Read obolo Itọn̄ 140 Bible Online

Itọn̄ 140 - obolo bible

Itọn̄ 140

¹Ìkup inyi ogwu òjeen̄ okwa. Okwa kè Debit. Okumugwem, nyan̄a emi sibi me ubọk ebi ikpak, mè sa lek kwun̄ kwek emi me ubọk ebi afa.

²Otitọt irọrọ ijo inu ìkakinan̄a ema me ejit mgbọ geege; mgbọ geelek, ema ekineneen̄ lek ititiin̄ ibe akọn̄ ibumu.

³Otu alọm kiban̄ ìreke kubọk ejeek ijijinu, ikọ ònan̄a ema me otu ìkikpan̄ ene kubọk iwot asawọ.

⁴Okumugwem, bem emi me ubọk ebi ikpak; sa lek kwun̄ kwek emi me ubọk ebi afa; ebi ìbeben me ejit ikpukpulu emi ukot isan̄a me ijọn̄.

⁵Ebi ugumulek mîtip ufe ikikpọ emi, mè igwuk njin olik igbọ ikwek emi, mè itaak ufe ichit otu oniin̄ isasa itet emi.

⁶Emi ntutumu inyi Okumugwem ibe, “Owu ore Awaji n̄a.” Soso nọ ida mbeek n̄a.

⁷Jei Okumugwem, Ogwukaan̄ n̄a, ogwu unye òkitim etim ibot n̄a; owu ore agbọ òkput emi lek me usen akọn̄ orọn̄be.

⁸Okumugwem, inu ebi òkpaka ibot cha ekiweek, kachieek ibe ire ema ubọk; ijo otitọt kiban̄ cha, kachieek ibe irọ iso, inyi ema ekagugo lek.

⁹Uyọrọlek cha ebi ìkpakpa ikana emi ekisa otu kiban̄ igween̄ inyi emi, yaka kwaan̄ ema me ibot.

¹⁰Tele akaak ukan̄ oren̄ebe me lek igwook ema me lek; tele etọọn̄ ema etap me emen ukan̄ mè emen udọn̄ òdọdọk, mè ema ebia, mè ekakọt ìsibi.

¹¹Kachieek ibe ebi ìkitoon̄ ene uraamọn ekaan̄ nje-nnyi-isi me linyọn̄; tele ogbogbo uyọrọlek iweek ebi afa imun̄, mè itọp ema ikaak.

¹²Okumugwem, nriọọn̄ ibe owu okisibi oyerebet inwọn ebi ekifeen̄, mè ikinyi ebi ugbọọn̄ unen kiban̄.

¹³Me atikọ, ebi ata irọrọ mêtọn̄ owu; ebi kpunu ofiaan̄ me emen mêluk me isi kwun̄.