Read obolo Itọn̄ 108 Bible Online

Itọn̄ 108 - obolo bible

Itọn̄ 108

¹Okwa. Okwa kè Debit. Jei Awaji, mbieen̄ ejit inye me lek kwun̄; mâkọt okwa isa itọn̄ owu me otutuuk ibot ejit n̄a.

²Uneen̄ ile n̄a mè uneen̄ ija n̄a, ìnan̄a ìkeke! Mânan̄a ikeke ikwak uneen̄ sabum egwe ònowele.

³Jei Okumugwem, mâbe owu onirọ me isi ebi ido geelek; mâkọt okwa itọn̄ owu me etete ebi ido geelek,

⁴mije imumechieen̄ okaan̄be mgbọ geelek me lek kiji îmin ire akpabin inyọn̄; ikeya si ke atikọ kwun̄ obene ichak me isinyọn̄.

⁵Jei Awaji, kè ebilene emin owu esaba eraka akpabin inyọn̄; kè etọn̄ ujamgbugbo kwun̄ ekana eso otutuuk linyọn̄.

⁶Sa unye kwun̄ nyan̄a eji sibi; nọ uriaak n̄a, inyi owu ònyan̄a eji ebi owu omun̄be me chieen̄.

⁷Awaji ìkup me Uwu Mbuban kan̄ itumu ibe, “Ntim ikpan̄ ebi Sekem mè ebi Sukot; mâche ama Sekem, mè idọmọ iteke ijọn̄ Sukot inyi ebi n̄a.

⁸Ijọn̄ Giliadi ìre eyi n̄a; ijọn̄ ebi Manasi si ìre eyi n̄a; ebi Iferem ebekire ebi akọn̄ n̄a; sà Juda ore uwu ere ogwu ubọọn̄ ngobobe obonan̄a isibi.

⁹Ebi Mowabu ebekisi ikwaan̄ inyi emi; ebi Edọm ebekire usun̄ inyi emi; ire ebi Filisia, m̀batitim ikpan̄ ema, mè ikitaan̄ ukpo iwulu òkô.”

¹⁰Ìre ekene obosa emi isi akọn̄ me Edọm? Ìre ekene obosa emi isi, inyi ǹsi ǹtim m̀kpan̄ Edọm, unye ama ya mgban okanabe?

¹¹Jei Awaji, ìre òjijit eji itele ni? Ìre owu òkpofat igọọk urum akọn̄ kiji isibi isi akọn̄ ni?

¹²Tap ubọk nyi eji me lek ogwu ochicha kiji, mije, ntap-ubọk ogwu ebilene okitap ìre inu ikike.

¹³Eyi Awaji okekeke me agan̄ kiji, eji mêtim ikpan̄ ikpele ikpele, mije, ọmọ môjak ibot ebi ochicha kiji ikpukpuku.