Read obolo Itọn̄ 132 Bible Online

Itọn̄ 132 - obolo bible

Itọn̄ 132

¹Okwa ekikọt isa inene isi Uwu Mbuban. Okumugwem, soso kawuuk Debit; kawuuk si otutuuk kwulukwulu kan̄ geelek.

²Keek inyan̄a-ibot înyan̄abe inyi owu Okumugwem, mè use îchieekbe owu Awaji Ogwu Unye, ogwu Jekọp òkiriaak, ibe,

³“Emi ǹkabanin̄ agwut uwu n̄a ikup; ǹkabanene inyọn̄ mkpilaak n̄a ilaak;

⁴ǹkabanyieen̄ ilaak; ǹkabalalaak si inwọnọ;

⁵mege mâdọmọbe ere inyi Okumugwem ikup, atalek uwu ere Awaji Ogwu Unye, ogwu Jekọp okiriaak obokup.”

⁶Kpọ, eji ekup me Efarata inọ inu ofolek okop inyan̄a-ibot ya; îre me ijọn̄ uko ebi ama Jiarim ke eji eniweek okop ya imun̄.

⁷Eji enenibe, “Ngwa eji enesi Uwu Mbuban Okumugwem; eji enesi etọbọ ebum enyi ọmọ me isi ogboon̄ kan̄.

⁸Okumugwem, nan̄a keke, mè na si nin̄ me uwu kwun̄, mè sa okop inyan̄a-ibot, òrere iman̄ òriọọn̄ unye kwun̄, gbaalek.

⁹Soso, rọ ebi ngwugwa kwun̄ ekerọ ata irọrọ; tele mè ebi kwun̄ etaan̄ ukpo unwọọn̄.”

¹⁰Mije kè Debit ogwu ikwaan̄ kwun̄, soso, kada chieen̄ ìsan̄a me lek ogwu ubọọn̄ owu ogobobe ito.

¹¹Owu onyan̄a ibot inyi Debit me atikọ; owu òkpogwu ikom me lek use ochieekbe ọmọ ibe, “Emi mâsa mfut ge òsibi me lek kwun̄ itoon̄ me inyọn̄ ogboon̄ ubọọn̄ kwun̄.

¹²Ire bọn kwun̄ itet inyan̄a-ibot n̄a inye, mè isun̄ inu ata-ikọ n̄a echi mâjeen̄be ema, bọn bọn kiban̄ si mêkikweek me inyọn̄ ogboon̄ ubọọn̄ kwun̄, mege ire mgbọ ikakaan̄ge itata.”

¹³Okumugwem îgobo Sayọn; îweek isasa irọ ere iluluk kan̄,

¹⁴mè ibe, “Eyi ìre ere itap-efuuk n̄a ire mgbọ ikakaan̄ge itata; eyi ìre ere mbaluk, mije, îre emi mweek inyi lek n̄a.

¹⁵Mânyi Sayọn òjot òjot inu geelek òkup ọmọ me uyọt; mânyi ebi ugbọọn̄ ìkup me emen kan̄ inorie erie ejot owot.

¹⁶Mânyan̄a ebi ngwugwa ìkup me emen kan̄; ebi n̄a ebi ìluk me emen kan̄ mêtaan̄ ukpo unwọọn̄.

¹⁷Me Sayọn, mârọ ene ge me lek bọn kè Debit ikpele ubọọn̄; mârọ mkpulu ogwu ngobobe ito ikeke inye kubọk mkpukan̄ aran̄ ìkakinan me emen.

¹⁸Mâsa esip ikana ichit ebi ochicha kan̄ kubọk ekwut, ire, okpibot ubọọn̄ kan̄ ìbokikekebe.”