Read obolo Itọn̄ 147 Bible Online

Itọn̄ 147 - obolo bible

Itọn̄ 147

¹Ìtọn̄ Okumugwem! Îjaan̄ ibe ekọt okwa etọn̄ Awaji kiji; îtop mè itat ibe etọn̄ ọmọ.

²Okumugwem okinama Jeruselem; ọmọ okisa bọn ebi Ijeren ebi ekpulube me akọn̄ ika.

³Ọmọ okigwa ebi inyọn̄ ogakbe, mè ikibọp unan kiban̄.

⁴Ọmọ otumu ifieek otu ifuk ntoronyan̄, mè inyi ema ge ge erieen̄ iso.

⁵Okumugwem, Òkaan̄ kiji, îmin mè ikaan̄ unye enenen; iriọọn̄-inu kan̄ kpebekọt itọ iriọọn̄ ikeke.

⁶Okumugwem okibene ebi irek osikibe ifo inyọn̄, mè ikida ebi òkpaka ibot itọbọ me ijọn̄.

⁷Ìkọt okwa ìbe Okumugwem onirọ; ìsa uneen̄ ìkọt utop okwa ìnyi Awaji kiji.

⁸Ọmọ okisa oduku inyọn̄ iwele ichit isi akpabin inyọn̄; ọmọ okiria ibot ibe irep igwook me ijọn̄; ọmọ okirọ mbubet itibi me inyọn̄ ogoon̄.

⁹Ọmọ okinyi ebi kè anam oron inorie kiban̄, mè ikinyi si bọn ekerekwukwu, mgbọ ema isito ito uraafiọọn̄.

¹⁰Okumugwem ìkakaan̄ ulọk me lek inyinya òkakaan̄ unye; ìkadodo si ebi akọn̄ ìnyenye ejit.

¹¹Ire, inu îkitop ejit me lek ìre ebi ìkimin ọmọ; ebi ikpọchieen̄ kiban̄ okupbe me lek imumechieen̄ mgbọ geelek kan̄.

¹²Enyi ebi Jeruselem, ìtọn̄ Okumugwem; enyi ebi Sayọn, ìtọn̄ Awaji kinyi!

¹³Ọmọ okiriọọn̄ ubọk ibem enyi; ọmọ okigbana bọn enyi ekaan̄be.

¹⁴Ọmọ otap utelelek ikana okike ijọn̄ kinyi; ọmọ okinyi enyi atalek inorie ònwọnwọn ichit ibe ijot enyi owot.

¹⁵Ọmọ oria ikọ otu kan̄ inu linyọn̄; ikọ kan̄ ososo ere mgbọ yaage.

¹⁶Ọmọ okisa ibot awo iwele ichit ere kubọk inwọọn̄ lek arọọn̄, mè ogwọ senesene mun̄ ewuuk ochon okana ere kubọk ntọn̄.

¹⁷Ọmọ okitọọn̄ okpukpuk mun̄ igwook kubọk mgbọlọ; kpunu ogwu òbokọt ibeme utọọk îkiria inu!

¹⁸Ọmọ isinyi ida, okpukpuk mun̄ cha îra itọk ita; ọmọ okiria efet kan̄ inu, mun̄ îra ibaak.

¹⁹Ọmọ îtumu ikọ kan̄ inyi Jekọp, mè ige ikan kan̄ mè unen oyerebet kan̄ inyi ebi Ijeren, bọn kè Jekọp.

²⁰Ọmọ ìkarọ ikeyi ìnyi ebi ofifi ido geege; ebi ofifi ido kperiọọn̄ si unen oyerebet kan̄. Ìtọn̄ Okumugwem!