Read obolo Itọn̄ 107 Bible Online

Itọn̄ 107 - obolo bible

Itọn̄ 107

¹Ìbe Okumugwem onirọ, mije, ọmọ înwọn; mije imumechieen̄ kan̄ ìkukup ire mgbọ geelek.

²Enyi ebi Okumugwem onyan̄abe isibi, ìtumu ikeya ìtọn̄ ọmọ; ọmọ înyan̄a enyi isibi me ubọk ebi ìkitutuku enyi,

³mè iteen̄ enyi me ido ikarege echi kinyi isa ika; îteen̄ enyi me agan̄ inyọn̄, mè osiki, mè mbum-ura, mè ichep-ura, isa ika.

⁴Usini ene mînyinya ikana emen èwê, ere kpunube oniin̄ geege; kpekọt imun̄ ama geege ere ema mêlukbe.

⁵Uraafiọọn̄ îtaka ema; ebek îrak ema; ogugo îsibi ita ema me lek.

⁶Me emen uyọrọlek, ema etataan̄ ukpo igwen Okumugwem; inyanyan̄a ema isibi me ukwook kiban̄.

⁷Awaji îsa ema ije me oniin̄ òtatat, mè isa ema ifo ama ere ema mêlukbe.

⁸Tele ema etọn̄ Okumugwem bak me lek imumechieen̄ mgbọ geelek kan̄, mè bak me lek ikwaan̄ ukechieen̄ cha îrọbe inyi ebilene.

⁹Ọmọ înyi ebi ebek orakbe mudim enwọ, mè inyi ebi uraafiọọn̄ ata inorie erie.

¹⁰Usini ene ekup me emen udun mè uga ufieejit; ema ìre ebi mkpọn ìkimun̄ ofaak, melek mkpọn me ukot mè ubọk,

¹¹mije ema mîje ikeme Ikan Awaji, Ogwu Òbebene Ichit, mè ikpọ chieen̄ ilọ me lek nteme kan̄.

¹²Eya ke îsa unye ikwaan̄ ekinyi ebi usun̄ isulu ema osusut; ema erururọn̄ọ me ijọn̄; kpunu ogwu òtatap ubọk ibene ema igwuun̄.

¹³Ema enenitaan̄ ukpo igwen Okumugwem; inyanyan̄a ema me ubọk ebi ìkitutuku ema cha.

¹⁴Îsan̄a ema isibi me udun mè uga ufieejit, mè ifaan̄ mkpọn esabe igoon̄ ema.

¹⁵Tele ema etọn̄ Okumugwem bak me lek imumechieen̄ mgbọ geelek kan̄, mè bak me lek ikwaan̄ ukechieen̄ cha îkirọ inyi ebilene.

¹⁶Mije, ọmọ îgbugbọ otunchit cha esabe ekwe inama isa igwuk ikwek ema, mè ifaan̄ okwukwut cha esabe igoon̄ otunchit cha.

¹⁷Ebi burubut mîkpaka ibot inyi Awaji, mè irọ ijo inu; Awaji onyinyi ema ufialek.

¹⁸Inorie geelek ojọjọ ema ejit; mkpa orere ema chieen̄.

¹⁹Ema etataan̄ ukpo igwen Okumugwem me emen ujaralek kiban̄; inyanyan̄a ema isibi me emen ujaralek kiban̄.

²⁰Îtumu ikọ inyi ema; lek kiban̄ onyenye; isusun̄ ema me ògat ugwem.

²¹Tele ema etọn̄ Okumugwem bak me lek imumechieen̄ mgbọ geelek kan̄, mè bak me lek ikwaan̄ ukechieen̄ îkirọ inyi ebilene.

²²Tele ema egwa ngwugwa onirọ enyi ọmọ, mè ekọt okwa unwọọn̄ esa ekpa inu îrọbe.

²³Ebi ìkinin̄ uji ile isibi emen awaji; ema ìre ikpele ebi ewe ìkikọp me ejit okwaan̄ ikirọ mbubek kiban̄.

²⁴Ife chi mîkimun̄ inu Okumugwem okirọ; ikwaan̄ ukpook îkisi me ugwuuk okwaan̄.

²⁵Ọmọ isinyi ida, uga efet egwijo îra ibene, mè otap ogbururu òchit okwaan̄.

²⁶Ekoon̄ îra ibene uji ile ichep me inyọn̄ tọi, mè òyaka ogele osiki odọk òchep gbọ̀k; ibot ejit kiban̄ îra iwulu itele ema mije gbologbolo isi mun̄.

²⁷Ema mîra ikije gbegbegbe mè lọlọlọ kubọk ebi miin̄ osabe; ifuk-ibot geelek ema ekaan̄be isa ikikọp okwaan̄ îra ita itele ema.

²⁸Ema mîra ikup me uyọrọlek kiban̄ itaan̄ ukpo igwen Okumugwem; îra inyan̄a ema isibi me emen ukwook kiban̄.

²⁹Okumugwem ìkirọ egwijo iwọ, mè orọ ekoon̄ ilaak, inyi isi mun̄ okwaan̄ ilọkọ.

³⁰Ejit îra ibele ema, mije okwaan̄ osikibe; Awaji îra ibem ema mege isi itoon̄ me atasuk ama ema eweekbe itotoon̄.

³¹Tele ema etọn̄ Okumugwem bak me lek imumechieen̄ mgbọ geelek kan̄, mè bak me lek ikwaan̄ ukechieen̄ îkirọ inyi ebilene.

³²Tele ema etumu umin kan̄ esibi me emen ntitiin̄ ebi eyi kan̄, mè etọn̄ ọmọ me ere ebi ugane ama etitiin̄be.

³³Okumugwem îrọ ibe okwaan̄ ikana èwê, mè irọ okwaan̄ òkigbugbuk ikana ijọn̄ òchachat.

³⁴Ijọn̄ òkisibi mfut îkana ijọn̄ uchi uchi, bak me lek inu ikpak ebi ìluk me lek ijọn̄ ya erọbe.

³⁵Îrọ èwê ikana èdọ mun̄, mè irọ ijọn̄ òchachat ikana ogbuuruk òkigbuk mun̄ isibi,

³⁶mè isa ebi uraafiọọn̄ inu inigwook me ere ya ibe eluk; ema echichili ama me ere ya iluk.

³⁷Ema ewowop uko me ere ya, mè iwop si gerep, mè irọkọ mfut owuwa owuwa.

³⁸Awaji îgbana si ema; ema emumumana enenen; ìkachieek ibe urum eriembuuk kiban̄ ise.

³⁹Ire, ike mgbọ ema ebenebe ikise me otu ifuk, kpeyaka ikọt ibene isi bak me lek tukutuku mè ùrioon̄, mè ufieejit,

⁴⁰Okumugwem orọrọ ebi ilile kiban̄ cha inu ochak, mè irọ inyi ema enyinya ekana emen èwê; ere kpunube oniin̄ geege ijeje.

⁴¹Ire, itataba ebi eyi kan̄, ebi una, isibi me ufialek, mè irọ ema emaan̄ bọn me ototun̄ ukan̄ kiban̄, kubọk arọọn̄ mè eriembuuk ekimaan̄.

⁴²Ebi ata irọrọ emumun̄ inu chi, mè ibele ejit; ire, otu ebi ìkirọ ikpak ochichit bùk.

⁴³Ene geelek òkakaan̄ iriọọn̄-inu, itet ibot me lek inu chi, mè ikeek ikpele imumechieen̄ Okumugwem okaan̄be mgbọ geelek.