Read obolo Itọn̄ 109 Bible Online

Itọn̄ 109 - obolo bible

Itọn̄ 109

¹Ìkup inyi ogwu òjeen̄ okwa. Okwa kè Debit. Jei Awaji, ogwu nkitọn̄, kakpọkpọ ìriaan̄ emi ìkup koon̄!

²Ebi òkpaka ibot mè ebi ataak mîyaka otu igwook emi me lek; ema ekikan̄ ataak itoon̄ emi.

³Ema ekisa me ochicha chieen̄ ikilo emi ikana ere okokop; ema ekitim emi akọn̄ me lek me kpunube inu geege nrọbe ilọ.

⁴Ubọk geelek mmun̄be ema me chieen̄, mè ikiriaak uriaak me ibot kiban̄, ema ekichacha emi.

⁵Ema esa ijo inu ikpe emi me lek ata inu nrọbe ema, mè isa ochicha ikpe emi me useen̄ imumechieen̄ n̄a.

⁶Jei Awaji, gobo ogwu nnaan̄ to, inyi isibi oyerebet me ibot ogwu ochicha n̄a; rọ inyi ene ge me lek ebi ochicha kan̄ itoon̄ ọmọ ikọ môtipbe ọmọ oyerebet.

⁷Mgbọ ekisibi oyerebet me ibot kan̄, rọ ibe oyerebet itip ọmọ; mgbọ ọmọ môkiriaak ibe, “Soso,” rọ ibe emọnọ uriaak kan̄ kubọk ìre ijo inu.

⁸Kè ugwem kan̄ ire mgbidim; kè ofifi ene ibọkọ irek ikwaan̄ kan̄!

⁹Kè bọn kan̄ ekana bọn kpà-nte, mè nwa kan̄ si ikana nwakpa!

¹⁰Kè bọn kan̄ ekejijen̄e ekana ebeek inu, mè ekesi erọọn̄ inorie me inyọn̄ otiton.

¹¹Kè ebi îkaan̄be urieek efum otutuuk inu îkaan̄be esan̄a, mè ebi ichen ekpulu inu îkwukwulube ikaan̄ esa efon.

¹²Kè ene geege ikarọrọ ọmọ nsan; ene geege ikatoto si bọn îkwube itele njijin.

¹³Kè bọn owot iman kan̄ ekwaan̄ eta; mè erieen̄ kan̄ ichep, ikakup ìraka ukot òbogọọk.

¹⁴Okumugwem, kawuuk ijo inu ebi nte nte kan̄ erọbe; katele si ijo inu echi nga kan̄ orọbe.

¹⁵Kè ijo inu kiban̄ ikanan̄a owu me ejit; inyi owu òrọ ibe ewuuk ema esan̄a isi ge me linyọn̄;

¹⁶mije, ọmọ ìkirọ nnaan̄ enenen, mè òkorọ ikpak me lek ebi ugbọọn̄, mè ebi una, mè òkokpan̄ ebi ijo irek.

¹⁷Ọmọ ìkima igbogbo ene, ogbo si okup inyi ọmọ; ọmọ ìchacha igbagbana ene, ugbana si ìlilibi ọmọ lek.

¹⁸Ogbo ìkakinan̄a me otu kan̄, kubọk ofọnti ìkakinan̄a me akpalek kan̄; eya orọ, kè ogbo imimini inin̄ ọmọ lek kubọk mun̄, mè ije inin̄ ọmọ otu ukwuuk kubọk aran̄.

¹⁹Kè esa ogbo kan̄ ewele echit ọmọ lek kubọk ekwut, mè esa ekana ọmọ ebọp mgbọ geelek kubọk fanti.

²⁰Okumugwem, soso, echicha ore osusut mbe owu òsut ebi ochicha n̄a; ikeya ke emi mweek ibe owu òrọ ebi ìkitumu ijo ikọ ibak emi.

²¹Ire, Okumugwem Awaji n̄a, tap ubọk nyi emi mije erieen̄ kwun̄, mè nyan̄a emi bak me lek nnwọn okirọ mije imumechieen̄ okaan̄be.

²²Emi ìre ogwu ugbọọn̄ mè ogwu una; ejit îfieek emi ire lek ekpọọk.

²³Ugwem n̄a òkire lek itata, kubọk ogugo obochep me otu ikakwun̄; egegen̄ emi ifiin̄ kubọk ekigen̄ akaka ituuk me lek inwan̄.

²⁴Akpatukot îwọ emi bak me lek ijijin otu; lek îtak emi ita.

²⁵Nkana inu ochak inyi ebi ene; ema isimun̄ emi, mîra ikisisik ibot.

²⁶Jei Okumugwem, Awaji n̄a, tap ubọk nyi emi; nyan̄a emi, mije imumechieen̄ okikaan̄ mgbọ geelek.

²⁷Jei Okumugwem, rọ mè ebi ochicha n̄a eriọọn̄ ibe ke îre owu onyan̄a emi; rọ inyi ema emun̄ ubọk ikwaan̄ kwun̄ me lek n̄a.

²⁸Eya orọ, ema isikigbo emi, owu môkigbana emi; ema isinu emi etim me lek, owu môrọ ema esip; ire, emi ogwu ikwaan̄ kwun̄ mâkibele ejit.

²⁹Rọ esip ichit isi ebi ochicha n̄a kubọk ìre ofọnti ke ema etap; sa esip kat ema lek kana kubọk ekwut.

³⁰Mâsa otu n̄a ibe Okumugwem onirọ ikpele ikpele; mâtọn̄ ọmọ me emen ntitiin̄ ebi eyi kan̄,

³¹mije, îkeke ogwu una me udun̄, mè inyan̄a ọmọ me ubọk ebi ìtitip ọmọ oyerebet mkpa.