Read obolo Itọn̄ 139 Bible Online

Itọn̄ 139 - obolo bible

Itọn̄ 139

¹Ìkup inyi ogwu òjeen̄ okwa. Okwa kè Debit. Okumugwem, owu owọlọ emen n̄a ikpọ, mè iriọọn̄ ene nrebe.

²Inu geelek nkirọ, owu oriọọn̄ isan̄a kpai; ekiket n̄a geelek, owu okup me emen inyọn̄ ere òjọjọn̄ọ ere iriọọn̄.

³Ere geelek njebe inin̄, mè ìyaka ire ǹkilalaak, owu omun̄ emi; owu oriọọn̄ otutuuk inu geelek nkirọ.

⁴Sabum ikọ ge ònosibi emi me otu alọm, owu Okumugwem, ora irọriọọn̄ inu mbatumu.

⁵Owu òkakana emi okokop, me isi mè udun̄, mè isa ubọk kwun̄ iwele ichit emi.

⁶Irọriọọn̄ oriọọn̄be emi ikeyi îkaan̄ ukpook enenen; îbene iraka iman̄, emi m̀kpakọt itut.

⁷Ere owa ke mâje inin̄, eyi mâlọbe owu chieen̄? Sà ìre ere owa ke mâlibi inin̄, eyi mâkwalabe inan̄a me isi kwun̄?

⁸Ìrere m̀wuwulu inene ifo emen inyọn̄, owu me ere ya okupbe; ikerere ǹyaka ìgegele isiki ifo ama ekwukwu, owu si me ere keya okupbe!

⁹Ire mwulu abayaage ichep me agan̄ mbum-ura, mè ìre ǹsi iluk me okputut okwaan̄ ile agan̄ ichep-ura,

¹⁰îre owu si obosa emi iban me ere ya; owu si obotap ubọk inyi emi me ere ya.

¹¹Ire mbe ke udun môkana ichit emi bùk, ke utoon̄ môkana eririeen̄ ikat ikana emi lek.

¹²Me atikọ, udun ìkakidun me lek kwun̄; eririeen̄ ìkitoon̄ kubọk egwe ikarek; udun mè utoon̄ ìre ìkike me lek kwun̄.

¹³Owu orom nriro òkup emi me lek, mè isusọkọ emi ichim igba me emen owot nga n̄a.

¹⁴Ǹkitọn̄ owu, mije, owu òrom emi me oniin̄ òkaan̄ ukpook mè ikup uyeke uyeke; otutuuk ubọk ikwaan̄ kwun̄ ìkup si nke nke; eyi ìre inu emi nriọọn̄be ijaan̄ lek.

¹⁵Ukwuuk n̄a ìkalet owu me chieen̄, mgbọ îbenebe ikitibi me emen owot nga n̄a, mè ikiriọọn̄ ubọk igba isọk me nlelet.

¹⁶Owu omun̄ emi me emen nkwa; me emen ikpa kwun̄, mîge otu ifuk usen n̄a me linyọn̄ isan̄a, sabum ge me lek usen cha onibebene.

¹⁷Jei Awaji, îyọt enenen emi ikọkọt igobo ekiket kwun̄ itet; ìkarere inu mbakọkọt ifuk otu ifuk.

¹⁸Ire mbafufuk, m̀kpakọt, mije, môwa igak nkwukwuuk okpoon̄ òkup me agba awaji; otutuuk usen ugwem n̄a ìkasoso ikekisa ifuk.

¹⁹Jei Awaji, îlọk emi ibe ke kè owu òkpan̄ ebi ikpak; enyi ebi ìkifiat eje ene, ìda ìbọkọ ìjọn̄ọ ere me lek n̄a.

²⁰Ebi ikpak ekisa ejit ikpak itumu ikọ ifiat owu, mè ikitumu ijo usem ibak erieen̄ kwun̄.

²¹Okumugwem, ǹchacha ebi ìchacha owu igo; njọ ejit me lek ebi ìkifieek lek isan̄a me lek kwun̄.

²²Ncha ema isan̄a kubọk olu ifin; m̀mọnọ ema ibe ìre ebi ochicha n̄a.

²³Jei Awaji, wọlọ emi kpọ, inyi òriọọn̄ ejit n̄a; roon̄ emi kpọ si, inyi òmun̄ ekiket n̄a.

²⁴Kpọ-nu, mè ìre îkaan̄ inu ikpak nrọbe, mè sa emi je me ata oniin̄ kwun̄, eyi ojeen̄be ebi nte kiji ukot ikaan̄.