Read obolo Itọn̄ 104 Bible Online

Itọn̄ 104 - obolo bible

Itọn̄ 104

¹Ibot ejit n̄a, tọn̄ Okumugwem! Jei Okumugwem Awaji n̄a, owu omin enenen; owu osa òrirọ mè umin ubọọn̄ iwele ichit lek kwun̄ kubọk ekwut.

²Owu osa utoon̄ ibala lek kubọk ofọnti, mè iyat akpabin inyọn̄ iwele isaak kubọk uwat-ura.

³Owu onama ere olukbe me inyọn̄ isi mun̄ òkup me akpabin inyọn̄; oduku inyọn̄ ke osa ikikọp lek kwun̄ ije kubọk uji, mè ikisa efet irọ uwop ikọp lek kwun̄ ikana.

⁴Owu òsa efet irọ ebi osat kwun̄, mè isa omumen-inyọn̄ isun̄ ebi ikwaan̄ kwun̄.

⁵Owu òtọtọbọ ọdọ eyi linyọn̄ inye, ìkpokọt isisik mege ire mgbọ ikakaan̄ge itata.

⁶Mgbọ obenebe inu irom, owu osa mun̄ iwele ichit linyọn̄ kubọk òtap ọmọ ofọnti; mun̄ ya omemeen̄ ebi kè ogoon̄.

⁷Ire, mgbọ owu oganabe ere inyi mun̄, ililibi; mgbọ osookbe ida kubọk isinyọn̄ inyi, iteteen̄ ekot ikaan̄,

⁸mè igbọọk me inyọn̄ ogoon̄ igwook me emen iteke, ere osun̄be inyi ọmọ.

⁹Owu onyi ọmọ okike ere ìboje iyaka; ere ya ke ìbokeke, ìkposaba iraka; ìkpoyaka ikpọk ibaak ichit linyọn̄ ofifi.

¹⁰Owu orọ ibe ogbuuruk igbuk mun̄ igwook me emen iteke ijọn̄, okwaan̄ okekigbuk itibi agbagba ogoon̄.

¹¹Ebi kè anam oron ekakaan̄ mun̄ inwọ; ebi kè inyinya akpan echi oron eneninwọ isiki ebek.

¹²Unọn òwulu me inyọn̄ ìnama uwu me agba mun̄ cha, mè ikup me inyọn̄ uti me ere ya ikikọt okwa.

¹³Owu okiria ibot me akpabin inyọn̄ igwook me inyọn̄ ogoon̄; ugbana kwun̄ îra ikijot linyọn̄.

¹⁴Owu orọ ibe mbubet itibi inyi ebi kè anam etaka; mè irọ uti ewowop itibi inyi ebilene esa erọ ikwaan̄, ufuna inorie inan̄a me ijọn̄ isibi.

¹⁵Ikeyi si ke miin̄ isasa irọ ejit ene ikibele osibi, mè aran̄ isasa irọ isi ene ikitoon̄, mè inorie isasa itap ene efuuk me emen.

¹⁶Okumugwem ìkigbagbala chieen̄ ikpọ uti kan̄, uti olik echi îwopbe igwook me oron Lebanọn.

¹⁷Ere ya ke ebi kè unọn ekinama uwu kiban̄, mè ebi kè aba mbese èkeluk me inyọn̄ uti alaga inwan̄.

¹⁸Inyọn̄ ogoon̄ òbebene ìkup inyi ebi kè ebot oron iluluk; sà agbagba ikpele ewuuk cha okup inyi ikpi emen ewuuk ilelet lek.

¹⁹Owu orom onyan̄ ibe ire inu isasa ikifuk ibot mgbọ; ura îriọọn̄ mgbọ ọmọ okinim.

²⁰Owu okisa udun inu, îra inikana eririeen̄, mgbọ ebi kè anam oron geelek ekisibi ibọm urie.

²¹Mgbọ ya ke bọn egbe àtat ekigbin ikana igọọk anam ema mêchimbe; ema ekinya ikana ikiweek inorie me ubọk Awaji.

²²Ura isibum, ema mîra igwu ikom ifon emen okpot kiban̄, isi itọbọ ifi.

²³Mgbọ ya, ebilene mîra ikisibi ije isi ikwaan̄ kiban̄, mè isi ikirọ nninaan̄ kiban̄ mege ire ikakwun̄.

²⁴Jei Okumugwem, ikwaan̄ kwun̄ îwa enenen; iriọọn̄-inu ke osa irọ ema otutuuk; inu owu orombe ìjojot linyọn̄.

²⁵Emen awaji ọmọ òwa, îmin mgbugbo ile, mè iwele isaak; inu owu orombe ìjojot emen, ìkakaan̄ otu ifuk; echi ikpele ikpele ọmọ òwa; echi asasa si ọmọ òwa.

²⁶Îre emen awaji ke uji ile okije; emen kan̄ si ke mgbugbo anam ejit okwaan̄, eyi owu orombe ito, ibe ikifit ikana, oluk.

²⁷Otutuuk kiban̄ ekikpọ owu chieen̄ ibe owu ònyi ema inorie mgbọ îlọkbe ema.

²⁸Owu osinyi ema, ema mîra irie; owu osichili ubọk inyi ema, ata inu îra ijot ema owot.

²⁹Owu osigba udun̄ ifit ema, ema mîra ikiran; owu osibọkọ ema efuuk kiban̄, ema mîra ikwaan̄ mkpa, mè ikana ntitaak ijọn̄ eyi ema erebe.

³⁰Owu oria Ekwukwu kwun̄ inu, mè isa me ikeya irom ema; owu orọ inu geelek me linyọn̄ ikana ayaya.

³¹Kè umin Okumugwem ikup ire mgbọ geelek; kè Okumugwem ikaan̄ ubelejit me lek inu îrombe!

³²Ọmọ isikọọn̄ chieen̄ ikpọ linyọn̄, linyọn̄ îra isisik; ọmọ isichak ubọk me lek ogoon̄, ogoon̄ îra ibumu oduku.

³³Mâkọt okwa inyi Okumugwem otutuuk ugwem n̄a; mâkọt itọn̄ inyi Awaji n̄a mgbọ geelek mâlukbe ugwem ire.

³⁴Kè inu chi nkikeek ibak ọmọ itop ọmọ me lek; mije, ǹkibele ejit me emen Okumugwem.

³⁵Kè ejijaka ebi ijo esan̄a kpai me linyọn̄, mè ebi òkpaka ibot etata enọọn̄. Ibot ejit n̄a tọn̄ Okumugwem! Ìtọn̄ Okumugwem!