Read obolo Itọn̄ 33 Bible Online

Itọn̄ 33 - obolo bible

Itọn̄ 33

¹Otutuuk kinyi ebi ata irọrọ, ìnwọọn̄ unwọọn̄ bak me lek inu Okumugwem orọbe; îgbe ibe ebi ejit otanabe etọn̄ ọmọ.

²Ìkwak uneen̄ eyi sọntiik ìsa ìtọn̄ Okumugwem; ìsa uneen̄ ile eyi akọp olik ìkọt okwa ìtọn̄ ọmọ.

³Ìkọt aya okwa ìnyi ọmọ; ìriọọn̄ ubọk ìkwak uneen̄ ike enyi eriọọn̄be ikwak, mè ìtaan̄ ukpo unwọọn̄.

⁴Ikọ Okumugwem ìkekeke, inu geelek îrọbe ìre atikọ.

⁵Ọmọ ìkima ata irọrọ mè unen oyerebet; imumechieen̄ mgbọ geelek kan̄ ìsoso otutuuk linyọn̄.

⁶Okumugwem ìrom akpabin inyọn̄ sa me ikọ otu kan̄, mè irom si ura mè onyan̄ mè ntoronyan̄ sa me efet otu kan̄.

⁷Înyi mun̄ otutuuk okwaan̄ okike kan̄ kubọk ìchichibi itap me iko isun̄, mè igbaan̄ mun̄ emen awaji isun̄ me ere ge kubọk ìsun̄ me uwu isun̄-inu.

⁸Otutuuk linyọn̄, ìtet ukpook me lek Okumugwem; otutuuk ebilene me irak isi ura, ìfieek owot me lek kan̄.

⁹Mije, ìtumu ikọ me otu kan̄, inyọn̄ osisibi; ìnyinyi ida, inu geelek okukup ibia.

¹⁰Okumugwem îfiat nkeek ebi ido geelek, mè ijijaka otitọt kiban̄ isan̄a kpai.

¹¹Ire, nkeek Okumugwem ìkekeke ire mgbọ geelek; otitọt kan̄ si ìkukup ire ukot geelek.

¹²Ikpele ubelejit okup inyi ido geelek Okumugwem orebe Awaji ema ekiriaak; ebi îgobobe isun̄ inyi lek kan̄.

¹³Okumugwem ìkup me emen inyọn̄ isiki chieen̄ ikpọ linyọn̄, mè imun̄ bọn ebilene geelek isan̄a kpai.

¹⁴Ìkup me inyọn̄ ogboon̄ ubọọn̄ kan̄ igele chieen̄ isiki ikpọ, mè imun̄ otutuuk ebi ìluk me linyọn̄.

¹⁵Îre ọmọ orom ejit kiban̄ otutuuk, mè iriọọn̄ ikwaan̄ ema otutuuk ekirọ.

¹⁶Ìkare ikakaan̄ urum akọn̄ ònyenye okirọ akọn̄ inwọn ogwu ubọọn̄; ìkare si unye oguga ogwu akọn̄ okaan̄be okirọ ọmọ itim ikpan̄.

¹⁷Inyinya akọn̄ ìkare inu òkirọ akọn̄ inwọn ene; ikpele unye kan̄ ìkpokọt inyan̄a ogwu akọn̄ òkup me inyọn̄ kan̄.

¹⁸Okumugwem ìkikpọ chieen̄ me lek ebi ìkitet ọmọ ukpook me lek; ebi ìtotoon̄ ejit me lek imumechieen̄ mgbọ geelek kan̄.

¹⁹Ọmọ okinyan̄a ema me mkpa, mè ikisun̄ ema me ògat ugwem me mgbọ akan̄.

²⁰Utoon̄-ejit kiji ìkup me lek Okumugwem; ọmọ ore ogwu òkitap ubọk inyi eji, mè agbọ òkikwek eji lek.

²¹Ejit kiji îbele me lek kan̄, mije eji etoon̄ ejit me lek erieen̄ kan̄ òkup mbuban.

²²Okumugwem, tele imumechieen̄ mgbọ geelek kwun̄ ikup me lek kiji, mije, eji etoon̄ ejit me lek kwun̄.