Read obolo Itọn̄ 29 Bible Online

Itọn̄ 29 - obolo bible

Itọn̄ 29

¹Okwa kè Debit. Ìtọn̄ Okumugwem, enyi ebi osat ìkup me emen inyọn̄; ìtọn̄ ọmọ mije ujamgbugbo kan̄ mè unye kan̄!

²Ìnyi Okumugwem umin ògbegbe erieen̄ kan̄; ìtọbọ ebum ìnyi ọmọ, mije, ọmọ îkup mbuban me oniin̄ òkup òrirọ òrirọ.

³Ida Okumugwem îtaan̄ me isi mun̄ okwaan̄; Awaji ogwu òkaan̄ ujamgbugbo îsook ida kubọk isinyọn̄; ida Okumugwem îsook kubọk isinyọn̄ me owuwa okwaan̄.

⁴Ida Okumugwem îkaan̄ unye; ida kan̄ îkup mgbugbo.

⁵Ida Okumugwem îgbugbọ uti olik; iin̄, Okumugwem îgbugbọ uti olik me ido Lebanọn.

⁶Ida kan̄ îrọ ebi kè ogoon̄ Lebanọn eraan̄ ewulu kubọk bọn eriembuuk, mè irọ ogoon̄ Siriọn irama iwulu kubọk orie gwun̄ eriembuuk.

⁷Ida Okumugwem îsook, mè irọ omumen-inyọn̄ imumen.

⁸Ida Okumugwem îsisik èwê; Okumugwem îsisik èwê agan̄ Kades.

⁹Ida Okumugwem îrọ uti ilip inwunwunu, mè irọ inwan̄ igen̄ ita me ibot uti me oron; ire, me emen Uwu Mbuban, otutuuk ene ekibe, “Umin ikup inyi Awaji!”

¹⁰Okumugwem me inyọn̄ ogboon̄ ubọọn̄ kan̄ okupbe ikitọ ikọ inyi mun̄ ile; ọmọ ìkup me inyọn̄ ogboon̄ ubọọn̄ ikikpulu ire mgbọ geelek.

¹¹Okumugwem înyi ebi kan̄ unye; îrọ mè ema ekaan̄ utelelek mè esuuk.