Read obolo Itọn̄ 27 Bible Online

Itọn̄ 27 - obolo bible

Itọn̄ 27

¹Okwa kè Debit. Okumugwem okinyi emi utoon̄, mè ikinyan̄a emi; ìre ekene ke mbatet ukpook me lek? Okumugwem okibem ugwem n̄a; ìre ekene ke mbafieek owot me lek?

²Mgbọ ebi ijo ife mênin̄be imeen̄ emi inenigwak emi iche, ebi ochicha n̄a mè ebi ìkikọp emi cha, ema mêkwaak, mè irurọn̄ọ.

³Ìrere urum akọn̄ okpa ikana emi, ǹkabafieek owot; ikerere akọn̄ ke ejibi inu emi lek, ejit n̄a ìbonyenye.

⁴Inu ge ke mbeek me ubọk Okumugwem, eya si ke mweek; inu ya ìre iluluk me Uwu Mbuban Okumugwem otutuuk usen ugwem n̄a, mè ikimun̄ uja Okumugwem, mè ikiriaak uriaak me Uwu Mbuban kan̄.

⁵Mije, me usen uyọrọlek, Okumugwem môlet emi me irak akpatan̄ kan̄; môtap emi me ere nlelet me uwu kan̄ ichit, mè ibene emi itoon̄ me inyọn̄ ewuuk òbebene.

⁶Sa me ikeya, mâtim ikpan̄ ebi ochicha ìkana emi okokop; mgbọ ya, mânenigwa ngwugwa me uwu kan̄, mè itaan̄ ukpo unwọọn̄; mâkọt okwa itọn̄ Okumugwem.

⁷Okumugwem, nsitaan̄ ukpo igwen owu, nọ; kaan̄ ata ejit me lek n̄a, mè rọ ubọk mbeekbe owu.

⁸Ejit n̄a ìbe ke owu òbe, “Ìkiweek emi.” Eya orọ, jei Okumugwem, isi kwun̄ si ke nkiweek.

⁹Kalet isi kwun̄ ìsan̄a me lek n̄a; kasa mije unaan̄-ejit ìlap emi ìda ìbọkọ; owu ore ogwu òkitap ubọk inyi emi; katọp emi ìfiin̄; kajit emi ìtele, jei Awaji ogwu òkinyan̄a emi.

¹⁰Nte n̄a mè nga n̄a mêkọt ijit emi itele, ire, Okumugwem mômọnọ emi ikpukpo.

¹¹Okumugwem, jeen̄ emi oniin̄ kwun̄, mè sa emi je me oniin̄ òrọrọt, mije, ebi ochicha n̄a mêkikpọ emi.

¹²Nyan̄a emi sibi me ubọk ebi ochicha n̄a, mije ebi ata-ikọ ataak mîsibi ikeke itutumu ikeme emi, mè iben ejit irọrọ emi afa me lek.

¹³Nchieek inye ibe ke mâkup me ògat ugwem imun̄ nnwọn Okumugwem me ugwem keyi.

¹⁴Ìkup ìkpọ Okumugwem; ìtet lek ìnye, mè ìtet ejit ìnye; iin̄, ìkup ìkpọ Okumugwem.