Read obolo Itọn̄ 34 Bible Online

Itọn̄ 34 - obolo bible

Itọn̄ 34

¹Okwa kè Debit mgbọ înwọnọbe me ubọk kè Abimelek ogwu îfiaan̄be irọ me isi kubọk ọmọ ìre iraak, ogwa obebe ifo, ifofo. Mâkitọn̄ Okumugwem mgbọ geelek; otu n̄a ìkporiaan̄ ere ikekitọn̄ ọmọ.

²Mâsa Okumugwem igugo lek; ebi ekitutuku mênọ, mè ibele ejit.

³Ìgọọk emi ìtọn̄ Okumugwem; ìna eji egbaan̄ otu etumu erieen̄ kan̄ emin.

⁴Nriaak ọmọ, inọnọ uriaak n̄a, mè inyan̄a emi me ubọk ebi nkifieek owot me lek.

⁵Ebi ìtoon̄ ọmọ ejit me lek ebene chieen̄ ikpọ ọmọ; utoon̄ kan̄ ototoon̄ ikana ema lek; esip geege ìkakup me isi kiban̄.

⁶Emi ogwu ugbọọn̄ keyi ntaan̄ ukpo igwen Okumugwem, inọnọ, mè inyan̄a emi isibi me otutuuk uyọrọlek n̄a.

⁷Ebi ìkitet ukpook Okumugwem, ema ke ogwu osat kan̄ okibem, mè ikinyan̄a isibi me ufialek.

⁸Ìroon̄ Okumugwem ìkpọ; enyi mêmun̄ ibe ke ọmọ înwọn; kpọ-nu uga ubelejit òkup inyi ebi geelek ìtap ibot me irak kan̄.

⁹Enyi ebi eyi kan̄, ìtet ukpook me lek kan̄; kpunu inu geege òbonan ebi ìkaan̄ ukpook kan̄ me emen.

¹⁰Kpọ, ebi kè egbe àtat ekekinan inorie, mè eran̄ ọfiọọn̄; ire, ebi ìkinu me lek Okumugwem, kpunu ata inu geege òbonan ema.

¹¹Enyi, bọn n̄a, ìna ìnigban̄ utọn̄; mâjeen̄ enyi oruru òkup me lek ikakaan̄ ukpook Okumugwem.

¹²Ìre owu oweek iluluk ujọn̄ọ ugwem, mè iweek irerie utop me ugwem kwun̄?

¹³Ire oweek, katumu ijo usem, kakan̄ ataak.

¹⁴San̄a lek me lek ijo inu, mè rọ inu ònwọnwọn; me inu geelek, week esuuk me otutuuk ejit kwun̄.

¹⁵Chieen̄ Okumugwem ìkakinan̄a me lek ebi ata irọrọ; utọn̄ kan̄ si ìkigban̄ ida nto-lek kiban̄.

¹⁶Isi kan̄ ìkakitat me lek ebi ijo irọrọ; ìbofefieek ema isan̄a, inyi ene geege ikayaka ìkeek erieen̄ kiban̄ me linyọn̄.

¹⁷Ebi ata irọrọ isitaan̄ ukpo igwen Okumugwem, Okumugwem ìkekinọ, mè ònyan̄a ema osibi me ujaralek kiban̄ geelek.

¹⁸Okumugwem òwa me agba lek ebi uga ufieejit; ìkinyan̄a ebi kpeyaka ikaan̄ ikpọchieen̄ geege.

¹⁹Ufialek ogwu ata irọrọ ìkekiwa enenen, ire, Okumugwem ore ogwu òkisan̄a ọmọ isibi me emen otutuuk ufialek cha.

²⁰Okumugwem ìkikpọkpọ ọmọ chieen̄ me lek, ìkabochieek ibe ukwuuk kan̄ ge ikeyi ifan̄a mije ufialek cha.

²¹Ebi ìkirọ ijo inu, ijo inu kiban̄ môsa ema ije; ebi ìkirọ ikeme ebi ata irọrọ, mêbọkọ osusut.

²²Okumugwem okifaka ugwem ebi ikwaan̄ kan̄ isibi; ene geelek òtap ibot me lek kan̄ ìkakaan̄ mgbọ ibọbọkọ osusut.