Read obolo Itọn̄ 143 Bible Online

Itọn̄ 143 - obolo bible

Itọn̄ 143

¹Okwa kè Debit. Jei Okumugwem, nọ uriaak n̄a; gban̄ utọn̄ me lek mbeek nkibeek owu! Owu ìre ogwu ata irọrọ; soso, fọọk emi otu, ke owu ogbe ogwu etoon̄be ejit me lek.

²Kasibi emi, gwun̄ ikwaan̄ kwun̄, oyerebet me ibot, mije kpunu ene geege òkup me ugwem òrere ogwu ata irọrọ me isi kwun̄.

³Ogwu ochicha îgọọk emi isi ire òta, mè isulu emi ikpukpuku me ijọn̄; îtap emi me ere òdudun, kubọk ebi ìkwakwaan̄ mgbọ òjọjọn̄ọ.

⁴Ogugo îsibi ita emi me lek; ukpook îtap emi mgbugba igak ejit.

⁵Nsi ikeek ukot oka mgbọ cha, mè iwọlọ emen otutuuk inu orọbe cha ikpọ, mè igen ibot ikpọ otutuuk ubọk ikwaan̄ kwun̄ cha.

⁶Eya orọ, nnyana ubọk n̄a inyi owu; mweek owu enenen, kubọk ijọn̄ òchachiaak oweek ibot.

⁷Okumugwem, fọọk emi otu ugwat ugwat; ogugo îta emi me lek; kalet lek kwun̄ me lek n̄a, inyi nkakup kubọk ogwu òkwukwu.

⁸Jeen̄ emi imumechieen̄ mgbọ geelek kwun̄ ewelegwe geelek, mije, utoon̄-ejit n̄a ìkup me lek kwun̄; jeen̄ emi oniin̄ mâjebe, mije, owu ke nkitọbọ ebum inyi.

⁹Okumugwem, san̄a emi me ubọk ebi ochicha n̄a, mije, ubọk kwun̄ ke ntap ibot n̄a.

¹⁰Jeen̄ emi ubọk mâkirọ inu oweekbe, mije, owu ore Awaji n̄a; me nsan kwun̄, sa emi je me ere uyọrọlek kpoyakabe imun̄ emi.

¹¹Okumugwem, nyan̄a emi ebek ugwem mije erieen̄ kwun̄; nyan̄a emi sibi me uyọrọlek, mije, owu ìre ogwu ata irọrọ!

¹²Kpan̄ ebi ochicha n̄a, mije imumechieen̄ mgbọ geelek kwun̄ eyi okaan̄be me lek n̄a; jijaka ebi ìkitutuku emi, mije, emi ìre gwun̄ ikwaan̄ kwun̄!