Read obolo Itọn̄ 25 Bible Online

Itọn̄ 25 - obolo bible

Itọn̄ 25

¹Okwa kè Debit. Jei Okumugwem, îre owu ke nkitọbọ ebum inyi.

²Jei Awaji n̄a, owu ke ntoon̄ ejit me lek; kachieek ibe ǹrie esip; kachieek ebi ochicha etim ekpan̄ emi.

³Kachieek ibe ebi ìtoon̄ owu ejit me lek erie esip; rọ inyi ebi ukot okifet irọrọ ijo inu erie esip.

⁴Jei Okumugwem, rọ mè ǹriọọn̄ oniin̄ kwun̄, mè jeen̄ emi ubọk mbasa ije me oniin̄ ya.

⁵Jeen̄ emi atikọ kwun̄, mè kisa emi je me emen kan̄, mije owu ore Awaji ogwu òkinyan̄a emi; owu si ke nkikpọ chieen̄ mgbọ geelek.

⁶Jei, Okumugwem, kawuuk ejit nsan mè imumechieen̄ mgbọ geelek eyi okaan̄be me lek ebi kwun̄ karake ukot ikaan̄.

⁷Soso kayaka ìkeek ijo inu nrọbe mgbọ nsabọn irieen̄, mè nrọ-nlọ geelek nrọbe mgbọ cha; ire, keek emi, mije nnwọn kwun̄, sa me lek imumechieen̄ okikaan̄ mgbọ geelek.

⁸Okumugwem ìkirọ inu ònwọnwọn mè inu ònenen; eya orọ îkiteme ebi ijo ife oniin̄ ògbegbe ibe ema egọọk.

⁹Ìkisa ebi ìsisiki lek ije me oniin̄ ònenen, mè ikirọ ema eriọọn̄ nkeek kan̄.

¹⁰Ebi ìkirọ inyan̄a-ibot Okumugwem, mè ikigọọk si nteme kan̄, ebiba ke îkimun̄ me chieen̄ mgbọ geelek, mè ikisa ije me oniin̄ eyi atikọ.

¹¹Okumugwem, mije erieen̄ kwun̄, tele inu nrọbe ilọ nyi emi, ke îwa enenen.

¹²Ebi geelek ìkimin Okumugwem, ebiba ke ìbojeen̄ oniin̄ ema mêkigọọk.

¹³Inu môje ijaan̄ me lek kiban̄; bọn kiban̄ ebere ebi ìbekaan̄ lek ijọn̄ me ìrot.

¹⁴Okumugwem ìkitumu nlelet inu kan̄ ijeen̄ ebi ìkimin ọmọ, mè ikirọ ema eriọọn̄ inyan̄a-ibot kan̄.

¹⁵Okumugwem ke nkikpọ chieen̄ mgbọ geelek, mije môwọọk emi ukot isan̄a me otu ufe.

¹⁶Okumugwem, soso, yaka isi kpọ emi, mè kaan̄ emi nsan me lek, mije emi ìre gwun̄ ibot ge, mè ogwu ekituk.

¹⁷Ufialek îjot emi ejit enenen; san̄a emi sibi me emen uyọrọlek n̄a geelek.

¹⁸Kpọ sasaak mè kwulukwulu nkibọkọ, mè ben otutuuk ijo n̄a fiin̄.

¹⁹Raan̄ chieen̄ kpọ ebi ochicha n̄a; kpọ ubọk ema ewabe iyaka, mè ubọk ema echabe emi ikpak ikpak!

²⁰Jei, bem ugwem n̄a, mè nyan̄a emi sibi; kachieek ibe esip itet emi, mije, me lek kwun̄ ke nlibi inilet.

²¹Bem emi, mije, owu ìre ogwu atikọ mè ogwu unen eru, bak me lek, owu ke ntoon̄ ejit me lek.

²²Jei Awaji, soso, nyan̄a ebi Ijeren sibi me otutuuk uyọrọlek kiban̄.