Read obolo Itọn̄ 19 Bible Online

Itọn̄ 19 - obolo bible

Itọn̄ 19

¹Ìkup inyi ogwu òjeen̄ okwa. Okwa kè Debit. Akpabin inyọn̄ òkitumu ibe Awaji mimin; akpa isinyọn̄ òkijeen̄ ubọk ikwaan̄ kan̄ isibi utoon̄.

²Ikarek ge ìkitumu umin Awaji isibi inyi ikarek ògọgọọk; eririeen̄ ge ìkichili si ijeen̄ eririeen̄ ògọgọọk.

³Ema kpekaan̄ usem, kpekakaan̄ si amọn ebilene ekaan̄be; kpekinọ ida kiban̄.

⁴Ire, ida kiban̄ îtaan̄ iso otutuuk linyọn̄; enọnọ ikọ kiban̄ me ntutun̄ ere geelek me linyọn̄. Me akpa isinyọn̄ ke Awaji osun̄ uwu inyi ura olukbe,

⁵inyi ikinan̄a isibi me ewelegwe me ubelejit, kubọk ogwu òdo nwa ayaya okinan̄a me agwut isibi, mè ikibele ejit kubọk ogwu ifan̄a ekot òbolibi ekot kan̄.

⁶Ura ìkibum me agba isinyọn̄ agan̄ ge, mè ikije isaba itoon̄ me agan̄ keyilọ; kpunu inu geege uyok kan̄ ìkakire lek.

⁷Ikan Okumugwem ìjajaan̄ isan̄a; ìkinyi ene aya efuuk me emen. Ata-ikọ Okumugwem îgbe inu etoon̄be ejit me lek; ìkirọ ogwu ikakaan̄ge iriọọn̄-inu ikana ogwu òriọọn̄ inu.

⁸Ikọ Okumugwem otọbe, ìtatat ikup; ìkisa unwọọn̄ ijet ebi ìkirọ inu cha; inyinyi ida Okumugwem onyibe, ìnenen; ìkigwuku ene chieen̄.

⁹Itetet ukpook me lek Okumugwem, ìkakaan̄ okpa me lek, ìbokukup ire mgbọ geelek; oyerebet Okumugwem okifieek, ìkikekeke, ìkinenen isan̄a kpai.

¹⁰Ema mînye otu ewe igak alata araran̄, ikerere owuwa atalek alata araran̄; ema mînin̄i igak aran̄ akwọọk, ikerere aran̄ akwọọk òkirọrọn̄ọ me lek akpa akwọọk.

¹¹Ògak ge, ema ke okisa itaba emi ogwu ikwaan̄ kwun̄ ubọk me utọn̄; ikpele mkpukpe òwa me lek isusun̄ ema.

¹²Kpunu ogwu òkimọọn̄ nrọ-nlọ ọmọ orọbe me ikariọọn̄ge; jei Okumugwem, nyan̄a emi sibi me ijo inu òlelet ikup emi me ejit.

¹³Kachieek si ibe emi, ogwu usun̄ kwun̄, ǹgen ibak ǹrọ inu nriọọn̄be isan̄a ibe ìre ijo inu; kachieek ibe ijo inu itọ ikọ inyi emi; sa me ikeya ke mâtana me ugwem, mè inwọnọ irọrọ ikpele ijo inu.

¹⁴Soso, bọkọ ikọ otu n̄a mè ekiket ejit n̄a tap, jei Okumugwem, owu Ewuuk òlet emi, mè Ogwu Òfaka emi Isibi.