Read obolo Itọn̄ 44 Bible Online

Itọn̄ 44 - obolo bible

Itọn̄ 44

¹Ìkup inyi ogwu òjeen̄ okwa. Ijeen̄-inu bọn kè Kora. Jei Awaji, eji mîsa utọn̄ kiji inọ ikpele inu orọbe me ukot ebi nte nte kiji mgbọ òraraka; ema mîkpa otutuuk inu cha inyi eji.

²Owu osa unye kwun̄ irieen̄ owuwa ido isan̄a me lek ijọn̄ kiban̄, mè isa ebi eyi kwun̄ inigwook ibia; owu osut ebi ido cha osusut, mè irieen̄ ema isibi me lek ijọn̄ cha, mè irọ inu ije ijaan̄ me lek ebi eyi kwun̄.

³Ebi eyi kwun̄ kpesa oge akọn̄ kiban̄ itim akọn̄ ibọkọ ijọn̄; ìkare unye ema ekaan̄be orọ ema etimbe ikpan̄; ire, îre sa me unye kwun̄ mè efuuk kwun̄, melek owu okupbe melek kiban̄ mgbọ geelek, bak me lek owu omun̄be ema me chieen̄.

⁴Jei, owu ìre ogwu Ubọọn̄ n̄a mè Awaji n̄a; soso rọ inyi bọn kè Jekọp etim ekpan̄.

⁵Sa me lek kwun̄, eji mêda ebi ochicha kiji ito; sa me lek erieen̄ kwun̄, eji mêjak ebi ìkije ikeme eji me ukot.

⁶Ǹkasa ogbaan̄ n̄a ìtoon̄ ejit; oge akọn̄ n̄a si, ìkpokọt inyan̄a emi.

⁷Ire, îre owu onyan̄a eji me ubọk ebi oriara kiji, mè irọ ebi ìchacha eji inu esip.

⁸Awaji, îre owu ke eji ekisa igugo lek mgbọ geelek; eji mêkitọn̄ erieen̄ kwun̄ ire mgbọ ikakaan̄ge itata.

⁹Ire, mgbọ keyi, owu ojit eji itele, mè isa esip itet eji; òkayaka ìkigọọk urum akọn̄ kiji ìsi akọn̄.

¹⁰Owu orọ eji ekiliin̄ itele ebi ochicha kiji; ema ekekifum inu kiji isa irọ eyi kiban̄.

¹¹Owu orọ ekigwu eji kubọk ekigwu arọọn̄, mè irọ inyi etọọn̄ eji echon ekana ido geelek.

¹²Owu onyam ebi eyi kwun̄ me ijo otu ewe; òkarie oruru geege.

¹³Owu orọ ido ebi ìluluk iriaak eji ekedo eji otu, mè irọ ebi ìluluk ikana eji ekechak eji ochak.

¹⁴Owu orọ eji enin̄be me urọk, mè ikana inu ebi ofifi ido ekisa ichak imọm.

¹⁵Ulibi îta emi me lek eririeen̄ mè ikarek; esip îwele ichit emi isi,

¹⁶inan̄a me lek itiik mè idodo otu ebi ochicha ekido eji, mè ochak ebi ìkima irọrọ useen̄ ekichak eji.

¹⁷Inu chi ìkpọkpọ irọ ikeya; ìkare ibe ke eji mîwuuk owu, mè ìre ke eji mîgwaka inan̄a me lek inyan̄a-ibot kwun̄ melek kiji.

¹⁸Ejit kiji ìkanwene me lek kwun̄; ukot kiji si ìkanan̄a me oniin̄ kwun̄.

¹⁹Ire, owu ojit eji itele, ibe ebi ochicha egwak eji eche kubọk ibo oron afa, mè ijit eji itele me emen udun, ibe eji ekwaan̄ eta.

²⁰Ire eji itele itọtọbọ ebum inyi owu, mè ìyaka ire eji esi ikiriaak mkpọmfaka ebi ofifi ido ekiriaak,

²¹ìre owu Awaji kpomofat iriọọn̄ ni? Owu oriọọn̄ nlelet inu òkup me emen ejit ene.

²²Ire, îre bak me lek eji ekigọọk oniin̄ kwun̄ ke ekikpan̄ eji mgbọ geelek, mè ikimọnọ eji kubọk arọọn̄ ebegwugwu.

²³Okumugwem, nan̄a keke; òjeje ikilaak? Tọbọ jibi; kalap eji ìto ìre mgbọ geelek!

²⁴Òjeje isan̄a eji chieen̄ me lek, mè iwuuk tukutuku ekitutuku eji mè ujaralek kiji?

²⁵Udun̄ kiji îrọn̄ ire ijọn̄; eji mîken achiaan̄ ibaan̄ me lek.

²⁶Nan̄a keke, na tap ubọk nyi eji; faka eji sibi, sa me lek imumechieen̄ mgbọ geelek kwun̄!