Read obolo Itọn̄ 36 Bible Online

Itọn̄ 36 - obolo bible

Itọn̄ 36

¹Ìkup inyi ogwu òjeen̄ okwa. Okwa kè Debit, gwun̄ ikwaan̄ Okumugwem. Ijo inu òkup me emen emen ejit ogwu ikpak okitọ ikọ inyi ogwu ikpak; ukpook Awaji ge ikeyi kpunu me emen kan̄.

²Eya orọ, ọmọ ìkitọtọn̄ lek kan̄; ìkayaka ìkikọt ìmun̄ nje-nlọ kan̄, mè ìcha.

³Ijo usem mè ikọ ofiaan̄ okinan̄a me otu kan̄ isibi; îyaka iriọọn̄-inu mè irọrọ ata inu ito.

⁴Ìkitọt ijo otitọt me inyọn̄ mkpilaak kan̄; kpunu inu geege îkirọ òkinwọnwọn; ìkacha ijo inu geege.

⁵Jei Okumugwem, imumechieen̄ kwun̄ òkikup ire mgbọ geelek îmin ibene me ijọn̄ isi ichak me akpabin inyọn̄; igbegbe utoon̄-ejit kwun̄ îbene isi ichak me lek oduku inyọn̄.

⁶Ata irọrọ okaan̄be ìmin kubọk ikpele ogoon̄; oyerebet kwun̄ okisibi, ìdọk kubọk ugwuuk okwaan̄, kpebekọt igobo itet; Okumugwem, owu okikpọ chieen̄ me lek ebilene mè anam geelek.

⁷Jei Awaji, imumechieen̄ mgbọ geelek kwun̄ îkup me unye otu ewe enenen; bọn ebilene geelek ekilileek me irak uwop kwun̄.

⁸Inorie òjojot emen uwu kwun̄ ke ema ekirie ijot owot; ubelejit okinyi ema, ìkigbuk kubọk mun̄ okwaan̄.

⁹Owu ore ogbuuruk ere ugwem okinan̄a isibi; utoon̄ kwun̄ ke eji ekisa imọọn̄ inu.

¹⁰Kpọkpọ kimun̄ ebi ìriọọn̄ owu me chieen̄ mgbọ geelek, mè kpọkpọ kirọ ata irọrọ kwun̄ nyi ebi ìtatana me ejit.

¹¹Kachieek ibe ebi ugumulek ejak emi me ukot; kachieek si ibe ubọk ebi ikpak isisik emi.

¹²Kpọ ubọk Awaji odabe ebi òkpaka ibot igwook me ijọn̄; ere ema erurọn̄ọbe inyana, ere ya ke ema ebia; kpeyaka ikọt inan̄a ikeke.