kwun̄ môtaan̄ ire ukot geelek.

¹³Soso, tọbọ jibi, mè kaan̄ njijin me lek ama Sayọn; mgbọ itoto ọmọ nsan îre, mgbọ keyi ore mgbọ òtatat.

¹⁴Ebi ikwaan̄ kwun̄ mîma ọmọ ire lek ewuuk kan̄ egbugbọbe igwook, mè ikaan̄ si njijin me lek achiaan̄ ònan̄a me lek kan̄ igigen̄e igwook me ijọn̄.

¹⁵Ebi ido geelek mênyi erieen̄ Okumugwem ulibi; otutuuk ebi ubọọn̄ geelek me linyọn̄ mêtet si ukpook me lek unye kan̄.

¹⁶Mije Okumugwem môkpọk inama Sayọn; mgbọ ya, ujamgbugbo kan̄ môsibi utoon̄.

¹⁷Ọmọ mônọ uriaak ebi una ubọk, mè irọ mbeek kiban̄ inyi ema.

¹⁸Ìge etip yi ìtap me ikpa ìban ebi ukot òkinunu, ufuna ebi kpemaman-nu mênitọn̄ Okumugwem.

¹⁹Okumugwem îkup me uwu kan̄ me emen inyọn̄ isiki chieen̄ ikpọ; ìkup me emen inyọn̄ iruk chieen̄ ikpọ linyọn̄.

²⁰Ìkiweek inọnọ ito ebi ìkup me mkpọn, mè itọtọn̄ọ ebi ebekpakpan̄ itele.

²¹Ìkiweek ibe ebi ene etumu erieen̄ Okumugwem esibi me Sayọn, mè etọn̄ si ọmọ me Jeruselem,

²²mgbọ ebi owuwa ido mè ama ubọọn̄ mêtitiin̄be inenitọbọ ebum inyi Okumugwem.

²³Owu orọ efuuk ita emi me owot me ugwem n̄a; owu òkpochieek ibe ǹluk usen ugwem n̄a ǹso.

²⁴Jei Awaji, soso, kachieek ibe m̀fan̄a ǹkwu me mgbidim ugwem n̄a; eyi kwun̄, Okumugwem, owu òkikukup nan̄a me ukot re me ukot.

²⁵Akarake akat ke owu otọbọ ọdọ linyọn̄, akpabin inyọn̄ ìre ubọk ikwaan̄ kwun̄.

²⁶Ema mêchieen̄ ita, ire, owu môbia; ema mêjeen̄ ita kubọk njeen̄ ekwut; owu môtọp ema ifiin̄ kubọk ekifiin̄ oka ekwut; ema kpebeyaka ikup.

²⁷Ire, owu òkikup ubọk yaage okupbe; ugwem eyi kwun̄ ìkakaan̄ mgbọ itata.

²⁸Bọn ebi ikwaan̄ kwun̄ mêluk inye me irak mbem eyi kwun̄; bọn bọn kiban̄ si mêluk ikam me isi kwun̄.