Read obolo Itọn̄ 144 Bible Online

Itọn̄ 144 - obolo bible

Itọn̄ 144

¹Okwa kè Debit. Ìtọn̄ Okumugwem, ogwu òre ewuuk òkikput emi lek! Ọmọ ojeen̄ emi ukot akọn̄, mè ineen̄ emi isun̄ inyi etim.

²Ọmọ ore ogwu òkimun̄ emi me chieen̄, mè ire si uwu mgban akọn̄ òkikput emi lek, mè okwukwek akọn̄ òkilet emi lek, mè agbọ òkikwek emi lek, mè ogwu unyan̄a n̄a, ogwu nkilibi inin̄ lek mgbọ uyọrọlek; ọmọ okirọ ebi n̄a esiki ibot enyi emi.

³Okumugwem, ìre ogwu ebilene ikike ìkup me lek keke ni, eyi osabe ọmọ igwen inu? Sà ìre keke ke gwun̄ ebilene ore, eyi owu okikaan̄ nkeek ibak ọmọ?

⁴Ugwem ogwu ebilene ìbet lek mgbọ efuuk ge, ìkajọn̄ọ; usen ugwem kan̄ ìbet lek ogugo, ìkinininiin̄ ichep mgbọ yaage.

⁵Okumugwem, rama akpabin inyọn̄ bum, mè nan̄a sibi ijọn̄ na; chak ubọk me lek ogoon̄, inyi ibumu oduku!

⁶Ria omumen-inyọn̄ na, inyi iyiyala ebi ochicha kwun̄; sook oraan̄ kwun̄ tap, inyi ema eliliin̄.

⁷Kup me emen inyọn̄ nyana ubọk; sik emi sibi me ejit irem, mè nyan̄a emi sibi me ubọk ebi ofifi ido.

⁸Ema ìre ebi ataak ebek, kpekitumu atikọ, ebi ìkikaak ubọk ofiaan̄ ijeen̄ inyọn̄.

⁹Jei Awaji, mâkọt aya okwa inyi owu; mâfit uneen̄ akọp olik isa ikọt okwa itọn̄ owu.

¹⁰Îre owu orọ ebi ubọọn̄ Ijeren eketim ekpan̄ me akọn̄, mè inyan̄a Debit gwun̄ ikwaan̄ kwun̄ isibi me otu oge mkpa.

¹¹Sik emi sibi, mè nyan̄a emi me ubọk ebi ofifi ido, ebi ataak ebek, ebi kpekitumu atikọ; ema ekikaak ubọk ofiaan̄ ijeen̄ inyọn̄.

¹²Mgbọ bọn ebirieen̄ kiji isinin̄ nsabọn irieen̄, rọ inyi ema enye lek kubọk uti òmimin isoon̄ ikeke; mè rọ bọn ebibaan̄ kiji si ejaan̄ kubọk atà ebabala òkikup me lek uwu ebi ubọọn̄.

¹³Rọ inyi mfut uko ijot uwu mfut uko kiji; mè esese esese isi mfut ijojot ke gbak; rọ si inyi arọọn̄ kiji imaan̄ bọn me obop me obop.

¹⁴Rọ inyi eriembuuk kiji imumana owuwa owuwa, owot ikasibi geege; ichep geege ikakup; rọ si inyi ukpo uyọrọlek ikataan̄ me lek oniin̄ me emen ama kiji.

¹⁵Uga ubelejit òwa inyi ebi geelek ama kiban̄ okupbe ikeya; uga ubelejit òwa si inyi ebi geelek Awaji kiban̄ orebe Okumugwem.