Read obolo Itọn̄ 103 Bible Online

Itọn̄ 103 - obolo bible

Itọn̄ 103

¹Okwa kè Debit. Ibot ejit n̄a, tọn̄ Okumugwem; nriro geelek òkup me lek n̄a, ìtọn̄ erieen̄ kan̄ òkup me mbuban!

²Ibot ejit n̄a tọn̄ Okumugwem; kawuuk nnwọn kan̄ geelek.

³Ọmọ îtele otutuuk ijo n̄a, mè igwa orukan̄ n̄a geelek.

⁴Ọmọ onyan̄a emi me ubọk mkpa, mè isa imumechieen̄ kan̄ melek nsan kan̄ igwuk ikana emi.

⁵Ọmọ onyi emi ata inu geelek òkilọk emi; eya orọ nkisek, mè inye lek kubọk igo.

⁶Okumugwem îsibi unen oyerebet inyi ebi ekitutuku, mè inyi ema unen kiban̄ geelek.

⁷Îchili nkeek kan̄ ijeen̄ Mosis, mè irọ ebi Ijeren emun̄ ikwaan̄ unye ọmọ osibe.

⁸Okumugwem îjot me atata nnwọn, mè ikaan̄ ejit nsan; ìkakigwat lek ìnaan̄ ejit; imumechieen̄ kan̄ òkikup ire mgbọ geelek ìre òjot òjot.

⁹Ìkakifieek ene ikọ otutuuk mgbọ; ìkakiben unaan̄-ejit me ejit ìre mgbọ geelek.

¹⁰Ìkakinyi eji osusut òkekem me lek ijo inu kiji; ìkakikpe si eji mkpukpe òsoso nlilọ inu kiji.

¹¹Ike akpabin inyọn̄ obenebe inan̄a ijọn̄ọ ere me ijọn̄ ire, ikeya ke imumechieen̄ kan̄ me lek ebi ìkimin ọmọ omin ire.

¹²Ike agan̄ mbum-ura ojọn̄ọbe ere inan̄a me agan̄ ichep-ura ire, ikeya ke îben nrọ-nlọ kiji ijọn̄ọ ere isan̄a eji me lek ire.

¹³Ike ute okikaan̄ ejit nsan me lek ebi bọn, ikeya ke Okumugwem okikaan̄ ejit nsan me lek ebi ìkimin ọmọ;

¹⁴mije, ọmọ îriọọn̄ ubọk ọmọ orombe eji, ìkawuuk ibe ke eji ìre ntitaak ijọn̄ ikike.

¹⁵Ire eji ebilene, ugwem kiji ìbet lek mbubet; eji ekitibi mè ejaan̄ lek kubọk ajakajak òkup me oron.

¹⁶Efet isiwut igwook me lek, îra ichiaak, mè ogen̄ òta; chieen̄ ene ìkayaka ìrieen̄ me lek ofifi.

¹⁷Ire, bene me mgbọ geelek si re mgbọ geelek, imumechieen̄ Okumugwem ìkikukup me lek ebi ìkimin ọmọ; nnwọn kan̄ ìkire lek bọn bọn;

¹⁸ìkire lek bọn bọn ebi ìkitet inyan̄a-ibot kan̄ inye, mè ikisun̄ ikan kan̄.

¹⁹Okumugwem îyik ogboon̄ ubọọn̄ kan̄ me emen inyọn̄; ọmọ ore ubọọn̄ me ibot mkpulu geelek.

²⁰Ìtọn̄ Okumugwem, enyi ebi osat kan̄; enyi ebi unye ìkirọ otu ikọ kan̄, mè ikigban̄ utọn̄ me ida ikọ kan̄.

²¹Ìtọn̄ ọmọ, enyi ebi urum akọn̄ emen inyọn̄, ebi ikwaan̄ kan̄ ìkirọ inu îweekbe.

²²Ìtọn̄ Okumugwem enyi inu geelek îrombe; enyi ebi ìkup me ere geelek ọmọ okikpulu. Ibot ejit n̄a, tọn̄ Okumugwem!