Read obolo Itọn̄ 38 Bible Online

Itọn̄ 38 - obolo bible

Itọn̄ 38

¹Ìkup inyi ngwugwa ekisa ikeek inu òrọrọ. Okwa kè Debit. Jei Okumugwem, kakan̄ inu ìnyi emi mgbọ ejit okinaan̄ owu; kasut si emi osusut mgbọ ejit okiyok owu.

²Oraan̄ kwun̄ înin̄ emi ufuk; ubọk kwun̄ òtotoon̄ emi me lek îyok emi akpa.

³Emen lek n̄a îwuwọ isan̄a, bak me lek onaan̄be ejit inyi emi; otu ukwuuk n̄a îwọ emi, mije ijo inu n̄a.

⁴Ijo inu n̄a îmeen̄ emi ibene iraka ibot; ema ìre akpan òlolobo igak emi ibebeme.

⁵Bak me lek mbubutbe, inya n̄a îjọ, mè ikisọp mun̄.

⁶Ufiak n̄a îmin enenen; îben emi itọbọ me ijọn̄; ǹkakọt ìbene isi; ǹkito mfi egwe geelek.

⁷Ebon òkiyok emi ukan̄; emen lek n̄a îwuwọ isan̄a kpai.

⁸Mgbugba îtet emi; mkpukpuku igwook, mè ikito mfi, bak me lek ufiak òkup emi me ejit.

⁹Jei Ogwukaan̄ n̄a, owu oriọọn̄ inu òkup emi me uyọt; owu onọ mfi geelek nkito.

¹⁰Ejit òkirimi emi me unye me unye; efuuk îta emi me emen; chieen̄ n̄a ìkup emi àdaan̄ àdaan̄.

¹¹Ebi une n̄a mè ebi òriọọn̄ n̄a ekeke nsọn nsọn, bak me lek orukan̄ n̄a; ebi ngwan̄ n̄a si ekeke me ujọn̄ọ ubọk.

¹²Ebi ìkiweek ikpakpan̄ emi mîtip ufe ikikpọ emi; ebi ìkiweek isasak emi unan mîtumu emi ifiat, mè ikikan̄ ataak itoon̄ emi usen geelek.

¹³Ire, emi ǹyaka inikup kubọk ogwu ìnan, ǹkakinọ ikọ, ǹkup si kubọk ogwu mbuuk, ǹkakitumu ikọ.

¹⁴Iin̄, ǹkup kubọk ogwu ìkakinọ ikọ, ogwu ìkpokọt ibọkọ ene otu.

¹⁵Ire, ǹkup ikikpọ owu, jei Okumugwem, owu Ogwukaan̄-ene Awaji n̄a obobọkọ ema otu.

¹⁶Ǹkiriaak owu ibe, soso, kachieek ibe emi ǹnan̄a ǹrọn̄, inyi ebi ochicha n̄a ekakaan̄ inu ema mêsabe ibele ejit, mè ikisa igugo lek inyi emi.

¹⁷Mâninan̄a irọn̄; ufiak n̄a ìkachieek emi ǹsiki efuuk mgbọ geege.

¹⁸Ntumu inu nrọbe owu ilọ isibi; ejit mifieek emi me lek ijo inu n̄a.

¹⁹Ebi ìchacha emi me ikike enyenye lek igo; ebi ìchacha emi me ikpak mîwa enenen.

²⁰Ema esa ijo inu ikpe emi mkpukpe ata inu n̄a, mè ikije ikeme emi mgbọ nkirọ inu òtatat.

²¹Jei Okumugwem, soso, kajit emi ìtele; Awaji n̄a, kada lek ìbọkọ emi me lek!

²²Jei Okaan̄ n̄a, ogwu unyan̄a n̄a, gwat lek na tap ubọk nyi emi.