Read obolo Itọn̄ 41 Bible Online

Itọn̄ 41 - obolo bible

Itọn̄ 41

¹Ìkup inyi ogwu òjeen̄ okwa. Okwa kè Debit. Kpọ-nu uga ubelejit òkup inyi ogwu òkitap ubọk inyi ebi irek osikibe; Okumugwem mônyan̄a ọmọ me mgbọ uyọrọlek.

²Okumugwem môbem ọmọ, mè isun̄ ọmọ ugwem; Okumugwem môgbana ọmọ me linyọn̄; ìkpojit ọmọ itele ibe ebi ochicha kan̄ ekpan̄ ọmọ.

³Orukan̄ isitet ọmọ, Okumugwem môtap ubọk inyi ọmọ me inyọn̄ mkpilaak orukan̄ kan̄, mè irọ ibe lek kan̄ inye.

⁴Jei Okumugwem, ǹkitumu inyi owu ibe ke nrọ owu ilọ; soso, to emi nsan, mè rọ inyi lek n̄a inye.

⁵Ebi ochicha n̄a esa njijọ ejit ikibe, “Ìre kpa mgbọ ke ene yi obokwu mọnọ, ufuna erieen̄ kan̄ ichep?”

⁶Ema isinu inikpọ emi, mîra ikifiaan̄ itumu ikọ òbokat emi ejit, mè ikititen̄e ijo etip geelek ofolek n̄a; ema isisibi ifon, mîra isa ikikpa ikana ere.

⁷Otutuuk ebi oriara n̄a, ekije emen emen ikigbaan̄ ilo emi, mè ikitọt ijo otitọt ibak emi.

⁸Ema ekibe ke inu òtetet emi îtet isan̄a, ke m̀kpayaka inan̄a ikeke me inyọn̄ mkpilaak orukan̄ nlaakbe.

⁹Achubọk unene ibot ejit n̄a gaalek, ogwu ntoon̄be ejit me lek enenen, ogwu ògọgọọk emi igbaan̄ irie inorie n̄a, îben emi inyam ewe.

¹⁰Okumugwem, kaan̄ nsan me lek n̄a, mè rọ inyi lek n̄a inye, ufuna m̀kpe ebi ochicha n̄a useen̄.

¹¹Ebi ochicha n̄a kpetim ikpan̄ emi; eyi ke nsa iriọọn̄ ibe ke owu obele ejit me lek n̄a.

¹²Owu obieen̄ emi ikaan̄, bak me lek unen eru n̄a, mè itele ibe emi ǹkup me ere owu okupbe mgbọ geelek.

¹³Ìtọn̄ Okumugwem, Awaji ebi Ijeren; ìtọn̄ ọmọ mgbọ keyi ìre mgbọ geelek, mgbọ geelek! Ikup ikeya, mè ikup si ikeya!