Read obolo Itọn̄ 115 Bible Online

Itọn̄ 115 - obolo bible

Itọn̄ 115

¹Jei Okumugwem, erieen̄ kwun̄ gaalek ke otutuuk itọn̄ okup inyi; ìkare eji, in̄-in̄, ìkare eji kubọk ge; owu gaalek ke itọn̄ okup inyi, mije, owu okimun̄ ene me chieen̄ mgbọ geelek, mè igbe ogwu etoon̄be ejit me lek.

²Ebi ofifi ido ebejeje ikido eji otu ibe, “Mgbọ, Awaji kiban̄ ya ìkup me owa?”

³Awaji kiji ìkup me emen inyọn̄; inu òneme ọmọ ke îkirọ.

⁴Eyi kiban̄, mkpọmfaka kiban̄ ìre alata okuket mè alata araran̄; ebilene ikike esa ubọk irom.

⁵Mkpọmfaka chi mîkaan̄ otu, ire, kpekikọt itumu ikọ; mîkaan̄ chieen̄, ire, kpekikọt imọọn̄ inu.

⁶Mîkaan̄ utọn̄, ire, kpekikọt inọ ikọ; mîkaan̄ inwọm, ire, kpekikọt inọ olu inu.

⁷Ema mîkaan̄ ubọk, ire, kpekikọt isa itet inu geege; mîkaan̄ ukot, ire, kpekikọt isa ije ije; emen ebek kiban̄ si ìkakisan̄a amọn kubọk ge.

⁸Ebi ìkirom mkpọmfaka chi ebet lek mkpọmfaka kiban̄; ikeya si, ebi ìtoon̄ ejit me lek mkpọmfaka chi ebet lek mkpọmfaka chi si.

⁹Ire, enyi ebi Ijeren, ìtoon̄ ejit me lek Okumugwem; ọmọ ore ogwu òkitap ubọk inyi enyi, mè ire si agbọ òkikput enyi lek.

¹⁰Enyi ebi uwu kè Erọn, ebi ngwugwa, ìtoon̄ ejit me lek Okumugwem; ọmọ ore ogwu òkitap ubọk inyi enyi, mè ire si agbọ òkikput enyi lek.

¹¹Enyi ebi ìkimin Okumugwem, ìtoon̄ ejit me lek Okumugwem; ọmọ ore ogwu òkitap ubọk inyi enyi, mè ire si agbọ òkikput enyi lek.

¹²Okumugwem ìkakiwuuk eji; ìkpolọlọ igbagbana eji; môgbana otoko ebi Ijeren, mè igbana si ebi uwu kè Erọn.

¹³Okumugwem môgbana ebi geelek ìkimin ọmọ, ebi ilile mè ebi sọntiik.

¹⁴Kè Okumugwem irọ inyi enyi emumana; enyi melek bọn kinyi.

¹⁵Kè Okumugwem ogwu òrom inyọn̄ mè ijọn̄ igbana enyi.

¹⁶Emen inyọn̄ ìkup inyi ọmọ Okumugwem, ire, linyọn̄ ke îsa inyi bọn ebilene.

¹⁷Ebi ìkwukwu kpekitọn̄ Okumugwem; itọtọn̄ Okumugwem ìkakup ìnyi ebi ìfofo ama ekwukwu, ere kpekisan̄a amọn.

¹⁸Ire, eji ebi ìkup me ògat ugwem mêtọn̄ Okumugwem, bene me mgbọ keyi ire mgbọ ikakaan̄ge itata. Ìtọn̄ Okumugwem!