Read obolo Itọn̄ 106 Bible Online

Itọn̄ 106 - obolo bible

Itọn̄ 106

¹Ìtọn̄ Okumugwem; ìbe Okumugwem onirọ, mije ke ọmọ înwọn; mije, imumechieen̄ kan̄ ìkikukup ire mgbọ geelek.

²Ekene obokọt ikpa otutuuk ikpele inu ọmọ orọbe isan̄a? Ekene obokọt itọn̄ ọmọ ubọk îgbebe?

³Kpọ-nu ikpele ubelejit òkup inyi ebi ìkirọ inu ònenen, mè ikirọ inu òtatat mgbọ geelek. 13

⁴Jei Okumugwem, keek emi mgbọ okirọ ata inu inyi ebi eyi kwun̄; mgbọ owu mônyan̄abe ema, nyan̄a emi si gbaalek,

⁵ufuna m̀mun̄ inu okije ijaan̄ me lek ebi eyi kwun̄, mè ǹkaan̄ uche me lek unwọọn̄ ebi ido kwun̄, mè ǹgọọk ebi owu okaan̄be ǹgugo lek.

⁶Eji mîrọ ijo inu kubọk ebi nte nte kiji erọbe; eji mîrọ inu òfefieek lek, me atikọ, eji mîrọ inu ikpak ikpak.

⁷Ebi nte nte kiji kpekọt itet ibot me lek uyeke ikwaan̄ owu orọbe me Ijipiti; ema mîwuuk òjot òjot imumechieen̄ okaan̄be me lek kiban̄; ema mîkpaka ibot inyi owu me okwaan̄ Anyiaan̄.

⁸Ire, owu onyanyan̄a ema mije erieen̄ kwun̄, isa ijeen̄ ebi ene ibe ke owu okaan̄ ikpele unye.

⁹Owu ogana ere inyi okwaan̄ Anyiaan̄, okwaan̄ ochachiaak, owu osasa ebi kwun̄ ije itibi ejit okwaan̄ me nchat ijọn̄, kubọk ìre emen èwê.

¹⁰Ikeya ke owu onyan̄a ema isibi me ubọk ebi oriara kiban̄, mè itaba ema isan̄a me irak unye ebi ochicha kiban̄.

¹¹Ire, mun̄ orerie ebi ochicha kiban̄ isan̄a kpai; ene geege ikeyi me lek kiban̄ ìkasik.

¹²Mgbọ ya ke ebi eyi kwun̄ enichieek ikọ kwun̄, mè ikọt okwa itọn̄ owu.

¹³Ire, ìkafifiin̄ mgbọ, ema ewuwuuk inu owu orọbe inyi ema; kpekukup ikpọ ibe owu ònyi ema nteme kwun̄.

¹⁴Ebek inorie îkwat ema me emen èwê, ema etọtọ owu Awaji ikpọ me ere ya òkup wêem.

¹⁵Owu onyinyi ema inu ema edobe; ire, owu oraria si ijo orukan̄ itap me etete kiban̄.

¹⁶Me emen ere m̀gba-ǹgwele ukan̄ kiban̄ me emen èwê, ema enenimin ejit me lek kè Mosis mè Erọn, ebi owu Okumugwem ogobobe isun̄ esese inyi lek kwun̄.

¹⁷Ijọn̄ ochichili otu ibook, mè imen Datan ichep, mè ikana si Abiram mè ebi ogbo kiban̄ ichit bùk.

¹⁸Ukan̄ oseseme me lek ebi melek kiban̄; alọm ukan̄ otataka ebi òkpaka ibot cha iriọk.

¹⁹Me Orebu, ema mîsa alata araran̄ ibot gwun̄ orie eriembuuk, mè itọbọ ebum inyi inu ebobot ya.

²⁰Ema mîyaka umin kwun̄ isa inyi inu ema ebotbe; inu òbet lek eriembuuk òkitaka mbubet.

²¹Ema mîwuuk owu Awaji ogwu ònyanyan̄a ema; ogwu òkwọkwọkọ ebi Ijipiti ijeek me ibot.

²²Mîwuuk osusut osutbe ebi ido kè Am, mè uyeke inu echi orọbe me okwaan̄ Anyiaan̄.

²³Eya orọ, owu Awaji onenibe ke owu môjijaka ema isan̄a kpai; ire, Mosis, gwun̄ ikwaan̄ kwun̄ ogobobe, okekeke ikiteek nteek, mè irọ ibe owu òyaka unaan̄-ejit kwun̄ òbojijaka ema ya òto.

²⁴Mgbọ eya orakabe, ema ejijit ata ijọn̄ ya òkilọlọk ene ebek, bak me lek ema kpechieek me lek use owu ochieekbe ema.

²⁵Ire, ema ekukup me emen uwu ọfọ kiban̄ ikinunuun̄, mè ijit inọnọ ikọ kwun̄ Okumugwem.

²⁶Eya ke owu obene ubọk inyan̄a ibot ibe ke ema mêkwaan̄ ita me emen èwê;

²⁷ke owu môchon bọn kiban̄ igwook me ido geelek, mè iyiyala ema ikana ofifi agan̄ geelek.

²⁸Ofifi si, ebi kwun̄ mîtap lek igọọk ikitọbọ ebum inyi Baali ebi Peyọ, mè ikirie inu ngwugwa egwabe inyi ebi ìkwakwaan̄.

²⁹Irọrọ kiban̄ oriribi owu unaan̄-ejit; ijo orukan̄ obubumu me etete kiban̄.

³⁰Ire, Fineyas onanan̄a ikeke, mè isulu ene osusut isasa iteek; ijo orukan̄ ya osisibi.

³¹Eya ke esa ifuk ọmọ ibe ìre ogwu ata irọrọ, me ukot me ukot ire mgbọ geelek.

³²Me ogbuuruk Meriba, ema mîrọ ejit inaan̄ owu Okumugwem; bak me lek keya, Mosis oninin̄ me uyọrọlek.

³³Mije ema eyọọkbe Mosis owot enenen; Mosis osasa me unaan̄-ejit itumu ikọ ilọ.

³⁴Owu Okumugwem otọ ibe ema ekpan̄ ebi ido ìluk me ijọn̄ ya esan̄a, ire, ema ejijit ikpakpan̄ ife cha isan̄a ubọk otọbe.

³⁵Kpan̄asi ikeya, ema egbagbaan̄ ifufuku melek ife cha, mè ikween̄ orọmijọn̄ ife cha ikigọọk irọ.

³⁶Ema mîtọbọ ebum inyi mkpọmfaka ife cha; eya onenikana ufe inyi ema.

³⁷Ema mîsa bọn ebirieen̄ kiban̄ mè bọn ebibaan̄ kiban̄ igwa ngwugwa inyi ijo erumun̄.

³⁸Sa me ikeyi, ema efafiat eje ebi kpelọ inu geege; eje bọn ebirieen̄ kiban̄ mè bọn ebibaan̄ kiban̄, ebi ema esabe igwa ngwugwa inyi mkpọmfaka ebi Kenan; eje nsabọn cha ochachaka mbuban me lek ijọn̄ ya.

³⁹Bak me lek inu ya ema erọbe, ema kpeyaka itana, mije, ema kpekeke isi me lek kwun̄, Awaji.

⁴⁰Owu Okumugwem oneninaan̄ ejit ikeme ebi kwun̄, mè ijọ ejit me lek ebi owu ogobobe inyi lek kwun̄ me ìrot.

⁴¹Owu ojijit ema itele inyi ebi ofifi ido; ema eninin̄ me irak mkpulu ebi ìchacha ema.

⁴²Ebi ochicha kiban̄ etututuku ema, mè ikeme ema isiki me irak unye kiban̄.

⁴³Owu Okumugwem okinyan̄a ema owuwa mgbọ; ire, ema etọtọt otu, mè ikpaka ibot inyi owu; ijo irọrọ kiban̄ okekikeme ema, mè irọ inyi ema ekabene isi.

⁴⁴Ubọk geelek si, owu onọnọ ida ito kiban̄, mè ikpọ chieen̄ me lek ukwook kiban̄.

⁴⁵Owu okeek inyan̄a-ibot kwun̄, mè ito ema njijin mije ikpele imumechieen̄ kwun̄ òkikup ire mgbọ geelek.

⁴⁶Owu orọrọ mè otutuuk ebi ìkpukpulu ema me usun̄ akọn̄ ekaan̄ ema ejit nsan me lek.

⁴⁷Nyan̄a eji, jei Okumugwem Awaji kiji, mè titen̄e eji me ido geelek sa ka ido kiji, inyi eji ebe owu onirọ, mè etọn̄ erieen̄ mbuban kwun̄, mè esa owu egugo lek.

⁴⁸Itọn̄ ikup inyi Okumugwem, Awaji ebi Ijeren, bene me mgbọ geelek si re mgbọ geelek. Kè otutuuk ebi ene etumu ebe, “Ikup ikeya!” Ìtọn̄ Okumugwem!