Read obolo Itọn̄ 37 Bible Online

Itọn̄ 37 - obolo bible

Itọn̄ 37

¹Okwa kè Debit. Kasisaak lek kwun̄ bak me lek ebi ikpak ekije inyi isi; kamimin si ejit me lek ebi ìkirọ ijo irọrọ.

²Mije, me mgbidim mgbọ, ema mêchiaak isan̄a kubọk mbubet, mè igen̄ ita kubọk inwan̄ oron.

³Toon̄ ejit me lek Okumugwem, mè rọ inu ònwọnwọn; owu môluk me utelelek me lek ijọn̄ înyibe owu, mè ikirie ijot owot.

⁴Tele Okumugwem ire ibot ibot inu òkibele owu ejit, ke mônyi owu inu cha ejit kwun̄ odobe.

⁵Yaka lek kwun̄ nyi Okumugwem, mè toon̄ ọmọ ejit me lek, ke môtap ubọk inyi owu.

⁶Môrọ inyi emun̄ ata irọrọ kwun̄ kubọk ekimun̄ utoon̄ ura, mè emun̄ si unen ubọk irọ-inu kwun̄ kubọk utoon̄ ejit ikarek.

⁷Bieen̄ lek me lek Okumugwem, mè siki efuuk; kat ejit kup kpọ ọmọ; kasisaak lek kwun̄ bak me lek inu okije ijaan̄ me lek ebi ijo ife, ebi ìkitọt ijo otitọt, mè erọ ètet.

⁸Kpebe lek me lek unaan̄-ejit, mè tele uyok uyok unaan̄-ejit; kasisaak lek kwun̄ bak me lek ebi ìkirọ ijo inu; ojelek isisisaak lek keya ìkitap ene unan me lek.

⁹Awaji môkpan̄ ebi ìkirọ ijo inu isan̄a kpai; ire, ebi ìtoon̄ ejit me lek Okumugwem ebekaan̄ ijọn̄ me ìrot.

¹⁰Sọntiik mgbọ, ebi ikpak kpebeyaka ikup; owu môweek ema igak, ire, owu òkpoyaka imun̄ ema.

¹¹Ire, ebi ìkirọ inu esuuk esuuk ebekaan̄ ijọn̄, mè iluk me esuuk ikirie utop.

¹²Ebi òkpaka ibot ekitọt ijo otitọt ibak ebi ata irọrọ, mè ikiban̄a otu inin̄ ema lek.

¹³Ire, Ogwukaan̄-ene okekichak ebi ikpak cha, mije îriọọn̄ ibe ke usen ọmọ obochep ema òkinu.

¹⁴Ebi òkpaka ibot mîwọọk oge akọn̄ kiban̄ isibi, mè inwunwuun̄ ogbaan̄ kiban̄ igwook, isasa ikpan̄ ebi ijo irek mè ebi una, mè ikpan̄ si ebi ìkirọ inu òtatat.

¹⁵Ire, oge akọn̄ kiban̄ ìbochim ejit kiban̄ itibi; ogbaan̄ kiban̄ si, ebefafaan̄ ifiin̄.

¹⁶Sọntiik inu ogwu ata irọrọ okaan̄be, înwọn igak owuwa inu ubọọn̄ ebi òkpaka ibot ekaan̄be.

¹⁷Mije, Okumugwem môfaan̄ ubọk ebi òkpaka ibot, mè igọọk ebi ata irọrọ ikeke.

¹⁸Okumugwem îriọọn̄ otu ifuk usen ugwem ebi ìkirọ inu òtatat; ìrot înyibe ema ìbokup ire mgbọ geelek.

¹⁹Mgbọ inu isiyọt, ema kpebenyinya; mgbọ akan̄, ema mêkaan̄ inorie ogbogbo.

²⁰Ire, ebi òkpaka ibot mêkwaan̄ ita kpai; ebi ochicha Okumugwem mêniniin̄ ichieen̄, kubọk uja eyi mbubet ukan̄ otakabe iriọk okininiin̄ ichep me emen oduku.

²¹Ogwu òkpaka ibot ìkifọọk inu me ubọk ene, ìkakiyaka ìkpe ìnyi ogwukaan̄; ire, ogwu ata irọrọ ìkichichili ubọk iche uche inyi ene.

²²Ebi Okumugwem ogbanabe ebekaan̄ ijọn̄ me ìrot, ire, ebi îchobe ataak inyi, ìbokpakpan̄ ebiba isan̄a kpai.

²³Okumugwem okijeen̄ ene ere ìbotap ukot; irọrọ ene ya îra ikineme ọmọ.

²⁴Ìrere ene ya ìnanan̄a irọn̄, ìkpobia me ijọn̄, mije Okumugwem ìtetet ọmọ ubọk ikaan̄.

²⁵Mwuuk lek ire nsabọn; mgbọ keyi, nra ikan; ire, ǹkamun̄-nu Okumugwem ojitbe ogwu ata irọrọ itele, mè ìre itele ibe bọn ene ya ekebeek inorie.

²⁶Mgbọ geelek, ogwu ata irọrọ ìkikakaan̄ njijin me lek ene; ìkichichili ubọk ifọọk inu inyi ene; bọn kan̄ ìre ugbana useen̄ ata irọrọ kan̄.

²⁷San̄a lek me lek ijo inu, mè kirọ inu ònwọnwọn, inyi owu mè bọn kwun̄ eluk me lek ijọn̄ ya mgbọ geelek;

²⁸mije Okumugwem îma irọrọ inu ònenen; eya orọ, ìkabojit ebi ìkekeke inye me lek kan̄ mgbọ geege; môkput ema lek ire mgbọ geelek; ire, môkpan̄ bọn ebi òkpaka ibot isan̄a kpai.

²⁹Ebi ata irọrọ ebekaan̄ ijọn̄ me ìrot, mè iluk me lek ijọn̄ ya ire mgbọ geelek.

³⁰Ikọ otu ogwu ata irọrọ ìre ikọ iriọọn̄-inu; otu alọm kan̄ si ìkitumu inu ònenen.

³¹Ọmọ ìkisusun̄ Ikan Awaji kan̄ me emen ejit kan̄, ìkakije ìkwala me lek ikan ya.

³²Ogwu òkpaka ibot ìkikiket ikpọ ogwu ata irọrọ, ikiweek ikpakpan̄;

³³Ire, Okumugwem ìkabotele ogwu ata irọrọ me ubọk ogwu ochicha kan̄; ìkabochieek si ibe oyerebet itip ọmọ mgbọ isitap ọmọ me oyerebet.

³⁴Kup kpọ Okumugwem, mè je me oniin̄ kan̄; ọmọ mônyi owu ijọn̄ me ìrot, isa irọ owu imin; owu mômun̄ mgbọ môkpan̄be ebi òkpaka ibot isan̄a.

³⁵Emi nra imun̄ ogwu òkpaka ibot òkirọ nnaan̄, mè ikikpọk otu agọọk kan̄ isan kubọk akpọọn̄.

³⁶Ire, mgburudun̄ nrakabe, ìkayaka ikup; mweek ọmọ igak, ǹkayaka ìmun̄ lek.

³⁷Tap iman̄ me lek ogwu ata ene; gbala chieen̄ kpọ ogwu òkirọ unen; òta mgbọ me ugwem ene ya ìre esuuk.

³⁸Ire, Awaji môgbaan̄ otutuuk ebi ijo irọrọ ijijaka isan̄a kpai; òta mgbọ kiban̄ ìre mkpa.

³⁹Okumugwem okinyan̄a ebi ata irọrọ; ọmọ ore okwukwek akọn̄ kiban̄ me mgbọ uyọrọlek.

⁴⁰Okumugwem okitap ubọk inyi ema, mè ikitaba ema isibi me uyọrọlek; ọmọ okirọ ema enwọnọ me ubọk ebi òkpaka ibot, mè ikinyan̄a ema, mije ema etoon̄be ejit me lek kan̄.