Read obolo Itọn̄ 148 Bible Online

Itọn̄ 148 - obolo bible

Itọn̄ 148

¹Ìtọn̄ Okumugwem; enyi ebi ìkup me emen inyọn̄, ìtọn̄ Okumugwem; ìtọn̄ ọmọ me ere òbebene ichit!

²Enyi otutuuk ebi osat kan̄, ìtọn̄ ọmọ; enyi otutuuk ikpele urum inu îrombe ito me akpabin inyọn̄, ìtọn̄ ọmọ.

³Enyi ebi kè ura mè onyan̄, ìtọn̄ ọmọ; enyi otutuuk ebi kè ntoronyan̄ ìkinyi utoon̄, ìtọn̄ ọmọ.

⁴Inu geelek òkup me emen inyọn̄ òbebene ichit, ìtọn̄ ọmọ; enyi mun̄ òbebene isaba akpabin inyọn̄ si, ìgọọk ìtọn̄ ọmọ.

⁵Enyi otutuuk ìtọn̄ erieen̄ Okumugwem, mije, îre sa me ida kan̄ înyibe ke îrom enyi isibi.

⁶Ọmọ si osun̄ enyi kpa ogwu me irek kan̄ ire mgbọ geelek; înyi enyi ikan kan̄ eyi môkupbe ire mgbọ geelek.

⁷Enyi inu geelek òkup me linyọn̄, ìtọn̄ Okumugwem; enyi ikpele anam ejit okwaan̄ mè ugwuuk okwaan̄ geelek;

⁸ikeya si, omumen-inyọn̄ mè ibot mgbọlọ, mè ibot awo mè oruk mè egwijo, enyi ebi ìkirọ inu Okumugwem obe enyi erọ;

⁹enyi ogoon̄ mè orioon̄ geelek, uti òkito mfut mè echi ìkakito;

¹⁰enyi otutuuk anam uwu mè anam oron, mè inu geelek òkinyinyọnọ me ijọn̄, mè unọn òwulu me inyọn̄;

¹¹enyi ebi ubọọn̄ linyọn̄, mè otutuuk ebilene, ebi ilile, mè otutuuk ebi ìkikpulu linyọn̄;

¹²enyi nsabọn irieen̄ mè nsabọn ibaan̄, ugane mè gwun̄ aya; enyi otutuuk, ìtọn̄ Okumugwem!

¹³Enyi otutuuk, ìtọn̄ Okumugwem, mije, erieen̄ kan̄ gaalek omin iraka otutuuk erieen̄; òrirọ kan̄ obene isaba linyọn̄ mè akpabin inyọn̄.

¹⁴Ọmọ înyi ebi ido kan̄ unye; eya orọ otutuuk ebi kan̄, ebi Ijeren, ebi ìre bọn ibot ejit kan̄ ekitọn̄ ọmọ. Ìtọn̄ Okumugwem!