Read obolo Itọn̄ 105 Bible Online

Itọn̄ 105 - obolo bible

Itọn̄ 105

¹Ìbe Okumugwem onirọ; ìtumu erieen̄ kan̄ ìsibi; ìkpa inu îrọbe ìkana ido geelek.

²Ìkọt okwa ìnyi ọmọ; ìkọt okwa ìtọn̄ ọmọ, ìkpa otutuuk uyeke ikwaan̄ kan̄ ìsibi.

³Ìsa erieen̄ kan̄ òkup me mbuban ìgugo lek; ebi geelek ìkiriaak ọmọ, ìbele ejit.

⁴Ìweek Okumugwem, mè ìweek si unye kan̄; ìkiweek ntap-ubọk kan̄ mgbọ geelek.

⁵Ìkeek uyeke uyeke inu cha îrọbe, inu ukechieen̄ kan̄ cha îrọbe, mè ata oyerebet cha îfieekbe,

⁶jei, bọn owot iman kè Ebereyam ogwu ikwaan̄ kan̄, enyi bọn kè Jekọp, ebi îgobobe inyi lek kan̄!

⁷Ọmọ ore Okumugwem Awaji kiji; ikan kan̄ okikpulu me otutuuk linyọn̄.

⁸Ìkikekeek inyan̄a-ibot înyan̄abe ire mgbọ geelek; use îchieekbe ìkikukup ire obop ukot;

⁹òrere inyan̄a-ibot înyan̄abe melek Ebereyam; mè use kan̄ îchieekbe Ajiki.

¹⁰Îrọ use ya inye inyi Jekọp kubọk ikan kan̄, mè irọ inye inyi ebi Ijeren kubọk inyan̄a-ibot òbokup ire mgbọ geelek.

¹¹Mgbọ ya ke îtumu ibe, “Mâsa ijọn̄ Kenan inyi owu; môre ìrot inyi bọn owot iman kwun̄.”

¹²Me ike mgbọ ya, ema ìre ene inen me inen gaalek; kpewawa me otu ifuk; mè ire si ebi ichen me ijọn̄ Kenan ya.

¹³Ema ekijijijen̄e ikana ere inan̄a mè ido ire me ido, mè inan̄a me ama ubọọn̄ ge ire ofifi.

¹⁴Ire, Awaji ìkachieek ibe ene geege itutuku ema; ìkigagana ikọ inyi ebi ubọọn̄ me ibot kiban̄ ibe:

¹⁵“Ikalululuk ìchak ubọk me lek ebi ngobobe inyi lek n̄a; ikasasak si ebi nriran n̄a unan geege me lek!”

¹⁶Okumugwem îtap akan̄ me ido Kenan, mè ichit otu oniin̄ inorie kiban̄.

¹⁷Ire, ufuna ọmọ inyan̄a ebi eyi kan̄, iraria ene ge ogwu òdadasi ije; ene ya ìre Josefu, ogwu enyambe kire usun̄.

¹⁸Mîgon ọmọ mkpọn me ukot, ukot kan̄ obebeek, mè ikwaan̄ ọmọ mkpọn okwukwut me ebek,

¹⁹mege, inu ya ọmọ obe ke môrọ, orọrọ si; ikọ Okumugwem orọrọ inye ibe ke Josefu îtumu atikọ.

²⁰Ogwu ubọọn̄ oraria ibe etọn̄ọ ọmọ eto; ogwu òkikpulu owuwa ido osasan̄a ọmọ me mkpọn isibi,

²¹mè isa ọmọ ito me ibot mkpulu kan̄, mè irọ ọmọ ogwu òkitọ ikọ me lek inu geelek ogwu ubọọn̄ okaan̄be.

²²Ikeya si, îyaka ebi ibot ikwaan̄ mkpulu itap me irak kan̄ ibe inyi nteme ubọk òneme ọmọ, mè ibe ijeen̄ ebi nteme ogwu ubọọn̄ iriọọn̄-inu.

²³Mgbọ ya ke Jekọp, ogwu ekigwen si Ijeren, onigọọk iluk me Ijipiti òrere ido kè Am, mè ikana ogwu ichen me ido ya.

²⁴Okumugwem orọrọ ebi kan̄ emumana enenen, mè ekaan̄ unye egak ebi ochicha kiban̄.

²⁵Îrọ si ebi Ijipiti echa ebi kan̄, mè eketọt ijo otitọt ebak ema.

²⁶Mgbọ ya ke îria Mosis ogwu ikwaan̄ kan̄, melek Erọn ogwu îgobobe, ibe esi Ijipiti.

²⁷Ema mîrọ ikwaan̄ ukpook, mè uyeke inu Awaji obe ema erọ me ido kè Am, òrere Ijipiti.

²⁸Bak me lek Mosis mè Erọn kpekpaka ikọ kan̄, Awaji oraria udun itap me otutuuk ido ya.

²⁹Îrọ okwaan̄ kiban̄ ìkana eje, mè ikpan̄ irin̄ kiban̄ isan̄a kpai.

³⁰Àkwọọk oninin̄ ijot ido kiban̄ gbak, mè inin̄ ire emen agwut ogwu ubọọn̄ kiban̄.

³¹Awaji onyinyi ida, ijo nson mè ijo atantan ejijibi akpa akpa inin̄ ijot otutuuk ido kiban̄.

³²Kpan̄asi ata ibot, iraria ibot mgbọlọ mè omumen-inyọn̄ iso otutuuk lek ijọn̄ kiban̄.

³³Îjijaka si uko gerep kiban̄ mè uti figi kiban̄ isan̄a kpai, mè igbugbọ otutuuk uti òkup me inyọn̄ ijọn̄ kiban̄ igwook.

³⁴Înyi ida, ebi kè akaka ituuk ekariọọn̄ge otu ifuk enunu, mè bọn kiban̄ me ego me ego,

³⁵mè initaka otutuuk mbubet mè njijoon̄ inwan̄ mè inu geelek ewopbe me uko me ido ya ikpan̄ isan̄a kpai.

³⁶Îkpan̄ adasi gwun̄ enerieen̄ geelek me ido kiban̄, adasi mfut ema ekaan̄be mgbọ nsabọn irieen̄ kiban̄.

³⁷Mgburudun̄, Awaji okpukpulu ebi Ijeren isibi me ido ya; ema ekwọkwọọk alata araran̄ mè alata okuket isa igbaalek ifon; kpunu orukan̄ me lek ene geege kiban̄; otu ukwuuk kiban̄ ìnyenye.

³⁸Mgbọ ema efonbe, ebi Ijipiti mîbele ejit, mije, ukpook kiban̄ îgwook ebi Ijipiti mgbugba me lek enenen.

³⁹Awaji osasa oduku inyọn̄ iwele ikwek ebi kan̄ lek, mè inyi ukan̄ òkinyi ema utoon̄ me eririeen̄.

⁴⁰Ema mîdo Awaji anam itataka, iraria ekun̄kun̄ ijet ema, mè inyi ema fituru ònan̄a me isinyọn̄, ema ererie ijot.

⁴¹Îsulu ewuuk ibum, mun̄ ogbugbuku me emen isibi, mè ikigbọọk me emen èwê kubọk okwaan̄.

⁴²Mije Awaji ìkawuuk use kan̄; use mbuban ya îchieekbe Ebereyam ogwu ikwaan̄ kan̄.

⁴³Ikeya ke îkpulu ebi eyi kan̄ me unwọọn̄ isibi; ema ebi îgobobe esasa me ubelejit inan̄a isibi.

⁴⁴Îsa ijọn̄ ebi ofifi ido inyi ema, mè inyi ema uko ebi ofifi ife ekwookbe ukwook me lek irọ isan̄a, ema ebọbọkọ isak.

⁴⁵Ìrọ ikeya ufuna ebi eyi kan̄ mêsun̄ ikan kan̄, mè irọ otutuuk inu îtọbe ibe ema erọ. Ìtọn̄ Okumugwem!