Read obolo Itọn̄ 119 Bible Online

Itọn̄ 119 - obolo bible

Itọn̄ 119

¹Kpọ-nu uga ubelejit òkup inyi ebi kpekaan̄ nrọ-nlọ geege me ugwem kiban̄; òrere ebi ìkiluk ugwem ikpọ me lek Ikan Okumugwem.

²Kpọ-nu uga ubelejit òkup inyi ebi ìkirọ ida ata-ikọ Okumugwem; òrere ebi ìkiweek ọmọ me otutuuk ejit kiban̄,

³mè ebi kpekirọ inu geege òlọlọ; ire, ekije me oniin̄ eyi Okumugwem.

⁴Okumugwem, owu ora inyi ida, ibe egbala chieen̄ ekerọ ikọ owu otọbe.

⁵Jei, kè ojaan̄ ire makeke inye, mè iriọọn̄ ubọk ikisun̄ ikan kwun̄ cha egebe isun̄!

⁶Esip geege kpomokitet emi, mgbọ nkikeek inu òfo me lek ikọ owu otọbe.

⁷Nsikween̄ unen oyerebet kwun̄ iriọọn̄, mâchili otutuuk ejit n̄a inyi owu itọn̄.

⁸Mâsun̄ ikan kwun̄ cha egebe isun̄; soso, katọtọp emi ìfiin̄ isi ge.

⁹Ìre gwun̄ nsabọn irieen̄ ìbojeje ikọt iluk ugwem òtatana? Îre sa me iluluk ugwem igọọk me lek ikọ kwun̄.

¹⁰Okumugwem, ǹsa otutuuk ejit n̄a iweek ubọk makitọbọ ebum inyi owu; soso, kachieek ibe ǹtutun ǹnan̄a me lek ikọ otọbe!

¹¹Ǹtatap ikọ otu kwun̄ me emen ejit n̄a, inyi nkarọ owu inu geege ìlọ.

¹²Okumugwem itọn̄ ikup inyi owu; soso, jeen̄ emi ikan kwun̄.

¹³Otu n̄a ke nsa ikpa otutuuk unen oyerebet osabe otu kwun̄ ifieek.

¹⁴Ililibi igọọk ata-ikọ kwun̄ îmin emi me lek enenen igak ikakaan̄ otutuuk inu ubọọn̄ geelek.

¹⁵Mâtap ikọ owu otọbe me ekiket, mè isa chieen̄ n̄a igwuun̄ me lek ubọk irọ-inu kwun̄.

¹⁶Mâkisa ikan kwun̄ cha egebe isun̄ ibaan̄ alọm; emi ǹkabawuuk ikọ kwun̄.

¹⁷Rọ inyi inu ije ijaan̄ emi gwun̄ ikwaan̄ kwun̄ me lek, inyi ǹgat ugwem, mè ǹkenrọ ikọ kwun̄.

¹⁸Chili emi chieen̄, inyi m̀mun̄ uyeke uyeke inu òkup me emen ikan kwun̄.

¹⁹Emi ìre ogwu ichen me linyọn̄; soso, kalet emi ikọ owu otọbe.

²⁰Ulọk irọriọọn̄ unen oyerebet kwun̄ mônikeme emi ikpan̄ eririeen̄ mè ikarek.

²¹Owu môgana ikọ inyi ebi ugumulek, ebi ofieekbe otu inyi; ebi kpekirọ ikọ otọbe.

²²Kachieek ibe ochak mè unyechieen̄ ire emi lek, mije, nrọ ida ata-ikọ kwun̄ iso.

²³Ebi ilile si mîkup inin̄ oru ikeme emi, ire, emi gwun̄ ikwaan̄ kwun̄, mâgwuun̄ chieen̄ ikikween̄ ikan kwun̄ cha egebe isun̄.

²⁴Ililibi igọọk ida ata-ikọ kwun̄ okitop emi me lek, ikọ ata-ikọ cha okirọ chieen̄ n̄a ibolo.

²⁵Ibot ejit n̄a ìkup me otu udọn̄ mkpa, na jomo emi gọọk me ida ikọ kwun̄.

²⁶Mkpa ubọk ugwem n̄a okupbe inyi owu, owu ofọfọọk emi otu; soso, jeen̄ emi ikan̄ kwun̄ cha egebe isun̄.

²⁷Tap ubọk nyi emi, mè ǹgobo ikọ owu otọbe ǹtet, inyi ǹkenkeek ekiket ofolek uyeke uyeke ikwaan̄ kwun̄.

²⁸Ufieejit mônikpan̄ emi; tap emi efuuk me emen gọọk me ida ikọ kwun̄.

²⁹Kachieek ibe emi ǹre ene ataak; ire, sa me ata ejit kwun̄ jeen̄ emi ikan kwun̄.

³⁰Ntumu ifieek ibe mâre ene atikọ; unen oyerebet kwun̄ ke nkilibi igọọk.

³¹Okumugwem, ǹgọgọbọ ida ata-ikọ kwun̄ ikam; soso, kachieek ibe esip itet emi.

³²Òkilọk emi enenen irọrọ ikọ owu otọbe, mije, owu môrọ inyi emi ǹriọọn̄ inu ǹgak ubọk nriọọn̄be.

³³Okumugwem, jeen̄ emi inu òkup me emen ikan kwun̄, inyi ǹsun̄ ikan kwun̄ cha egebe isun̄ ǹsi ǹre òta kan̄.

³⁴Nyi emi ngobo-ntet, ufuna mâkisun̄ ikan kwun̄; mâsa otutuuk ejit n̄a ikisun̄ ikan cha.

³⁵Sa emi kije ike otọbe ibe ekeje, mije, irọrọ ida kwun̄ mikitop emi me lek.

³⁶Nyi emi ulọk irọrọ ida ata-ikọ kwun̄; ìkare ulọk ininin̄ ubọọn̄.

³⁷Da chieen̄ n̄a san̄a me lek inu ikike, mè nyi emi ayaya ugwem me oniin̄ kwun̄.

³⁸Rọ otu ikọ kwun̄ so nyi emi gwun̄ ikwaan̄ kwun̄, ogwu òkimin owu.

³⁹Ochak òkichak emi mikaan̄ emi ukpook; nyan̄a emi sibi, ke owu ìre ogwu unen oyerebet.

⁴⁰Ikọ owu otọbe òkilọk emi irọrọ; nyi emi ayaya ugwem, ke owu ìre ogwu ata irọrọ.

⁴¹Okumugwem, jeen̄ emi imumechieen̄ mgbọ geelek kwun̄, mè nyan̄a emi gọọk me ikọ otu kwun̄,

⁴²inyi ǹkaan̄ inu mbasa ifọọk ebi ìkichak emi ochak, mije, ikọ kwun̄ ke nsa itoon̄ ejit.

⁴³Kachieek ibe atikọ inan̄a emi me otu mgbọ geege, bak me lek, ikpọchieen̄ n̄a ìkup me lek unen oyerebet kwun̄.

⁴⁴Ikeya ke mâkisun̄ ikan kwun̄ otutuuk mgbọ, mege ire mgbọ geelek, mgbọ geelek.

⁴⁵Sa me ikeya si ke mâkup me utelelek, mije, ǹkiweek irọrọ ikọ owu otọbe.

⁴⁶Mâkpa otu ata-ikọ kwun̄ isibi me isi ebi ubọọn̄; esip geege ìkpotet emi.

⁴⁷Ubelejit n̄a ìbokup me lek ikọ otọbe; emi mma irọrọ ida kwun̄.

⁴⁸Nkaan̄ ulibi inyi ikọ owu otọbe, mè ima si irọrọ ida kwun̄; mâgwuun̄ chieen̄ ikikween̄ ikan kwun̄ cha egebe isun̄.

⁴⁹Kawuuk ikọ otumube inyi emi gwun̄ ikwaan̄ kwun̄, ikọ ya ore ikpọchieen̄ n̄a.

⁵⁰Ikọ ya ore ukarajit n̄a mgbọ nkupbe me emen uyọrọlek; ọmọ ore ugwem n̄a.

⁵¹Ebi ugumulek mîrọ emi inu ochak, ire, ǹkayaka ikan kwun̄ ìto mgbọ geege.

⁵²Okumugwem, nsikikeek unen oyerebet kwun̄ me ukot ikaan̄, îra ikikat emi ejit.

⁵³Ebi unye-ibot isikikpaka ikan kwun̄, ejit ìkiyoyok emi.

⁵⁴Me mgbidim mgbọ nnikup me linyọn̄, ikan kwun̄ cha egebe isun̄ ke nkikọt me lek okwa.

⁵⁵Okumugwem, erieen̄ kwun̄ ìkakinan̄a emi me ejit me eririeen̄, ǹkakiwuuk si isusun̄ ikan kwun̄.

⁵⁶Eyi ore inu nkirọ mgbọ geelek, bak me lek nkirọ inu owu otọbe.

⁵⁷Okumugwem, owu ore uche òre emi lek; mwuuk lek itumu ifieek ibe ke m̀kpayaka ikọ kwun̄ ito.

⁵⁸Ǹsa otutuuk ejit n̄a ikibeek nnwọn kwun̄; to emi nsan gọọk me lek ikọ otu kwun̄.

⁵⁹Ndọmọ otutuuk ugwem n̄a ikpọ, mè igwu ikana igọọk ida ata-ikọ kwun̄.

⁶⁰Ǹkafiat mgbọ, ire, ǹgwagwat lek ilibi igọọk ikọ owu otọbe.

⁶¹Ebi ijo ife mîtip ufe ikana emi okokop, ire, ǹkabawuuk ikan kwun̄.

⁶²Ǹkibolo chieen̄ me ilaak ejit eririeen̄ ikitọn̄ owu, bak me lek unen oyerebet kwun̄.

⁶³Emi ìre unene melek ebi geelek ìkimin owu, mè ebi geelek ìkirọ inu owu otọbe.

⁶⁴Okumugwem, owu omun̄ ene me chieen̄ mgbọ geelek me otutuuk linyọn̄; soso jeen̄ emi ikan kwun̄ cha egebe isun̄.

⁶⁵Okumugwem, owu orọ inu ijaan̄ emi gwun̄ ikwaan̄ kwun̄ me lek, igọọk me ida ikọ kwun̄.

⁶⁶Jeen̄ emi ata ifuk-ibot mè ubọk ekisibi unen oyerebet, mije, nchieek me lek ikọ owu otọbe.

⁶⁷Ǹjeje ilọ, ke osusut kwun̄ ore emi lek; ire, mgbọ keyi, emi gwa ǹkirọ ikọ otu kwun̄.

⁶⁸Owu onwọn, mè ikirọ inu ònwọnwọn; soso, jeen̄ emi ikan kwun̄ cha egebe isun̄.

⁶⁹Ebi ugumulek mîkan̄ ataak ikeme emi me agan̄ geelek, ire, mâsa otutuuk ejit n̄a ikirọ inu otọbe ibe erọ.

⁷⁰Ema kpekigobo ikan kwun̄ itet, ire emi, ikan kwun̄ mikitop emi me lek.

⁷¹Osusut osutbe emi înwọn me lek n̄a, mije, îrọ inyi ǹkween̄ ikan kwun̄ cha egebe isun̄.

⁷²Ikan ònan̄a me otu kwun̄ înwọn me lek n̄a igak obop obop alata araran̄ mè alata okuket.

⁷³Owu orom emi, mè irọ emi ǹre inu nrebe; nyi emi ngobo-ntet, inyi ǹkween̄ inu onyibe ida ibe erọ.

⁷⁴Ebi ìkimin owu mêbele ejit mgbọ ema isimun̄ emi, mije, ikpọchieen̄ n̄a ìkup me lek ikọ kwun̄.

⁷⁵Okumugwem, nriọọn̄ ibe ke oyerebet kwun̄ ìkinenen; eya orọ, osusut osutbe emi ìkpọkpọ igbe.

⁷⁶Kè imumechieen̄ mgbọ geelek kwun̄ ire ukarajit n̄a, igọọk me ikọ otu kwun̄ otumube inyi emi gwun̄ ikwaan̄ kwun̄.

⁷⁷Rọ emi nsan, inyi ǹgat ugwem, mije, ikan kwun̄ mikitop emi me lek.

⁷⁸Kè esip itet ebi ugumulek, mije, ema mîkan̄ ataak ifiat emi me ikpak; ire, eyi n̄a, ǹkikeek inu ofolek inu otọbe ibe erọ.

⁷⁹Ria ebi ìkimin owu jet emi; ebi ìrọriọọn ata-ikọ kwun̄.

⁸⁰Rọ ibe ǹkensun̄ ikan kwun̄ cha egebe isun̄, inyi esip geege ikatet emi.

⁸¹Okumugwem, ikukup ikikpọ unyan̄a kwun̄ òkita emi ifi me owot enenen; ire, ntoon̄ ejit me lek ikọ otu kwun̄.

⁸²Chieen̄ îjat emi ikukup ikikpọ ibe owu òrọ otu ikọ kwun̄; eya ke ndo ibe mè ìre kpa mgbọ ke obonirọ ejit isiki emi?

⁸³Ǹdo ikọ yi, mije, nkana otukpọọk ikike; ire, ubọk geelek si, ǹkawuuk-nu ikan kwun̄ cha egebe isun̄.

⁸⁴Kpa mgbọ ke emi gwun̄ ikwaan̄ kwun̄ mbakup ikikpọ owu chieen̄ ire? Mgbọ owa ke obonisibi oyerebet me ibot ebi ìkililaba emi?

⁸⁵Ebi ugumulek mîrọkọ udọn̄ isun̄, inyi ǹnenkwala ǹrọn̄ me emen; ema kpekisa ikan kwun̄ igwen inu geege.

⁸⁶Otutuuk inu onyibe ida ibe erọ îgbe inu etoon̄be ejit me lek; ebi ene ekikan̄ ataak isa ikirọ ikeme emi; soso, na nyan̄a emi!

⁸⁷Ìsik sọntiik ema mekpan̄ emi, ire, emi ǹkasan̄a chieen̄ me lek inu owu otọbe ibe erọ.

⁸⁸Mije imumechieen̄ kwun̄ òkikup mgbọ geelek, soso, sun̄ emi ebek ugwem; inyi mâkirọ ida ata-ikọ ònan̄a me otu kwun̄.

⁸⁹Okumugwem, mege ire mgbọ ikakaan̄ge itata, ikọ kwun̄ ìkekeke ibia me akpabin inyọn̄.

⁹⁰Owu ogbe ogwu etoon̄be ejit me lek nan̄a me ukot re me ukot, owu osun̄ linyọn̄ me irek, ibabia si ikeya.

⁹¹Îre sa me ikọ otọbe ke inu geelek okup mege ire cherekeyi, mije, ema otutuuk ekirọ inu obe ema erọ.

⁹²Mebe ikan kwun̄ ìkakitop emi me lek, kè ǹkwu me emen uyọrọlek n̄a.

⁹³Emi ǹkakaan̄ mgbọ iwuwuuk ikọ kwun̄ otọbe, mije, ema ke osa irọ inyi ǹgat ugwem.

⁹⁴Emi ìre ene kwun̄, soso, nyan̄a emi, mije, ǹkiweek irọriọọn̄ ikọ otọbe ibe erọ.

⁹⁵Ebi ikpak ekeke egbe egbe ikiweek emi ikpakpan̄, ire, ata-ikọ kwun̄ ke mbasa ibene ibot.

⁹⁶Mmun̄ ibe ke inu geelek îkaan̄ okputut, ire, ata-ikọ kwun̄ îwele enenen, ìkakaan̄ okputut.

⁹⁷Mma ikan kwun̄ iraka iman̄; usen geelek, ǹkikakaan̄ ekiket ònin̄ me lek.

⁹⁸Ata-ikọ kwun̄ ìkikup melek n̄a mgbọ geelek; ọmọ ke owu osa irọ inyi emi ǹriọọn̄ inu ǹgak ebi ochicha n̄a.

⁹⁹Ikakaan̄ ikọ ata-ikọ kwun̄ me ekiket mgbọ geelek, îrọ inyi ǹkengobo inu ǹtet ǹgak otutuuk ebi ìkijeen̄ emi inu.

¹⁰⁰Mije nkirọ ikọ kwun̄ otọbe, nkigobo inu itet igak ebi ugane.

¹⁰¹Ǹtetet lek ikaan̄ me lek irọrọ ijo inu, inyi ǹkọt ǹlibi ǹgọọk ikọ kwun̄.

¹⁰²Ǹkatele unen oyerebet kwun̄, mije, îre owu me lek kwun̄ ojeen̄ emi.

¹⁰³Ikọ otu kwun̄ îtop me lek n̄a enenen; înin̄i emi me otu igak aran̄ akwọọk.

¹⁰⁴Ikọ otọbe okinyi emi iriọọn̄-inu, eya orọ, ǹchacha inu ofiaan̄ geelek.

¹⁰⁵Ikọ kwun̄ ore mkpukan̄ nkisa imọọn̄ inu ije ije; ọmọ ore utoon̄ òkijeen̄ emi oniin̄.

¹⁰⁶Nnyan̄a ibot ibe ke mâlibi igọọk unen oyerebet kwun̄; nrọ si inyan̄a-ibot n̄a ya ijot.

¹⁰⁷Jei Okumugwem, uyọrọlek mônikeme emi ikpan̄; na gat emi ugwem kubọk otumube me ikọ kwun̄.

¹⁰⁸Jei Okumugwem, bọkọ uriaak nkisa itọn̄ owu, mè jeen̄ emi unen oyerebet kwun̄.

¹⁰⁹Ǹkabawuuk ikan kwun̄, ubọk geelek îkikup mgbọ geelek kubọk ìbosasak emi ibot.

¹¹⁰Ebi ijo ife mîtip ufe ikana emi, ire, ǹkaje ìkwala irọrọ ida ikọ owu otọbe.

¹¹¹Ata-ikọ kwun̄ îkana ìrot inyi emi ire mgbọ geelek; îre ikọ cha okibele emi ejit.

¹¹²Ntumu ifieek me ejit n̄a ibe ke mâsun̄ ikan kwun̄ egebe isun̄ cha ire mgbọ geelek; mâsun̄ ema ire òta.

¹¹³Ncha ebi isi iba; ire, mma ikan kwun̄.

¹¹⁴Lek kwun̄ ke nkinin̄ ilet; owu si ore agbọ òkikput emi lek; ikpọchieen̄ n̄a ìkup me lek ikọ kwun̄.

¹¹⁵Enyi ebi ijo ubọk irọrọ, ìkpebe emi lek me lek, mije, mâkirọ inu Awaji n̄a onyibe ida ibe erọ.

¹¹⁶Bieen̄ emi kaan̄ gọọk me ikọ otu kwun̄, inyi ǹgat ugwem; kachieek ibe ǹrie esip me lek inu nkikpọ chieen̄ ibe owu môrọ inyi emi.

¹¹⁷Bene emi gwuun̄, inyi mfat ikafat emi, ke mâkisun̄ ikan kwun̄ cha egebe isun̄ mgbọ geelek.

¹¹⁸Owu ojit ebi ìjijit isusun̄ ikan kwun̄ cha egebe isun̄; otutuuk ijo ifiọk kiban̄ îkana inu ikike.

¹¹⁹Owu òsasan̄a otutuuk ebi ikpak ìkup me linyọn̄ isan̄a kubọk mfurufu; eya orọ mmabe ata-ikọ kwun̄.

¹²⁰Ǹkifieek owot me lek kwun̄, mè ikitet ukpook me lek unen oyerebet kwun̄.

¹²¹Nra irọ inu ònenen, mè irọ inu ònwọnwọn; kajit emi ìtele ìnyi ebi ìkitutuku emi.

¹²²Tele inyi emi, gwun̄ ikwaan̄ kwun̄, ǹtet owu me ata-ikọ òbonin̄ oruru inyi emi; kachieek ebi ugumulek etutuku emi.

¹²³Nkup ikpọ unyan̄a kwun̄ mege chieen̄ îjat emi; nkup si ikpọ ibe owu òrọ otu ikọ ata irọrọ kwun̄, ire, ǹkamun̄ inu geege.

¹²⁴Rọ emi, gwun̄ ikwaan̄ kwun̄, inu me lek kpọ me lek imumechieen̄ kwun̄ òkikup mgbọ geelek; jeen̄ si emi ikan kwun̄ cha egebe isun̄.

¹²⁵Emi ìre gwun̄ ikwaan̄ kwun̄; nyi emi ngobo-ntet, inyi ǹriọọn̄ ata-ikọ kwun̄.

¹²⁶Okumugwem, kpọ ebi ene mêkisa ikan kwun̄ isun̄ inu ikike; îkem mgbọ owu môrọbe ema inu.

¹²⁷Ire emi, mma ubọk owu okinyi ida; îkitop emi me lek igak alata araran̄; iin̄, mma igak alata araran̄ eyi atata kan̄.

¹²⁸Eya orọ, otutuuk ikọ otọbe ofolek otutuuk inu geelek, emi mmun̄ ibe ke ìkpọkpọ itat; ofiaan̄ mè ataak geelek, ǹchacha.

¹²⁹Ata-ikọ kwun̄ îmin uyeke me lek enenen; eya orọ, ǹchichili ejit n̄a ikisa isun̄ ema.

¹³⁰Isikpa ikọ kwun̄ iwele, îra ichili nlelet inu geelek ibook, mè orọ inyi ebi kpekaan̄ ifuk-ibot egobo inu etet.

¹³¹Ulọk irọrọ inu onyibe ida ibe erọ îmin emi me ejit enenen, ire lek nkisa otu ifuuk efuuk ejit ge ejit ge.

¹³²Yaka chieen̄ kpọ emi, mè rọ emi nsan, kubọk okirọ inyi otutuuk ebi ìmama erieen̄ kwun̄.

¹³³Sa ikọ otu kwun̄ jeen̄ emi oniin̄ mbaje; kachieek ibe ijo inu ibọkọ emi ikaan̄.

¹³⁴Faka emi sibi me tukutuku bọn ebilene ekitutuku emi, inyi ǹkenrọ ikọ owu otọbe.

¹³⁵Soso, kaan̄ emi gwun̄ ikwaan̄ kwun̄ nsan me lek, mè jeen̄ emi ikan kwun̄ cha egebe isun̄.

¹³⁶Ogbogbo mun̄ ito ìkigbugbuk emi me chieen̄ mgbọ geelek, mije, ebilene kpeyaka ikisun̄ ikan kwun̄.

¹³⁷Okumugwem, owu ìre ogwu ata irọrọ; oyerebet kwun̄ si ìkinenen.

¹³⁸Ata-ikọ kwun̄, eyi onyibe ida ibe ekegọọk, ìkpọkpọ itat, mè igbe inu etoon̄be ejit me lek enenen.

¹³⁹Ejit ìyok emi kubọk ukan̄, mije, ebi ochicha n̄a kpesa ikọ kwun̄ igwen inu.

¹⁴⁰Ikọ otu kwun̄ îgbe inu etoon̄be ejit me lek; eya orọ, emi gwun̄ ikwaan̄ kwun̄, m̀mama iraka iman̄.

¹⁴¹Emi nsip enenen me chieen̄ ene, mè ire ogwu ekikpọ igele, ire, ǹkawuuk ikọ kwun̄ otọbe.

¹⁴²Ata irọrọ kwun̄ môkup ire mgbọ geelek; ikan kwun̄ ìre atikọ.

¹⁴³Uyọrọlek mè ukwook îjot emi ejit enenen, ire, inu onyibe ida ibe erọ, ọmọ okinyi emi unwọọn̄.

¹⁴⁴Ata-ikọ kwun̄ ìkitatat mgbọ geelek; rọ inyi ǹgobo ǹtet, mè ǹgat ugwem.

¹⁴⁵Okumugwem, ntaan̄ ukpo igwen owu me otutuuk ejit n̄a; soso, nọ emi ida, ke mâsun̄ ikan kwun̄ cha egebe isun̄.

¹⁴⁶Owu ke nkitaan̄ ukpo igwen; soso, nyan̄a emi, ke mârọ ata-ikọ kwun̄.

¹⁴⁷Ǹkinan̄a ilaak sabum egwe ònowele, mè itaan̄ ukpo igwen owu ibe owu òtap ubọk ònyi emi; ikpọchieen̄ n̄a ìkup me lek ikọ kwun̄.

¹⁴⁸Otutuuk eririeen̄, ilaak ìkakinin̄ emi chieen̄; ǹkitop chieen̄ ikiwọlọ emen ikọ otu kwun̄.

¹⁴⁹Okumugwem, nọ ida n̄a sa me imumechieen̄ kwun̄ òkikup mgbọ geelek; sun̄ emi me ugwem sa me unen oyerebet kwun̄.

¹⁵⁰Ebi ìkirọ inu ikpak mîjuuk igbet emi lek; ema mîjọn̄ọ ere me lek ikan kwun̄.

¹⁵¹Ire, owu Okumugwem okup iriaak emi lek; otutuuk inu onyibe ida ibe erọ ìre atikọ.

¹⁵²Ire me lek ata-ikọ kwun̄, mwuuk lek iriọọn̄ karake mgbọ ibe ke owu òsun̄ ibe ikup ire mgbọ geelek.

¹⁵³Okumugwem, kpọ uyọrọlek òkitet emi, mè nyan̄a emi sibi, mije, ǹkawuuk ikan kwun̄.

¹⁵⁴Bọkọ ikọ ibot n̄a tumu, mè faka emi sibi, gat emi ugwem sa me ikọ otu kwun̄.

¹⁵⁵Owu òkponyan̄a ebi ikpak kubọk ge, mije, ema kpekirọ ikan kwun̄ cha egebe isun̄.

¹⁵⁶Okumugwem, ejit nsan kwun̄ mimin; sun̄ emi me ugwem gọọk me lek unen oyerebet kwun̄.

¹⁵⁷Ebi ìchacha emi mè ebi ìkililaba emi miwa; ire, ǹkagwu ìkom ìnan̄a me lek ata-ikọ kwun̄.

¹⁵⁸Nsiraan̄ chieen̄ imun̄ ebi ìkileke ene ifiin̄, ema ekijọjọ emi ejit, mije, ema kpekirọ ikọ otu kwun̄.

¹⁵⁹Owu omun̄ ike mmabe ikọ owu otọbe; sun̄ emi me ugwem sa me imumechieen̄ kwun̄ òkikup mgbọ geelek.

¹⁶⁰Ibot ibot ikọ kwun̄ ìre atikọ; ikeya si, otutuuk unen oyerebet kwun̄ ìbokukup ire mgbọ geelek.

¹⁶¹Ebi ilile ekisisaak emi me nkarọge ema inu geege ìlọ, ire, umin eyi ikọ kwun̄ îgwook emi mbiribọ me lek.

¹⁶²Ikọ otu kwun̄ îtap emi unwọọn̄ me ejit enenen; ìkup kubọk ene osi ichichini inu ubọọn̄.

¹⁶³Ikakan̄ ataak, emi ǹchacha enenen, mè ijọ ejit me lek, ire, mma ikan kwun̄ iraka iman̄.

¹⁶⁴Mgbọ jaaba me egwe usen ke nkitọn̄ owu, mije, oyerebet kwun̄ ìkinenen.

¹⁶⁵Ikpele esuuk ke ebi ìkima ikan kwun̄ ekikaan̄; kpunu inu geege òbokọt ida ema ito.

¹⁶⁶Okumugwem, ǹkikpọ chieen̄ ibe ke owu mônyan̄a emi; ǹkirọrọ inu onyibe ida ibe erọ.

¹⁶⁷Ǹkekirọ ida ata-ikọ kwun̄; mma ata-ikọ kwun̄ cha enenen.

¹⁶⁸Ǹkirọ inu otọbe ibe erọ, mè ikilibi igọọk otu ata-ikọ kwun̄, mije, owu okimun̄ inu geelek nkirọ.

¹⁶⁹Okumugwem, tele inyi ukpo nkibọn̄ igwen owu ire owu utọn̄; igọọk me lek ikọ kwun̄, rọ inyi emi ǹgobo inu ǹtet.

¹⁷⁰Tele mè uriaak n̄a ire owu utọn̄, mè nyan̄a emi kpọ me lek ikọ otu kwun̄.

¹⁷¹Mâkisa otu n̄a itọn̄ owu, mije, owu okijeen̄ emi ikan kwun̄ cha egebe isun̄.

¹⁷²Mâkikọt ikọ otu kwun̄ me lek okwa, mije, inu onyibe ida ibe erọ ìre inu ata irọrọ.

¹⁷³Bem lek ikekitap ubọk inyi emi, mije, nkeke inye irọrọ inu otọbe ibe erọ.

¹⁷⁴Okumugwem, òkilọk emi ibe owu ònonyan̄a emi; ikan kwun̄ mikitop emi me lek.

¹⁷⁵Soso, sun̄ emi me ugwem, ke mâkitọn̄ owu, mè tele si mè unen oyerebet kwun̄ itap ubọk inyi emi.

¹⁷⁶Nje ilọ owu ukot kubọk arọọn̄ òchechep; soso, na week emi gwun̄ ikwaan̄ kwun̄, mije, ǹkawuuk inu onyibe ida ibe erọ.