Read obolo Itọn̄ 40 Bible Online

Itọn̄ 40 - obolo bible

Itọn̄ 40

¹Okwa kè Debit. Ìkup inyi ogwu òjeen̄ okwa. Nkat ejit ikup ikikpọ Okumugwem; inunu ininyan̄a emi.

²Îtaba emi isibi me udọn̄ ufialek, mè itaba emi isibi me emen utek arika; îsa emi inito me inyọn̄ ewuuk, mè irọ ukot n̄a inye me ijọn̄.

³Îtap emi aya okwa me otu, okwa òkinyi ọmọ Awaji kiji umin; owuwa ene mêmun̄ ikwaan̄ îsibe, mè itet ukpook, mè itoon̄ ọmọ Okumugwem ejit me lek.

⁴Kpọ-nu uga ubelejit òkup inyi ebi ìtoon̄ Okumugwem ejit me lek, mè ijit igọgọọk ebi ugumulek isi iriaak awaji echi ikarege Awaji.

⁵Okumugwem Awaji kiji, owu orọ owuwa uyeke inu inyi eji; kpunu ogwu ebesa owu itọ me lek; ata inu okaan̄be me nkeek kwun̄ ibak eji îwa enenen; emi m̀kpakọt ikpa otutuuk isan̄a.

⁶Owu onyi emi utọn̄ ibe ǹnọ ikọ; owu òkaweek esese chieen̄ ngwugwa; òkado ngwugwa ewọwọp iriọk, òkado ngwugwa ijo inu.

⁷Ikeya ke mbe, “Kpọ emi ire eyi, nnu.” Mîge inu ofolek n̄a me ikpa ikan ibe,

⁸“Jei Awaji n̄a, irọrọ nkeek kwun̄ ìkitotop emi me lek; ikan kwun̄ ọmọ òwa me emen ejit n̄a nsun̄be.”

⁹Ata etip unyan̄a ya eyi owu okinyan̄a ene, m̀kpakpa iwele me isi ebi kwun̄ me emen uga ntitiin̄ kiban̄; Okumugwem, owu oriọọn̄ ibe ǹkatet otu ìkaan̄; ǹkitutumu isibi.

¹⁰Ǹkatet ukpatu ata irọrọ kwun̄ ìkaan̄ me lek n̄a gaalek; ǹkitutumu isibi ibe ke owu ogbe ibe etoon̄ ejit me lek; ke owu okinyan̄a ebi eyi kwun̄; me emen uga ntitiin̄ ebi kwun̄, ǹkitutumu isibi ibe ke owu okimun̄ ene me chieen̄ mgbọ geelek, ǹkalet otu.

¹¹Okumugwem, katele irọrọ emi nsan; kibem emi mgbọ geelek, bak me lek orebe ogwu atikọ, mè ogwu òkimun̄ ene me chieen̄ mgbọ geelek.

¹²Mije, uyọrọlek îkana emi me ijọn̄ okokop, ǹkayaka ìriọọn̄ otu ifuk; ijo inu n̄a îkana emi ikwuun̄; ǹkayaka ìmọọn̄ inu; uyọrọlek n̄a îwa igak ijeek ibot n̄a; ejit n̄a ìkayaka ìnye emi.

¹³Soso, Okumugwem, nyan̄a emi sibi; gwat lek na tap ubọk nyi emi.

¹⁴Soso, rọ ebi ìkiweek ikpakpan̄ emi ekana welewele, mè tap ema esip me isi; rieen̄ ebi ìkiweek ibe uyọrọlek ikeme emi kpebe, inyi ema eben esip me isi egwu ekom!

¹⁵Ebi ìkigigaan̄ emi “Kpuwai! Kpuwai” cha, rọ inyi esip itet ema, ufuna lek kiban̄ igba.

¹⁶Ire, tele ebi geelek ìkinu lek kwun̄ ebele ejit, mè enwọọn̄ unwọọn̄ me lek inu orọbe inyi ema; ikeya si, rọ ebi geelek ìmama ibe owu òre ogwu unyan̄a kiban̄, eketumu mgbọ geelek ibe, “Okumugwem îmin!”

¹⁷Ire, emi ìre ogwu ugbọọn̄ mè ogwu una-lek; owu okaan̄ nkeek ibak emi; owu okitap ubọk inyi emi; owu okinyan̄a emi. Jei, Awaji n̄a, gwat lek na na nyan̄a emi!