Read obolo Itọn̄ 45 Bible Online

Itọn̄ 45 - obolo bible

Itọn̄ 45

¹Ìkup inyi ogwu òjeen̄ okwa: Igọọk me ida okwa “Lili.” Okwa eyi bọn kè Kora. Ijeen̄-inu. Okwa ido-nwa. Ikọ òtotop înin̄ ijot emi ejit; mgbọ nkikọt okwa keyi inyi ogwu ubọọn̄, otu alọm n̄a ìkije kubọk uti ikpa ata ogwu òge ikpa.

²Owu ojaan̄ uja ichit me etete bọn ebilene; owu okaan̄ otu usem; Awaji ìgbagbana owu ire mgbọ geelek.

³Tobo oge akọn̄ kwun̄ nye me ebon; unye ene ke owu ore; owu okaan̄ òrirọ mè umin ubọọn̄.

⁴Je me umin ubọọn̄ kwun̄ sibi si tim kpan̄, me ibot atikọ mè unen oyerebet mè ata irọrọ; sa unye oguga kwun̄ jeen̄ inu mgbugbo okirọ.

⁵Ogwu ubọọn̄, oraan̄ kwun̄ cha òsisisọn otu mônin̄ ejit ebi ochicha kwun̄ itibi agan̄; ebi ofifi ido mêrurọn̄ọ igwook me ukot kwun̄.

⁶Jei Awaji, ogboon̄ ubọọn̄ kwun̄ ìbokup ire mgbọ geelek, mgbọ geelek; okuba ubọọn̄ kwun̄ ìre eyi ata irọrọ.

⁷Owu oma ata irọrọ mè icha irọrọ ikpak; eya orọ Awaji, ogwu òre Awaji kwun̄, otọkọbe owu aran̄ me ibot, mè inyi owu ubelejit igak ebi ubọọn̄ ogbo kwun̄.

⁸Otutuuk ofọnti ubọọn̄ kwun̄ ìkidun̄u utop olu aran̄ mâa, mè alò, mè kasia; uwu ubọọn̄ kwun̄, esa oduuk eniin̄ ibala; ere ya ke nkwukwak echi olik okitaan̄ inyi owu, isa ikirọ ejit kwun̄ ibele.

⁹Bọn ebibaan̄ ebi ubọọn̄ eboon̄be ema òwa me etete ebibaan̄ kwun̄; ogwu ubọọn̄ enenwaan̄ owu obodo, ọmọ òwa me agan̄ ubọk ulom kwun̄ okekebe, mè atalek alata araran̄ ònan̄a me ama Ofiri me lek.

¹⁰Gwun̄ n̄a enenwaan̄, gen ibot, mè siki utọn̄ gban̄; san̄a ejit me lek ama kinyi, mè ebi ido kinyi, mè ebi uwu nte kwun̄,

¹¹ufuna uja kwun̄ môlọk ogwu ubọọn̄ enenen; siki ibot nyi ọmọ, mije ọmọ ore ogwukaan̄ kwun̄.

¹²Ebi ama Taya mêsa uche ijet owu; ebi ìbọbọọn̄ ubọọn̄ mêniweek nnwọn me ubọk kwun̄.

¹³Ubọọn̄ enenwaan̄ ogwu ubọọn̄ obodo ọmọ òwa me emen agwut okenbe lek ikup òrirọ òrirọ; ofọnti àwurukù îtapbe, esa alata araran̄ igbaalek ilọk.

¹⁴Ofọnti àwurukù òkikekebe me lek îtapbe; ekekisa ọmọ iban ijet owu ogwu ubọọn̄; obaak ebibaan̄ ogbo kan̄ ebi ìkisa ọmọ iban, mîsa ebiba si igbaalek ijet owu.

¹⁵Mêsa me unwọọn̄ mè ubelejit isa ema inu; ema otutuuk mêraraka inin̄ emen uwu ogwu ubọọn̄.

¹⁶Ogwu ubọọn̄, bọn ebirieen̄ kwun̄ mêkana ubọọn̄ me irek ebi nte nte kwun̄; owu môrọ ema ebi ìkikpulu otutuuk linyọn̄.

¹⁷Okwa n̄a môrọ ibe erieen̄ kwun̄ itaan̄ etip ire ukot geelek; ebi ido geelek mêtọn̄ owu ire mgbọ geelek.